(نبی کریم صلی اللہ علیہ وسلم نے فرمایا:)
”جمعہ میں حاضر ہوا کرو اور امام کے قریب بیٹھا کرو، کیونکہ انسان جمعہ سے پیچھے رہتا ہے یہاں تک کہ اسے جنت سے بھی پیچھے کر دیا جاتا ہے، حالانکہ وہ جنتیوں میں سے ہوگا۔“ [صحيح الجامع الصغير وزيادته/[حرف الألف] -- اج/حدیث: 201]

(نبی کریم صلی اللہ علیہ وسلم نے فرمایا:)
”قبریں کھودو، انہیں گہرا اور کشادہ بناؤ، اور دو اور تین افراد کو ایک ہی قبر میں دفن کر دو، اور (لحد میں) اسے آگے رکھو جسے قرآن زیادہ یاد ہو۔“ [صحيح الجامع الصغير وزيادته/[حرف الألف] -- اج/حدیث: 202]

(نبی کریم صلی اللہ علیہ وسلم نے فرمایا:)
”اپنی شرمگاہ کی حفاظت کرو سوائے اپنی بیوی یا اپنی لونڈی کے۔ (آپ سے) پوچھا گیا: اگر لوگ آپس میں ملے جلے ہوں؟ تو آپ نے فرمایا: اگر تم اس بات کی طاقت رکھتے ہو کہ اسے کوئی بھی نہ دیکھے تو اسے ہرگز کوئی نہ دیکھے۔ پھر پوچھا گیا: اگر ہم میں سے کوئی اکیلا تنہائی میں ہو؟ تو آپ نے فرمایا: اللہ تعالیٰ اس بات کا زیادہ حقدار ہے کہ اس سے حیا کی جائے بنسبت لوگوں کے۔“ [صحيح الجامع الصغير وزيادته/[حرف الألف] -- اج/حدیث: 203]

(نبی کریم صلی اللہ علیہ وسلم نے فرمایا:)
”اپنی زبان کی حفاظت کرو۔“ [صحيح الجامع الصغير وزيادته/[حرف الألف] -- اج/حدیث: 204]

(نبی کریم صلی اللہ علیہ وسلم نے فرمایا:)
”اپنی زبان کی حفاظت کرو، اے معاذ! تمہاری ماں تم پر روئے، بھلا لوگوں کو اوندھے منہ گرانے والی چیز ان کی زبانوں کے سوا اور کیا ہے؟“ [صحيح الجامع الصغير وزيادته/[حرف الألف] -- اج/حدیث: 205]

(نبی کریم صلی اللہ علیہ وسلم نے فرمایا:)
”میرے صحابہ کے حق میں میری وصیت یاد رکھو، پھر ان لوگوں کے حق میں جو ان کے بعد آئیں گے، پھر ان کے حق میں جو ان کے بعد آئیں گے، پھر (اس کے بعد) جھوٹ عام ہو جائے گا یہاں تک کہ آدمی گواہی دے گا حالانکہ اس سے گواہی نہیں مانگی گئی ہوگی، اور وہ قسم کھائے گا حالانکہ اس سے قسم طلب نہیں کی گئی ہوگی۔“ [صحيح الجامع الصغير وزيادته/[حرف الألف] -- اج/حدیث: 206]

(نبی کریم صلی اللہ علیہ وسلم نے فرمایا:)
”مونچھیں خوب پست کرو اور داڑھیاں بڑھاؤ۔“ [صحيح الجامع الصغير وزيادته/[حرف الألف] -- اج/حدیث: 207]

(نبی کریم صلی اللہ علیہ وسلم نے فرمایا:)
”یا تو دونوں پاؤں ننگے رکھو یا پھر دونوں میں جوتے پہنو، اور جب تم جوتا پہنو تو دائیں پاؤں سے ابتدا کرو اور جب اتارو تو بائیں پاؤں سے ابتدا کرو۔“ [صحيح الجامع الصغير وزيادته/[حرف الألف] -- اج/حدیث: 208]

(نبی کریم صلی اللہ علیہ وسلم نے فرمایا:)
”سونا اور ریشم میری امت کی عورتوں کے لیے حلال کر دیا گیا ہے اور مردوں پر حرام کر دیا گیا ہے۔“ [صحيح الجامع الصغير وزيادته/[حرف الألف] -- اج/حدیث: 209]

(نبی کریم صلی اللہ علیہ وسلم نے فرمایا:)
”ہمارے لیے دو مردار اور دو قسم کے خون حلال کیے گئے ہیں۔ پس وہ دو مردار مچھلی اور ٹڈی ہیں، اور وہ دو خون کلیجی اور تلی ہیں۔“ [صحيح الجامع الصغير وزيادته/[حرف الألف] -- اج/حدیث: 210]