سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے کسی شخص کو اس کا عمل جنت میں داخل نہیں کرے گا۔“ صحابہ نے عرض کیا: ”آپ کو بھی نہیں؟“ فرمایا: ”مجھے بھی نہیں، الا یہ کہ میرا رب مجھے اپنی رحمت اور فضل میں ڈھانپ لے۔“ [مسند أبي يعلى الموصلي/مسند أنس بن مالك/حدیث: 3985]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے ”اسی کے مثل (سابقہ حدیث کی طرح)“ ارشاد فرمایا۔ [مسند أبي يعلى الموصلي/مسند أنس بن مالك/حدیث: 3986]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کیا میں تمہیں اہل جنت کے بارے میں نہ بتاؤں؟“ ہم نے عرض کیا: کیوں نہیں (ضرور بتائیے)، آپ صلی اللہ علیہ وسلم نے فرمایا: ”ہر وہ شخص جو (بظاہر) ناتواں ہو اور اسے (دنیاوی طور پر) کمزور سمجھا جاتا ہو، جو دو پرانی چادروں میں ملبوس ہو اور اسے کوئی اہمیت نہ دی جاتی ہو، (لیکن اللہ کے ہاں اس کا مقام یہ ہو کہ) اگر وہ اللہ کے بھروسے پر قسم کھا لے تو اللہ اس کی قسم کو ضرور سچا کر دکھائے، انہی میں سے سیدنا براء بن مالک رضی اللہ عنہ ہیں۔“ [مسند أبي يعلى الموصلي/مسند أنس بن مالك/حدیث: 3987]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”پانچ نمازوں کی مثال اس میٹھے اور گہرے بہتے دریا کی سی ہے جو تم میں سے کسی کے دروازے پر ہو اور وہ اس میں روزانہ پانچ مرتبہ غسل کرے؛ کیا اس کے بدن پر کچھ میل باقی رہے گا؟“ [مسند أبي يعلى الموصلي/مسند أنس بن مالك/حدیث: 3988]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں وہ پہلا شخص ہوں گا جو جنت کے دروازے کا حلقہ (کنڈہ) پکڑ کر اسے کھٹکھٹائے گا۔“ سیدنا انس رضی اللہ عنہ (اس منظر کی تصویر کشی کرتے ہوئے) فرماتے ہیں: ”گویا میں اس وقت آپ صلی اللہ علیہ وسلم کی طرف دیکھ رہا ہوں کہ آپ صلی اللہ علیہ وسلم (حلقہ ہلانے کی کیفیت بتانے کے لیے) اپنا دستِ مبارک ہلا رہے ہیں۔“ [مسند أبي يعلى الموصلي/مسند أنس بن مالك/حدیث: 3989]

سیدنا انس بن مالک رضی اللہ عنہ سے روایت ہے کہ غزوۂ احد کے دن جب دشمنوں نے رسول اللہ صلی اللہ علیہ وسلم کو سخت نرغے میں لے لیا اور اس وقت آپ صلی اللہ علیہ وسلم کے ہمراہ محض سات انصاری اور دو قریشی صحابہ موجود تھے، تو آپ صلی اللہ علیہ وسلم نے فرمایا: «مَنْ يَرُدُّهُمْ عَنَّا وَهُوَ رَفِيقِي فِي الْجَنَّةِ؟» ”کون ہے جو ان دشمنوں کو ہم سے دور ہٹائے گا اور وہ جنت میں میرا رفیق ہوگا؟“ اس پر انصار میں سے ایک صحابی کھڑے ہوئے اور قتال کرتے ہوئے شہید ہو گئے، پھر آپ صلی اللہ علیہ وسلم نے دوبارہ وہی بات ارشاد فرمائی تو ایک اور صحابی اٹھے اور وہ بھی شہید ہو گئے، اسی طرح یہ سلسلہ چلتا رہا یہاں تک کہ وہ ساتوں انصاری صحابہ شہید ہو گئے، تب رسول اللہ صلی اللہ علیہ وسلم نے ارشاد فرمایا: «مَا أَنْصَفْنَا أَصْحَابَنَا» ”ہم نے اپنے ان ساتھیوں کے ساتھ انصاف نہیں کیا۔“ [مسند أبي يعلى الموصلي/مسند أنس بن مالك/حدیث: 3990]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”لشکر میں سیدنا ابو طلحہ رضی اللہ عنہ کی آواز ایک جماعت (کی قوت) سے بہتر ہے۔“ [مسند أبي يعلى الموصلي/مسند أنس بن مالك/حدیث: 3991]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس رات مجھے معراج کرائی گئی، میرا گزر ایسے لوگوں پر ہوا جن کے ہونٹ آگ کی قینچیوں سے کترے جا رہے تھے، میں نے دریافت کیا: اے جبریل! یہ کون لوگ ہیں؟ انہوں نے عرض کیا: یہ آپ کی امت کے وہ خطیب ہیں جو لوگوں کو تو نیکی کی تلقین کرتے تھے لیکن اپنی جانوں کو فراموش کر دیتے تھے، حالانکہ وہ کتاب اللہ کی تلاوت بھی کرتے تھے، ﴿أَفَلَا يَعْقِلُونَ﴾ ”تو کیا وہ عقل سے کام نہیں لیتے؟“۔“ [مسند أبي يعلى الموصلي/مسند أنس بن مالك/حدیث: 3992]

سیدنا انس رضی اللہ عنہ سے روایت ہے کہ سیدنا ابو طلحہ رضی اللہ عنہ جب کسی لشکر میں (رسول اللہ صلی اللہ علیہ وسلم کے ہمراہ) ہوتے تو اپنا ترکش اپنے سامنے بکھیر دیتے اور عرض کرتے: «نَفْسِي لِنَفْسِكَ الْفِدَاءُ، وَوَجْهِي لِوَجْهِكَ الْوِقَاءُ» ”میری جان آپ کی جان پر فدا ہو اور میرا چہرہ آپ کے چہرے کے لیے ڈھال بنے“، سیدنا انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ارشاد فرمایا: ”لشکر میں ابو طلحہ کی آواز ایک جماعت سے بہتر ہے“۔ [مسند أبي يعلى الموصلي/مسند أنس بن مالك/حدیث: 3993]

سیدنا انس رضی اللہ عنہ سے روایت ہے کہ ”جب نبی کریم صلی اللہ علیہ وسلم کے پاس بئرِ معونہ کے شہدا کی شہادت کی خبر پہنچی تو آپ صلی اللہ علیہ وسلم نمازِ فجر کی آخری رکعت میں رکوع کے بعد (قنوتِ نازلہ کے لیے) کھڑے ہوئے اور تین مرتبہ یہ دعا فرمائی: «اللَّهُمَّ الْعَنْ رِعْلًا وَذَكْوَانَ، وَعُصَيَّةُ عَصَتِ اللَّهَ وَرَسُولَهُ» ”اے اللہ! رعل اور ذکوان پر لعنت فرما، اور قبیلہ عصیہ نے اللہ اور اس کے رسول کی نافرمانی کی ہے“، پھر آپ صلی اللہ علیہ وسلم تکبیر کہہ کر سجدے میں تشریف لے گئے؛ سیدنا انس رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو مسلسل تیس دن تک اسی طرح عمل کرتے ہوئے پایا۔“ [مسند أبي يعلى الموصلي/مسند أنس بن مالك/حدیث: 3994]