(نبی کریم صلی اللہ علیہ وسلم نے فرمایا:)
”جب کوئی شخص عورت کی چاروں شاخوں (ہاتھوں اور پیروں) کے درمیان بیٹھ جائے اور اس کے ساتھ مشقت (ہمبستری) کرے تو اس پر غسل واجب ہو جاتا ہے، خواہ انزال نہ بھی ہوا ہو۔“ [صحيح الجامع الصغير وزيادته/[حرف الألف] -- أد/حدیث: 479]

(نبی کریم صلی اللہ علیہ وسلم نے فرمایا:)
”جب کوئی شخص عورت کی چاروں شاخوں کے درمیان بیٹھ جائے اور ختنہ ختنے سے مس ہو جائے (شرمگاہیں آپس میں مل جائیں) تو یقیناً غسل واجب ہو جاتا ہے۔“ [صحيح الجامع الصغير وزيادته/[حرف الألف] -- أد/حدیث: 480]

(نبی کریم صلی اللہ علیہ وسلم نے فرمایا:)
”جب تم میت کو (خوشبو کی) دھونی دو تو طاق عدد میں دو۔“ [صحيح الجامع الصغير وزيادته/[حرف الألف] -- أد/حدیث: 481]

(نبی کریم صلی اللہ علیہ وسلم نے فرمایا:)
”جب اللہ تعالیٰ اگلوں اور پچھلوں کو اس (قیامت کے) دن جمع فرمائے گا جس کے آنے میں کوئی شک نہیں، تو ایک پکارنے والا پکارے گا: جس شخص نے کوئی ایسا عمل کیا جو اللہ کے لیے تھا مگر اس میں کسی اور کو بھی شریک ٹھہرایا، تو اسے چاہیے کہ وہ اپنے عمل کا ثواب بھی اسی (شریک) سے طلب کرے، کیونکہ اللہ تعالیٰ تمام شراکت داروں کی نسبت شرک سے سب سے زیادہ بے نیاز ہے۔“ [صحيح الجامع الصغير وزيادته/[حرف الألف] -- أد/حدیث: 482]

(نبی کریم صلی اللہ علیہ وسلم نے فرمایا:)
”جب اللہ تعالیٰ قیامت کے دن اگلوں اور پچھلوں کو جمع فرمائے گا تو ہر عہد شکن (دھوکہ باز) کے لیے ایک جھنڈا بلند کیا جائے گا اور کہا جائے گا: یہ فلاں بن فلاں کی غداری اور عہد شکنی کی نشانی ہے۔“ [صحيح الجامع الصغير وزيادته/[حرف الألف] -- أد/حدیث: 483]

(نبی کریم صلی اللہ علیہ وسلم نے فرمایا:)
”جب کوئی بات تمہارے دل میں کھٹکے (یعنی شک پیدا کرے) تو اسے چھوڑ دو۔“ [صحيح الجامع الصغير وزيادته/[حرف الألف] -- أد/حدیث: 484]

(نبی کریم صلی اللہ علیہ وسلم نے فرمایا:)
”جب کوئی نابالغ بچہ حج کرتا ہے تو یہ اس کے لیے (نفلی) حج شمار ہوتا ہے یہاں تک کہ وہ باشعور (بالغ) ہو جائے، پس جب وہ بالغ ہو جائے تو اس پر ایک اور (فرض) حج لازم ہے۔ اور جب کوئی دیہاتی حج کرتا ہے تو یہ اس کے لیے حج ہے، پھر جب وہ ہجرت کر لے تو اس پر ایک اور حج لازم ہے۔“ [صحيح الجامع الصغير وزيادته/[حرف الألف] -- أد/حدیث: 485]

(نبی کریم صلی اللہ علیہ وسلم نے فرمایا:)
”جب کوئی شخص کوئی بات کہے اور پھر (یہ دیکھنے کے لیے کہ کوئی سن تو نہیں رہا) ادھر ادھر دیکھے، تو وہ بات (سننے والے کے پاس) امانت ہوتی ہے۔“ [صحيح الجامع الصغير وزيادته/[حرف الألف] -- أد/حدیث: 486]

(نبی کریم صلی اللہ علیہ وسلم نے فرمایا:)
”جب تم میں سے کسی کو کوئی ایسا اہم کام درپیش ہو جس کے فوت ہو جانے کا اسے اندیشہ ہو، تو وہ اس طرح نماز پڑھ لے، یعنی دو نمازوں کو (ایک ساتھ) جمع کر کے پڑھ لے۔“ [صحيح الجامع الصغير وزيادته/[حرف الألف] -- أد/حدیث: 487]

(نبی کریم صلی اللہ علیہ وسلم نے فرمایا:)
”جب تم میں سے کوئی اپنی (فرض) نماز مسجد میں ادا کر لے تو اسے چاہیے کہ وہ اپنی (نفل و سنت) نماز کا کچھ حصہ اپنے گھر کے لیے بھی مقرر کرے، کیونکہ اللہ تعالیٰ اس کی نماز کی برکت سے اس کے گھر میں بھلائی پیدا فرمانے والا ہے۔“ [صحيح الجامع الصغير وزيادته/[حرف الألف] -- أد/حدیث: 488]