سیدنا انس بن مالک رضی اللہ عنہ سے روایت ہے کہ سیدہ ام سلیم رضی اللہ عنہا کسی سفر میں نبی کریم صلی اللہ علیہ وسلم کی ازواجِ مطہرات کے ہمراہ تھیں، پس نبی کریم صلی اللہ علیہ وسلم ان کے پاس تشریف لائے جبکہ ایک حدی خوان (اونٹ ہانکنے والا) انہیں لے کر جا رہا تھا تو آپ صلی اللہ علیہ وسلم نے ارشاد فرمایا: ”اے انجشہ! ذرا آہستہ، ان آبگینوں (نازک مزاج خواتین) کو لے کر نرمی سے چلو۔“ [مسند أبي يعلى الموصلي/مسند أنس بن مالك/حدیث: 4075]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس نے مجھ پر جھوٹ منسوب کیا، وہ اپنا ٹھکانا جہنم کی آگ میں بنا لے۔“ [مسند أبي يعلى الموصلي/مسند أنس بن مالك/حدیث: 4076]

راوی رحمہ اللہ بیان کرتے ہیں کہ انہوں نے ہمیں یہ حدیث اسی طرح دو مرتبہ بیان کی، پھر ایک مرتبہ اور (ان الفاظ کے ساتھ) بیان کی کہ رسول اللہ صلی اللہ علیہ وسلم نے فرمایا: ”جس نے جان بوجھ کر مجھ پر جھوٹ باندھا وہ اپنا ٹھکانا جہنم میں بنا لے۔“ [مسند أبي يعلى الموصلي/مسند أنس بن مالك/حدیث: 4077]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ”بُسر (گدری کھجوروں) اور رُطب (تازہ پکی ہوئی کھجوروں) کو ایک ساتھ ملانے سے منع فرمایا ہے۔“ [مسند أبي يعلى الموصلي/مسند أنس بن مالك/حدیث: 4078]

سیدنا انس بن مالک رضی اللہ عنہ سے روایت ہے کہ ”صحابہ کرام نبی کریم صلی اللہ علیہ وسلم کو اپنے کھجور کے باغات میں سے کچھ درخت بطور عطیہ و صدقہ پیش کیا کرتے تھے، یہاں تک کہ جب بنو قریظہ اور بنو نضیر کے علاقے فتح ہو گئے تو اس کے بعد رسول اللہ صلی اللہ علیہ وسلم نے وہ عطیات واپس کرنا شروع کر دیے۔ میرے گھر والوں نے مجھے حکم دیا کہ میں رسول اللہ صلی اللہ علیہ وسلم کی خدمت میں حاضر ہو کر ان درختوں کی واپسی کا مطالبہ کروں جو انہوں نے آپ صلی اللہ علیہ وسلم کی نذر کیے تھے، جبکہ رسول اللہ صلی اللہ علیہ وسلم وہ درخت پہلے ہی سیدہ ام ایمن رضی اللہ عنہا کو عطا فرما چکے تھے۔ جب میں نے نبی کریم صلی اللہ علیہ وسلم سے ان کے متعلق عرض کیا تو آپ صلی اللہ علیہ وسلم نے وہ مجھے عطا فرما دیے، اتنے میں سیدہ ام ایمن رضی اللہ عنہا تشریف لے آئیں اور انہوں نے میرے گلے میں کپڑا لپیٹ کر مجھے پکڑ لیا اور کہنے لگیں: «كَلَّا وَالَّذِي لَا إِلَهَ غَيْرُهُ» ”ہرگز نہیں! اس ذاتِ اقدس کی قسم جس کے سوا کوئی معبودِ برحق نہیں، آپ صلی اللہ علیہ وسلم یہ درخت تمہیں نہیں دیں گے جبکہ وہ مجھے عطا کر چکے ہیں۔“ اس پر نبی کریم صلی اللہ علیہ وسلم سیدہ ام ایمن رضی اللہ عنہا سے فرمانے لگے: ”تمہیں ان کے بدلے اتنا ملے گا، اور اتنا ملے گا“ راوی کا بیان ہے کہ میرا گمان ہے کہ آپ صلی اللہ علیہ وسلم فرماتے رہے لیکن وہ یہی کہتی رہیں: ”ہرگز نہیں، اللہ کی قسم!“ یہاں تک کہ رسول اللہ صلی اللہ علیہ وسلم نے انہیں ان درختوں کے بدلے میں ان کی مثل دس گنا زیادہ عطا فرما دیا۔“ [مسند أبي يعلى الموصلي/مسند أنس بن مالك/حدیث: 4079]

سیدنا انس رضی اللہ عنہ سے روایت ہے کہ لوگ اپنی زمین سے کھجور کے کچھ درخت نبی کریم صلی اللہ علیہ وسلم کے لیے (بطورِ ہبہ) مختص کر دیا کرتے تھے یہاں تک کہ جب بنو قریظہ اور بنو نضیر کے علاقے فتح ہو گئے تو اس کے بعد آپ صلی اللہ علیہ وسلم نے وہ عطیات واپس کرنا شروع کر دیے جو آپ صلی اللہ علیہ وسلم کو دیے گئے تھے، سیدنا انس رضی اللہ عنہ بیان کرتے ہیں کہ میرے گھر والوں نے مجھے کہا کہ میں نبی کریم صلی اللہ علیہ وسلم کی خدمت میں حاضر ہو کر وہ کھجور کے درخت یا ان کا کچھ حصہ مانگ لوں جو انہوں نے آپ صلی اللہ علیہ وسلم کو دیے تھے، جبکہ نبی اللہ صلی اللہ علیہ وسلم وہ درخت سیدہ امِ ایمن رضی اللہ عنہا کو عطا فرما چکے تھے، چنانچہ جب میں نبی کریم صلی اللہ علیہ وسلم کے پاس آیا تو آپ صلی اللہ علیہ وسلم نے وہ درخت مجھے عطا فرما دیے، تب سیدہ امِ ایمن رضی اللہ عنہا تشریف لائیں اور انہوں نے میری گردن میں کپڑا ڈال کر کہا: ”اللہ کی قسم! آپ صلی اللہ علیہ وسلم یہ درخت تمہیں ہرگز نہیں دیں گے جبکہ وہ یہ مجھے دے چکے ہیں“، تو نبی اللہ صلی اللہ علیہ وسلم نے فرمایا: ”اے امِ ایمن! اسے چھوڑ دو، تمہیں اس کے بدلے اتنا اور اتنا ملے گا“، وہ کہنے لگیں: ”ہرگز نہیں، «وَالَّذِي لَا إِلَهَ إِلَّا هُوَ» ”اس ذات کی قسم جس کے سوا کوئی معبودِ برحق نہیں!““، پس آپ صلی اللہ علیہ وسلم مسلسل فرماتے رہے کہ ”تمہیں اتنا ملے گا“ یہاں تک کہ آپ صلی اللہ علیہ وسلم نے انہیں ان درختوں کے بدلے ان سے دس گنا یا دس گنا کے قریب عطا فرما دیے۔ [مسند أبي يعلى الموصلي/مسند أنس بن مالك/حدیث: 4080]

سیدنا انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”میں نے جنت اور دوزخ کا مشاہدہ اسی دیوار کے سامنے کیا ہے، پس میں نے خیر اور شر کے معاملے میں آج کے دن جیسا منظر پہلے کبھی نہیں دیکھا۔“ [مسند أبي يعلى الموصلي/مسند أنس بن مالك/حدیث: 4081]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”ہم میں سے ہر شخص رسول اللہ صلی اللہ علیہ وسلم کے پیچھے نماز کے دوران اپنی کمر کو اس وقت تک بالکل سیدھا رکھتا تھا جب تک کہ نبی کریم صلی اللہ علیہ وسلم مکمل طور پر سجدے کی حالت میں نہ پہنچ جاتے“، یا (راوی کو شک ہے کہ) آپ رضی اللہ عنہ نے یہ الفاظ کہے: ”جب تک آپ صلی اللہ علیہ وسلم (کی پیشانی) زمین پر قرار نہ پکڑ لیتی، تب ہی وہ شخص سجدہ کرتا تھا۔“ اس حدیث کی سند میں سلیمان بن طرخان رحمہ اللہ اور سیدنا انس رضی اللہ عنہ کے مابین ایک راوی مبہم (نامعلوم) ہے۔ [مسند أبي يعلى الموصلي/مسند أنس بن مالك/حدیث: 4082]

سیدنا انس رضی اللہ عنہ سے روایت ہے کہ عرض کیا گیا: ”اے اللہ کے نبی! کاش آپ عبداللہ بن ابی کے پاس تشریف لے جاتے؟“ چنانچہ نبی اکرم صلی اللہ علیہ وسلم ایک گدھے پر سوار ہو کر روانہ ہوئے اور مسلمان بھی آپ کے ہمراہ پیدل چل پڑے، وہ ایک شوریدہ (کلراٹھی) زمین تھی، پس جب نبی اکرم صلی اللہ علیہ وسلم اس کے پاس پہنچے تو اس نے کہا: ”مجھ سے دور رہیے، اللہ کی قسم! آپ کے گدھے کی بو نے مجھے اذیت دی ہے۔“ اس پر انصار کے ایک شخص نے کہا: ”اللہ کی قسم! رسول اللہ صلی اللہ علیہ وسلم کا گدھا تجھ سے کہیں زیادہ خوشبو والا اور پاکیزہ ہے۔“ پھر عبداللہ کی خاطر اس کی قوم کا ایک شخص غصے میں آ گیا اور ان دونوں میں سے ہر ایک کی حمایت میں ان کے ساتھی بپھر گئے، چنانچہ ان کے درمیان کھجور کی ٹہنیوں، ہاتھوں اور جوتوں سے لڑائی ہوئی، پھر ہمیں یہ خبر پہنچی کہ انہی کے بارے میں یہ آیت ﴿وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا﴾ ”اور اگر مومنوں کی دو جماعتیں آپس میں لڑ پڑیں تو ان کے درمیان صلح کرا دیا کرو“ نازل ہوئی۔ [مسند أبي يعلى الموصلي/مسند أنس بن مالك/حدیث: 4083]

سیدنا انس بن مالک رضی اللہ عنہ سے روایت ہے کہ معراج کی رات نبی کریم صلی اللہ علیہ وسلم سیدنا موسیٰ علیہ السلام کے پاس سے گزرے جبکہ وہ اپنی قبر میں نماز پڑھ رہے تھے۔ نیز ذکر کیا گیا کہ آپ صلی اللہ علیہ وسلم کو براق پر سوار کیا گیا اور آپ صلی اللہ علیہ وسلم نے اسے باندھ دیا۔ پھر سیدنا ابوبکر صدیق رضی اللہ عنہ نے عرض کیا: ”اس سواری کی صفت میرے سامنے بیان فرمائیے۔“ رسول اللہ صلی اللہ علیہ وسلم نے اس کی ایک خاص صفت بیان فرمائی تو سیدنا ابوبکر رضی اللہ عنہ نے عرض کیا: ”میں گواہی دیتا ہوں کہ بے شک آپ اللہ کے رسول ہیں۔“ سیدنا ابوبکر رضی اللہ عنہ اس سواری کو پہلے دیکھ چکے تھے۔ [مسند أبي يعلى الموصلي/مسند أنس بن مالك/حدیث: 4084]