سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میرا گزر (سیدنا) موسیٰ علیہ السلام کے پاس سے ہوا اور وہ اپنی قبر میں نماز ادا فرما رہے تھے۔“ [مسند أبي يعلى الموصلي/مسند أنس بن مالك/حدیث: 4085]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جس نے (جمعہ کے دن) وضو کیا تو اس نے (سنت و رخصت پر) عمل کیا اور یہ بہت اچھا ہے، اور جس نے غسل کیا تو غسل کرنا زیادہ فضیلت والا ہے“، یعنی اس سے مراد جمعہ کا دن ہے۔ [مسند أبي يعلى الموصلي/مسند أنس بن مالك/حدیث: 4086]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”اور عصر (کی نماز) سے لے کر سورج غروب ہونے تک (کا وقت اور اس میں اللہ کا ذکر کرنا) مجھے اس بات سے زیادہ محبوب ہے کہ میں اولادِ اسماعیل میں سے آٹھ ایسے غلاموں کو آزاد کروں جو سب کے سب مسلمان ہوں،“ یعنی (آپ رضی اللہ عنہ کی مراد یہ تھی کہ) اللہ تعالیٰ کا ذکر کرنا (ان کے نزدیک اس عظیم عمل سے بھی زیادہ فضیلت رکھتا ہے)۔ [مسند أبي يعلى الموصلي/مسند أنس بن مالك/حدیث: 4087]

یزید الرقاشی رحمہ اللہ بیان کرتے ہیں کہ سیدنا انس رضی اللہ عنہ جب ہمیں یہ حدیث سناتے تو اکثر ہم سے فرمایا کرتے تھے کہ ”اللہ کی قسم! یہ وہ طریقہ نہیں ہے جو تم اور تمہارے ساتھیوں نے اپنا رکھا ہے“، آپ کی مراد یہ تھی کہ تم میں سے کوئی ایک شخص بیٹھ جاتا ہے اور تم سب اس کے گرد جمع ہو جاتے ہو تو وہ خطبہ دینے لگتا ہے، (آپ رضی اللہ عنہ نے فرمایا:) ”صحابہ کرام رضی اللہ عنہم کا معمول تو یہ تھا کہ جب وہ صبح کی نماز ادا کر لیتے تو حلقوں کی صورت میں بیٹھ جاتے، وہ قرآنِ کریم کی تلاوت کرتے اور فرائض و سنن کی تعلیم حاصل کیا کرتے تھے۔“ [مسند أبي يعلى الموصلي/مسند أنس بن مالك/حدیث: 4088]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میرے پاس جبریلِ امین ایک سفید آئینہ لے کر آئے جس میں ایک سیاہ نکتہ تھا، میں نے دریافت کیا کہ یہ کیا ہے؟ تو انہوں نے عرض کیا کہ یہ جمعہ کا دن ہے اور اس میں ایک (مبارک) گھڑی ہے“۔ [مسند أبي يعلى الموصلي/مسند أنس بن مالك/حدیث: 4089]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”بچے اہلِ جنت کے خادم ہوں گے“۔ [مسند أبي يعلى الموصلي/مسند أنس بن مالك/حدیث: 4090]

سیدنا انس رضی اللہ عنہ سے روایت ہے کہ انہوں نے بیان فرمایا: ”ہم اللہ کے نبی صلی اللہ علیہ وسلم کے ہمراہ بیٹھے ہوئے تھے، غالباً آپ رضی اللہ عنہ نے (ہماری تعداد) ساٹھ افراد بتائی، چنانچہ آپ صلی اللہ علیہ وسلم ہمیں کوئی حدیث ارشاد فرماتے اور پھر اپنی کسی ضرورت کے لیے (گھر) تشریف لے جاتے، تو ہم اس (ارشادِ نبوی) کا آپس میں ایک دوسرے کے ساتھ تکرار اور مراجعہ کرتے، پہلے ایک پھر دوسرا (اسے بیان کرتا)، چنانچہ جب ہم مجلس سے اٹھتے تو وہ علم ایسا پختہ ہو چکا ہوتا تھا گویا ہمارے دلوں میں بو دیا گیا ہو۔“ [مسند أبي يعلى الموصلي/مسند أنس بن مالك/حدیث: 4091]

سیدنا انس بن مالک رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا کہ ”مجھ سے پہلے گزر جانے والے میرے بھائی انبیاء کی تعداد آٹھ ہزار تھی، پھر ان کے بعد عیسیٰ ابن مریم علیہ السلام تشریف لائے اور پھر ان کے بعد میں (مبعوث ہوا) ہوں۔“ [مسند أبي يعلى الموصلي/مسند أنس بن مالك/حدیث: 4092]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس نے اپنے کسی بھائی کی اس کی ضرورت میں مدد کی اور اس کے ساتھ لطف و مہربانی کا معاملہ کیا، تو اللہ تعالیٰ کے ذمۂ کرم پر یہ حق ثابت ہو گیا کہ وہ اسے جنت کے خدمت گاروں میں سے خادم عطا فرمائے۔“ [مسند أبي يعلى الموصلي/مسند أنس بن مالك/حدیث: 4093]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”عاشورہ کے دن بنی اسرائیل کے لیے سمندر کو شق کیا گیا تھا۔“ [مسند أبي يعلى الموصلي/مسند أنس بن مالك/حدیث: 4094]