سیدنا انس بن مالک رضی اللہ عنہ سے روایت ہے کہ ایک روز رسول اللہ صلی اللہ علیہ وسلم ہنسے یا مسکرائے، پھر آپ صلی اللہ علیہ وسلم نے اپنے صحابہ سے دریافت فرمایا: ”کیا تم مجھ سے نہیں پوچھو گے کہ میں کس بات پر ہنسا ہوں؟“ صحابہ کرام رضی اللہ عنہم نے عرض کیا: اے اللہ کے رسول صلی اللہ علیہ وسلم ! آپ کس بات پر ہنسے؟ آپ صلی اللہ علیہ وسلم نے فرمایا: ”مجھے قیامت کے دن بندے کا اپنے رب کے حضور تکرار کرنے پر حیرت ہوئی، وہ عرض کرے گا: اے میرے رب! کیا تو نے مجھ سے یہ وعدہ نہیں فرمایا تھا کہ تو مجھ پر ظلم نہیں کرے گا؟ اللہ رب العزت فرمائے گا: کیوں نہیں (بیشک کیا تھا)، وہ بندہ کہے گا: پھر میں اپنے خلاف کسی کی گواہی قبول نہیں کروں گا سوائے اپنی ذات کے، تو اللہ تعالیٰ فرمائے گا: کیا بطورِ گواہ میں خود اور معزز کاتب فرشتے کافی نہیں ہیں؟“ آپ صلی اللہ علیہ وسلم نے فرمایا: ”وہ بندہ بار بار یہی بات دہرائے گا، پس اس کے منہ پر مہر لگا دی جائے گی اور اس کے اعضاء بول اٹھیں گے کہ وہ کیا عمل کیا کرتا تھا،“ آپ صلی اللہ علیہ وسلم نے فرمایا: ”تب وہ بندہ (اپنے ہی اعضاء کو ملامت کرتے ہوئے) کہے گا: «بُعْدًا لَكُنَّ وَسُحْقًا» ”تمہارے لیے ہلاکت اور بربادی ہو“، میں تو تمہاری ہی مدافعت میں (اللہ سے) جھگڑ رہا تھا۔“ [مسند أبي يعلى الموصلي/مسند أنس بن مالك/حدیث: 3975]

سیدنا انس بن مالک رضی اللہ عنہ سے روایت ہے کہ ”قیامت کے دن بندے سے سب سے پہلے جس عمل کا حساب لیا جائے گا وہ نماز ہے، چنانچہ اگر وہ پوری ہوئی تو اس کے بقیہ تمام اعمال بھی پورے (قبول) ہوں گے، اور اگر اس میں کوئی کمی پائی گئی تو (فرشتوں سے) کہا جائے گا: دیکھو کیا اس کے پاس کچھ نفلی نمازیں ہیں؟ پھر اگر اس کے پاس نفلی نمازیں ہوں گی تو اللہ تعالیٰ فرمائے گا: ان کے ذریعے اس کی (فرض) نماز کے نقص کو پورا کر دو۔“ [مسند أبي يعلى الموصلي/مسند أنس بن مالك/حدیث: 3976]

سیدنا انس بن مالک رضی اللہ عنہ سے روایت ہے کہ ہم رسول اللہ صلی اللہ علیہ وسلم کی مجلس میں موجود تھے کہ آپ صلی اللہ علیہ وسلم ہنس پڑے اور دریافت فرمایا: ”کیا تم جانتے ہو کہ میں کس بات پر ہنس رہا ہوں؟“ ہم نے عرض کیا کہ اللہ اور اس کا رسول ہی بہتر جانتے ہیں، تو آپ صلی اللہ علیہ وسلم نے ارشاد فرمایا: ”بندے کی اپنے رب کے ساتھ اس گفتگو پر (ہنسی آئی) جب وہ قیامت کے دن عرض کرے گا «يَا رَبِّ، أَلَمْ تُجِرْنِي مِنَ الظُّلْمِ؟» ”اے میرے رب! کیا تو نے مجھے ظلم سے پناہ نہیں دی تھی؟“ اللہ عزوجل فرمائے گا: ”کیوں نہیں! (ضرور دی تھی)“، وہ بندہ عرض کرے گا: ”میں آج اپنے خلاف اپنے ہی کسی عضو کے علاوہ کسی اور کی گواہی ہرگز تسلیم نہیں کروں گا“، اللہ تعالیٰ فرمائے گا: ”آج تیرا اپنا نفس ہی تیرے خلاف گواہی دینے کے لیے کافی ہے اور کِراماً کاتبین (اعمال لکھنے والے معزز فرشتے) بھی بطور گواہ موجود ہیں“، پھر اس کے منہ پر مہر لگا دی جائے گی اور اس کے اعضاء و جوارح سے کہا جائے گا: ”بول پڑو“، چنانچہ وہ اس کے اعمال بیان کر دیں گے، اس کے بعد اسے کلام کرنے کی اجازت دی جائے گی تو وہ (اپنے ہی اعضاء کو برا بھلا کہتے ہوئے) کہے گا: «بُعْدًا لَكُنَّ وَسُحْقًا» ”تمہارے لیے دوری اور بربادی ہو، میں تمہاری ہی خاطر تو (اللہ سے) جھگڑ رہا تھا اور تمہارا ہی دفاع کر رہا تھا۔“ [مسند أبي يعلى الموصلي/مسند أنس بن مالك/حدیث: 3977]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم (مسلسل) چھ ماہ تک نمازِ فجر کے وقت سیدہ فاطمہ بنتِ رسول اللہ رضی اللہ عنہا کے گھر کے دروازے کے پاس سے گزرتے اور تین مرتبہ یہ ارشاد فرماتے: ”اے اہلِ بیت! نماز (کا وقت ہے)“ اور پھر یہ آیتِ مبارکہ تلاوت فرماتے: ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ ”اللہ تو یہی چاہتا ہے کہ اے (نبی کے) گھر والو! تم سے ہر قسم کی ناپاکی دور کر دے اور تمہیں خوب پاک و صاف کر دے“۔ [مسند أبي يعلى الموصلي/مسند أنس بن مالك/حدیث: 3978]

سیدنا انس رضی اللہ عنہ سے روایت ہے کہ ”نبی اکرم صلی اللہ علیہ وسلم (نمازِ فجر کے لیے جاتے ہوئے) چھ ماہ تک مسلسل سیدہ فاطمہ رضی اللہ عنہا کے گھر کے پاس سے گزرتے رہے“، پھر راوی نے اسی طرح (سابقہ حدیث کی مانند بقیہ مفہوم) بیان کیا۔ [مسند أبي يعلى الموصلي/مسند أنس بن مالك/حدیث: 3979]

سیدنا انس بن مالک رضی اللہ عنہ سے روایت ہے کہ شاہِ روم نے نبی کریم صلی اللہ علیہ وسلم کی خدمت میں سندس (باریک ریشم) کا بنا ہوا ایک جبہ بطور ہدیہ پیش کیا جسے آپ صلی اللہ علیہ وسلم نے زیبِ تن فرمایا، (سیدنا انس رضی اللہ عنہ فرماتے ہیں کہ) گویا میں آج بھی اس کی لمبی آستینوں کو لہراٹے ہوئے دیکھ رہا ہوں، یہ دیکھ کر صحابہ کرام رضی اللہ عنہم نے عرض کی: ”اے اللہ کے رسول صلی اللہ علیہ وسلم ! کیا یہ آپ پر آسمان سے نازل کیا گیا ہے؟“ تو رسول اللہ صلی اللہ علیہ وسلم نے ارشاد فرمایا: ”قسم ہے اس ذات کی جس کے قبضۂ قدرت میں میری جان ہے! جنت میں سیدنا سعد بن معاذ رضی اللہ عنہ کے رومالوں میں سے ایک رومال بھی اس سے کہیں بہتر ہے“، پھر آپ صلی اللہ علیہ وسلم نے وہ لباس سیدنا جعفر رضی اللہ عنہ کی طرف بھیج دیا اور انہوں نے اسے پہن لیا، تو آپ صلی اللہ علیہ وسلم نے (انہیں دیکھ کر) فرمایا: ”میں نے یہ تمہیں پہننے کے لیے نہیں بھیجا تھا“، انہوں نے عرض کی: (پھر) میں اس کا کیا کروں؟ آپ صلی اللہ علیہ وسلم نے فرمایا: ”اسے اپنے بھائی نجاشی کی طرف بھیج دو۔“ [مسند أبي يعلى الموصلي/مسند أنس بن مالك/حدیث: 3980]

سیدنا انس بن مالک رضی اللہ عنہ سے روایت ہے کہ جب سیدنا حسین رضی اللہ عنہ شہید کیے گئے تو ان کا سرِ مبارک عبیداللہ بن زیاد کے پاس لایا گیا۔ وہ اپنی چھڑی سے آپ رضی اللہ عنہ کے سامنے کے دانتوں کو چھیڑنے لگا اور کہنے لگا: ”ان کے دانت کتنے خوبصورت تھے!“ سیدنا انس رضی اللہ عنہ فرماتے ہیں: میں نے کہا: ”اللہ کی قسم! میں تمہیں ایسی بات ضرور سناؤں گا جو تمہیں ناگوار گزرے گی: میں نے رسول اللہ صلی اللہ علیہ وسلم کو آپ رضی اللہ عنہ کے منہ کے اسی مقام کو بوسہ دیتے دیکھا ہے جہاں تمہاری چھڑی لگ رہی ہے۔“ [مسند أبي يعلى الموصلي/مسند أنس بن مالك/حدیث: 3981]

سیدنا انس رضی اللہ عنہ سے روایت ہے کہ ”مسلمانوں کی باندیوں میں سے کوئی باندی (یا چھوٹی بچی) آتی اور رسول اللہ صلی اللہ علیہ وسلم کا ہاتھ پکڑ لیتی تو آپ صلی اللہ علیہ وسلم اپنا ہاتھ اس کے ہاتھ سے اس وقت تک جدا نہ فرماتے جب تک وہ آپ صلی اللہ علیہ وسلم کو (اپنی حاجت پوری کرنے کے لیے) جہاں چاہتی لے نہ جاتی۔“ [مسند أبي يعلى الموصلي/مسند أنس بن مالك/حدیث: 3982]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم فرمایا کرتے تھے: ”لشکر میں سیدنا ابوطلحہ رضی اللہ عنہ کی آواز ایک جماعت سے بہتر ہے۔“ اور سیدنا ابوطلحہ رضی اللہ عنہ جب نبی اکرم صلی اللہ علیہ وسلم کے ساتھ دشمن کا سامنا کرتے تو آپ صلی اللہ علیہ وسلم کے سامنے گھٹنے ٹیک کر کہتے: ”میری جان آپ کی جان پر قربان اور میرا چہرہ آپ کے چہرے کے لیے ڈھال ہے۔“ [مسند أبي يعلى الموصلي/مسند أنس بن مالك/حدیث: 3983]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”میں نبی کریم صلی اللہ علیہ وسلم کی ازواجِ مطہرات میں سے دو کے ولیمہ میں حاضر ہوا، تو آپ صلی اللہ علیہ وسلم نے ہمیں (اس ضیافت میں) نہ تو روٹی کھلائی اور نہ ہی گوشت“، علی بن زید رحمہ اللہ کہتے ہیں کہ میں نے پوچھا: پھر کیا کھلایا گیا؟ انہوں نے فرمایا: ”حیس (کھجور، گھی اور پنیر سے تیار کردہ ایک کھانا)“۔ [مسند أبي يعلى الموصلي/مسند أنس بن مالك/حدیث: 3984]