سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ” «طَلَبُ الْعِلْمِ فَرِيضَةٌ عَلَى كُلِّ مُسْلِمٍ» علم کا حصول ہر مسلمان پر فرض ہے۔“ [مسند أبي يعلى الموصلي/مسند أنس بن مالك/حدیث: 4035]

سیدنا انس رضی اللہ عنہ سے روایت ہے کہ انہوں نے فرمایا: ”کوئی دن ایسا نہیں آتا مگر اس کے بعد آنے والا دن (فتنوں کے اعتبار سے) اس سے بھی زیادہ برا ہوتا ہے، ہم نے یہ ارشاد تمہارے نبی صلی اللہ علیہ وسلم سے سنا ہے۔“ [مسند أبي يعلى الموصلي/مسند أنس بن مالك/حدیث: 4036]

زبیر بن عدی رحمہ اللہ بیان کرتے ہیں کہ ہم نے سیدنا انس رضی اللہ عنہ سے ان مظالم کی شکایت کی جو ہمیں حجاج بن یوسف کی طرف سے جھیلنے پڑ رہے تھے، تو آپ رضی اللہ عنہ نے فرمایا: ”صبر و استقامت اختیار کرو، کیونکہ تم پر کوئی بھی سال یا دن ایسا نہیں آئے گا مگر اس کے بعد آنے والا زمانہ اس سے بھی زیادہ شر والا ہوگا، یہاں تک کہ تم اپنے رب سے جا ملو“، میں نے یہ فرمان تمہارے نبی صلی اللہ علیہ وسلم سے خود سنا ہے۔ [مسند أبي يعلى الموصلي/مسند أنس بن مالك/حدیث: 4037]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”تم میں سے کوئی شخص اپنے بھائی کے سودے پر سودا نہ کرے اور نہ ہی کوئی اپنے بھائی کے پیغامِ نکاح پر اپنا پیغام بھیجے۔“ [مسند أبي يعلى الموصلي/مسند أنس بن مالك/حدیث: 4038]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے عشاء کی نماز سے قبل سونے اور اس کے بعد (بغیر کسی ضرورت کے) بات چیت اور محفل آرائی کرنے سے منع فرمایا ہے۔“ [مسند أبي يعلى الموصلي/مسند أنس بن مالك/حدیث: 4039]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”یہ امت اس وقت تک مسلسل خیر و بھلائی پر قائم رہے گی جب تک کہ اس کی کیفیت یہ رہے کہ جب وہ بات کرے تو سچ کہے، جب کوئی فیصلہ صادر کرے تو عدل و انصاف سے کام لے، اور جب اس سے رحم کی اپیل کی جائے تو وہ رحم و مروت کا معاملہ کرے۔“ [مسند أبي يعلى الموصلي/مسند أنس بن مالك/حدیث: 4040]

العلاء بن زیاد رحمہ اللہ سے روایت ہے کہ انہوں نے سیدنا انس رضی اللہ عنہ سے دریافت کیا: ”قیامت کے دن لوگ کس طرح اٹھائے جائیں گے؟“ تو آپ رضی اللہ عنہ نے فرمایا: ”لوگوں کو اس حال میں اٹھایا جائے گا کہ آسمان ان پر ہلکی بونداباندی کر رہا ہوگا۔“ [مسند أبي يعلى الموصلي/مسند أنس بن مالك/حدیث: 4041]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم (نماز سے فراغت کے بعد) اپنی دائیں جانب سے مڑا کرتے تھے۔“ [مسند أبي يعلى الموصلي/مسند أنس بن مالك/حدیث: 4042]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نماز سے فارغ ہو کر (مقتدیوں کی طرف متوجہ ہونے کے لیے) اپنی دائیں جانب سے مڑے تھے۔“ [مسند أبي يعلى الموصلي/مسند أنس بن مالك/حدیث: 4043]

سیدنا انس رضی اللہ عنہ سے روایت ہے کہ ”ہم سیدنا ابو طلحہ رضی اللہ عنہ کے پیچھے (ان کی سواری پر) ردیف بنے ہوئے تھے اور (قربت کا یہ عالم تھا کہ) ان کا گھٹنا رسول اللہ صلی اللہ علیہ وسلم کے مبارک گھٹنے سے مس ہو رہا تھا، اس وقت وہ دونوں مل کر بلند آواز سے حج اور عمرہ کا تلبیہ پکار رہے تھے۔“ [مسند أبي يعلى الموصلي/مسند أنس بن مالك/حدیث: 4044]