سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”عنقریب اس امت میں زمین میں دھنسنے، صورتوں کے مسخ ہونے، زلزلوں اور سنگ باری کے واقعات پیش آئیں گے“۔ [مسند أبي يعلى الموصلي/مسند أنس بن مالك/حدیث: 3945]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے اپنے صحابہ کرام سے خطاب کرتے ہوئے ارشاد فرمایا: «لَا تَرْجِعُنَّ بَعْدِي كُفَّارًا يَضْرِبُ بَعْضُكُمْ رِقَابَ بَعْضٍ» ”تم میرے بعد کفر کی طرف نہ پلٹ جانا کہ تم ایک دوسرے کی گردنیں مارنے (قتل و غارت گری کرنے) لگو۔“ [مسند أبي يعلى الموصلي/مسند أنس بن مالك/حدیث: 3946]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «إِنَّ النُّبُوَّةَ وَالرِّسَالَةَ قَدِ انْقَطَعَتْ» ”بے شک نبوت اور رسالت کا سلسلہ اب منقطع ہو چکا ہے“، یہ سن کر لوگ سخت پریشان اور غمزدہ ہوئے تو آپ صلی اللہ علیہ وسلم نے (تسلی دیتے ہوئے) ارشاد فرمایا: «قَدْ بَقِيَتْ مُبَشِّرَاتٌ، وَهِيَ جُزْءٌ مِنَ النُّبُوَّةِ» ”البتہ مبشرات (خوشخبریاں) باقی رہ گئی ہیں اور وہ نبوت کا ایک حصہ ہیں“۔ [مسند أبي يعلى الموصلي/مسند أنس بن مالك/حدیث: 3947]

سیدنا انس بن مالک رضی اللہ عنہ سے روایت ہے کہ ایک شخص نے رسول اللہ صلی اللہ علیہ وسلم سے عرض کیا: ”اے بہترینِ خلائق!“ تو رسول اللہ صلی اللہ علیہ وسلم نے (انکساری کے طور پر) ارشاد فرمایا: ”وہ (مقام و مرتبہ) تو ابراہیم علیہ السلام کا ہے۔“ [مسند أبي يعلى الموصلي/مسند أنس بن مالك/حدیث: 3948]

سیدنا انس رضی اللہ عنہ سے روایت ہے کہ ایک شخص رسول اللہ صلی اللہ علیہ وسلم کی بارگاہِ اقدس میں حاضر ہوا اور عرض کی: ”اے تمام مخلوقات میں سب سے بہتر شخصیت!“ تو آپ صلی اللہ علیہ وسلم نے (بطورِ انکسار) ارشاد فرمایا: ”وہ (ذات تو) سیدنا ابراہیم علیہ السلام ہیں۔“ [مسند أبي يعلى الموصلي/مسند أنس بن مالك/حدیث: 3949]

سیدنا انس رضی اللہ عنہ سے روایت ہے کہ ایک شخص نے نبی صلی اللہ علیہ وسلم کی خدمت میں عرض کیا: ”اے تمام مخلوق میں سب سے بہتر!“ تو آپ صلی اللہ علیہ وسلم نے (از راہِ تواضع) ارشاد فرمایا: ”وہ (مقام و مرتبہ) تو سیدنا ابراہیم علیہ السلام کا ہے۔“ [مسند أبي يعلى الموصلي/مسند أنس بن مالك/حدیث: 3950]

سیدنا انس رضی اللہ عنہ سے روایت ہے کہ انہوں نے فرمایا: ”ایک دن رسول اللہ صلی اللہ علیہ وسلم ہمارے درمیان تشریف فرما تھے کہ اچانک آپ صلی اللہ علیہ وسلم پر غنودگی طاری ہوئی، پھر آپ صلی اللہ علیہ وسلم نے مسکراتے ہوئے اپنا سرِ مبارک اٹھایا تو میں نے عرض کیا: اے اللہ کے رسول صلی اللہ علیہ وسلم ! آپ کس بات پر تبسم فرما رہے ہیں؟ آپ صلی اللہ علیہ وسلم نے فرمایا: ”مجھ پر ابھی ایک سورت نازل ہوئی ہے،“ پھر آپ صلی اللہ علیہ وسلم نے تلاوت فرمائی: ﴿بِسْمِ اللَّهِ الرَّحْمَنِ الرَّحِيمِ، إِنَّا أَعْطَيْنَاكَ الْكَوْثَرَ فَصَلِّ لِرَبِّكَ وَانْحَرْ إِنَّ شَانِئَكَ هُوَ الْأَبْتَرُ﴾، پھر آپ صلی اللہ علیہ وسلم نے دریافت فرمایا: ”کیا تم جانتے ہو کہ کوثر کیا ہے؟“ ہم نے عرض کیا: اللہ اور اس کا رسول صلی اللہ علیہ وسلم ہی بہتر جانتے ہیں، آپ صلی اللہ علیہ وسلم نے فرمایا: ”وہ ایک نہر ہے جس کا میرے رب نے مجھ سے وعدہ فرمایا ہے اور اس میں خیرِ کثیر ہے، وہ ایک حوض ہے جس پر میری امت قیامت کے دن پانی پینے کے لیے وارد ہوگی، اس کے برتنوں کی تعداد آسمان کے ستاروں کے برابر ہے، پھر ان میں سے کچھ لوگوں کو وہاں سے کھینچ لیا جائے گا تو میں عرض کروں گا: اے میرے رب! یہ تو میری امت سے ہے، تو اللہ تعالیٰ فرمائے گا: یقیناً آپ نہیں جانتے کہ انہوں نے آپ کے بعد دین میں کیا نئی چیزیں پیدا کر لی تھیں۔““ [مسند أبي يعلى الموصلي/مسند أنس بن مالك/حدیث: 3951]

سیدنا انس رضی اللہ عنہ سے روایت ہے کہ ایک روز رسول اللہ صلی اللہ علیہ وسلم نے ہمیں نماز پڑھائی، پس جب آپ صلی اللہ علیہ وسلم نماز مکمل فرما چکے تو ہماری طرف رُخِ مبارک کر کے متوجہ ہوئے اور ارشاد فرمایا: ”اے لوگو! میں تمہارا امام ہوں، لہٰذا تم رکوع، سجود اور قیام میں مجھ سے پہل نہ کیا کرو، کیونکہ میں تمہیں اپنے سامنے سے بھی دیکھتا ہوں اور اپنے پیچھے سے بھی“، پھر آپ صلی اللہ علیہ وسلم نے فرمایا: ”اس ذات کی قسم جس کے قبضۂ قدرت میں میری جان ہے! اگر تم وہ دیکھ لیتے جو میں نے دیکھا ہے تو تم ہنستے کم اور روتے بہت زیادہ“، صحابہ کرام رضی اللہ عنہم نے عرض کی کہ اے اللہ کے رسول صلی اللہ علیہ وسلم ! آپ نے کیا دیکھا ہے؟ آپ صلی اللہ علیہ وسلم نے ارشاد فرمایا: ”میں نے جنت اور دوزخ کو دیکھا ہے“۔ [مسند أبي يعلى الموصلي/مسند أنس بن مالك/حدیث: 3952]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”الکوثر جنت میں ایک نہر ہے جس کا وعدہ میرے رب عزوجل نے مجھ سے فرمایا ہے۔“ [مسند أبي يعلى الموصلي/مسند أنس بن مالك/حدیث: 3953]

مختار بن فلفل رحمہ اللہ بیان کرتے ہیں کہ میں نے سیدنا انس رضی اللہ عنہ سے برتنوں میں (نبیذ وغیرہ) پینے کے متعلق سوال کیا تو انہوں نے جواب دیا کہ ”رسول اللہ صلی اللہ علیہ وسلم نے روغنِ قیر ملے ہوئے برتنوں کے استعمال سے منع فرمایا“ اور آپ صلی اللہ علیہ وسلم نے یہ بھی ارشاد فرمایا کہ ”ہر نشہ آور چیز حرام ہے۔“ [مسند أبي يعلى الموصلي/مسند أنس بن مالك/حدیث: 3954]