سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں تمہارا امام ہوں، لہٰذا رکوع اور سجود میں مجھ پر سبقت نہ لے جایا کرو، کیونکہ میں تمہیں اپنے سامنے سے بھی دیکھتا ہوں اور اپنے پیچھے سے بھی دیکھتا ہوں۔“ [مسند أبي يعلى الموصلي/مسند أنس بن مالك/حدیث: 3965]

مختار بن فلفل رحمہ اللہ سے روایت ہے کہ میں نے سیدنا انس بن مالک رضی اللہ عنہ سے مشروبات کے بارے میں دریافت کیا تو انہوں نے فرمایا کہ ”رسول اللہ صلی اللہ علیہ وسلم نے روغنِ قیر والے (کولتار لگے) برتنوں کے استعمال سے منع فرمایا“ اور ارشاد فرمایا کہ ”ہر نشہ آور چیز حرام ہے“، میں نے عرض کیا کہ آپ نے سچ فرمایا، نشہ تو حرام ہے، میں تو محض کھانے کے بعد ہضم کے لیے ایک دو گھونٹ پی لیتا ہوں، تو سیدنا انس بن مالک رضی اللہ عنہ نے مجھ سے فرمایا کہ ”جس چیز کی زیادہ مقدار نشہ پیدا کرے، اس کی تھوڑی مقدار بھی حرام ہے“، پھر انہوں نے فرمایا کہ ”جب شراب حرام کی گئی تو وہ انگور، کھجور، شہد، گندم، جو اور جوار سے تیار کی جاتی تھی، اور ان میں سے تم جس چیز کو بھی خمیر کر کے نشہ آور بنا دو تو وہ شراب ہی ہے“۔ [مسند أبي يعلى الموصلي/مسند أنس بن مالك/حدیث: 3966]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میں سب لوگوں میں پہلا وہ شخص ہوں گا جو جنت کے لیے شفاعت کرے گا، اور تمام انبیاء میں میرے متبعین کی تعداد سب سے زیادہ ہوگی۔“ [مسند أبي يعلى الموصلي/مسند أنس بن مالك/حدیث: 3967]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «أَنَا أَوَّلُ شَفِيعٍ فِي الْجَنَّةِ» ”جنت کے معاملے میں سب سے پہلا شفاعت کرنے والا میں ہی ہوں گا۔“ [مسند أبي يعلى الموصلي/مسند أنس بن مالك/حدیث: 3968]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا کہ ”اللہ تبارک و تعالیٰ نے فرمایا ہے: یقیناً آپ کی امت کے لوگ مسلسل (مختلف چیزوں کے بارے میں) یہ سوال کرتے رہیں گے کہ یہ کیا ہے؟ اور وہ کیا ہے؟ یہاں تک کہ وہ یہ کہہ دیں گے کہ یہ اللہ تو وہ ہے جس نے ہر چیز کو پیدا کیا، تو پھر اللہ کو کس نے پیدا کیا؟“ [مسند أبي يعلى الموصلي/مسند أنس بن مالك/حدیث: 3969]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”انبیاء میں سے کسی بھی نبی کی اتنی کثیر تعداد میں تصدیق نہیں کی گئی جتنی میری کی گئی ہے، اور یقیناً انبیاء میں کوئی نبی ایسا بھی ہے جس کی اس کی امت میں سے محض ایک ہی شخص نے تصدیق کی تھی۔“ [مسند أبي يعلى الموصلي/مسند أنس بن مالك/حدیث: 3970]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم سے ملکِ یمن کے ان مشروبات کے بارے میں دریافت کیا گیا جنہیں البتع اور المزر کہا جاتا ہے، تو آپ صلی اللہ علیہ وسلم نے ارشاد فرمایا: ”جو چیز نشہ آور ہو وہ حرام ہے“۔ [مسند أبي يعلى الموصلي/مسند أنس بن مالك/حدیث: 3971]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”کسی بھی نبی کی (ان کی امت کی طرف سے) اتنی تصدیق نہیں کی گئی جتنی میری کی گئی ہے، اور یقیناً انبیاء میں سے کوئی ایسا بھی ہو گا جو قیامت کے دن اس حال میں آئے گا کہ اس کی امت میں سے اس کے ساتھ صرف ایک ہی شخص ہو گا۔“ [مسند أبي يعلى الموصلي/مسند أنس بن مالك/حدیث: 3972]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”میں تمام لوگوں میں سب سے پہلا وہ شخص ہوں گا جو جنت کے لیے شفاعت کرے گا اور قیامت کے دن تمام انبیاء کی نسبت میرے پیروکاروں کی تعداد سب سے زیادہ ہوگی۔“ [مسند أبي يعلى الموصلي/مسند أنس بن مالك/حدیث: 3973]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اللہ کی راہ میں (سرحدوں پر) ایک دن پہرہ دینا تمہارے اپنے گھر والوں میں رہ کر ایک ہزار سال تک اس طرح عبادت کرنے سے بہتر ہے کہ اس کے دنوں میں روزے رکھے جائیں اور راتوں کو قیام کیا جائے، اور ایک سال تین سو ساٹھ دنوں کا ہوتا ہے، (نیز اجر و فضیلت کے اعتبار سے) ایک دن ایک ہزار سال کے برابر ہے“۔ [مسند أبي يعلى الموصلي/مسند أنس بن مالك/حدیث: 3974]