سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میری شفاعت میری امت کے ان لوگوں کے لیے ہے جنہوں نے کبیرہ گناہوں کا ارتکاب کیا ہو گا۔“ [مسند أبي يعلى الموصلي/مسند أنس بن مالك/حدیث: 4105]

سیدنا انس رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”بے شک اللہ تعالیٰ میدانِ عرفات والوں پر خاص فضل فرماتا ہے اور فرشتوں کے سامنے ان پر فخر کرتے ہوئے فرماتا ہے: اے میرے فرشتو! میرے ان بندوں کو دیکھو جو پراگندہ حال اور گرد و غبار میں اٹے ہوئے دور دراز کے دشوار گزار راستوں سے کوچ کر کے میری طرف آئے ہیں، میں تمہیں گواہ بناتا ہوں کہ میں نے ان کی دعا قبول کر لی، ان کی آرزوؤں کے حق میں سفارش منظور کر لی، ان کے بدکاروں کو ان کے نیکوکاروں کی خاطر بخش دیا اور ان کے نیکوکاروں کو وہ سب کچھ عطا کر دیا جو انہوں نے مجھ سے مانگا، سوائے ان باہمی حقوق کے جو ان کے آپس میں تصفیہ طلب ہیں۔ پھر جب یہ لوگ مزدلفہ کی طرف روانہ ہوتے ہیں اور وہاں قیام کر کے دوبارہ اللہ کے حضور رغبت اور دعا کے ساتھ رجوع کرتے ہیں، تو اللہ تعالیٰ فرماتا ہے: اے میرے فرشتو! میرے بندوں نے یہاں وقوف کیا اور دوبارہ مجھ سے رغبت اور طلب کا اظہار کیا ہے، پس میں تمہیں گواہ بناتا ہوں کہ میں نے ان کی دعا قبول کر لی، ان کی التجاؤں کو شرفِ قبولیت بخشا، ان کے خطاکاروں کو ان کے نیک لوگوں کے صدقے معاف کر دیا، ان کے نیکوکاروں کو ان کا مانگا ہوا سب کچھ عطا کر دیا اور ان کے وہ باہمی حقوق و مظالم بھی میں نے اپنے ذمے لے لیے جو ان کے درمیان باقی رہ گئے تھے۔“ [مسند أبي يعلى الموصلي/مسند أنس بن مالك/حدیث: 4106]

سیدنا انس رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: «مَنْ صَلَّى الْغَدَاةَ فَهُوَ فِي ذِمَّةِ اللَّهِ، فَإِيَّاكُمْ أَنْ يَطْلُبَكُمُ اللَّهُ بِشَيْءٍ مِنْ ذِمَّتِهِ» ”جس شخص نے صبح کی نماز (فجر) ادا کی وہ اللہ کی حفاظت اور اس کے ذمہ میں ہے، پس تم اس بات سے بچو کہ کہیں اللہ تعالیٰ تم سے اپنی دی ہوئی پناہ و ذمہ داری کے حوالے سے کسی چیز کا مطالبہ نہ کرے (یعنی اس کے ذمہ میں آنے والے کسی شخص کو ایذا پہنچا کر تم اللہ کی بازپرس اور اس کی گرفت کی زد میں نہ آ جاؤ)۔“ [مسند أبي يعلى الموصلي/مسند أنس بن مالك/حدیث: 4107]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اے لوگو! یقیناً تمہارا رب نہایت حیا والا اور کرم فرمانے والا ہے، وہ اس بات سے حیا فرماتا ہے کہ تم میں سے کوئی شخص اپنے دونوں ہاتھ اس کی بارگاہ میں پھیلائے اور وہ انہیں خالی اور نامراد واپس لوٹا دے۔“ [مسند أبي يعلى الموصلي/مسند أنس بن مالك/حدیث: 4108]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب مؤذن اذان دیتا ہے تو آسمان کے دروازے کھول دیے جاتے ہیں، چنانچہ اذان اور اقامت کے درمیانی وقفے میں کی جانے والی دعا رد نہیں کی جاتی۔“ [مسند أبي يعلى الموصلي/مسند أنس بن مالك/حدیث: 4109]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”زمین کا کوئی بھی ایسا قطعہ نہیں ہے جس پر نماز یا ذکرِ الٰہی کے ذریعے اللہ سبحانہ و تعالیٰ کو یاد کیا جائے مگر یہ کہ وہ زمین کا ٹکڑا ساتوں زمینوں کی گہرائی تک اس ذکر کی وجہ سے خوشی و مسرت محسوس کرتا ہے، اور اپنے ارد گرد کے دیگر مقامات پر فخر کرتا ہے، اور جو بھی بندہ زمین کے کسی چٹیل میدان میں نماز کی غرض سے کھڑا ہوتا ہے تو زمین اس کے لیے خود کو مزین و آراستہ کر لیتی ہے۔“ [مسند أبي يعلى الموصلي/مسند أنس بن مالك/حدیث: 4110]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے یومِ نحر (قربانی کے دن) کے بعد ایامِ تشریق کے تینوں دن روزہ رکھنے سے منع فرمایا ہے۔“ [مسند أبي يعلى الموصلي/مسند أنس بن مالك/حدیث: 4111]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے عبداللہ بن ابی کی نمازِ جنازہ پڑھانے کا ارادہ فرمایا، تو حضرت جبریل علیہ السلام نے آپ صلی اللہ علیہ وسلم کا لباسِ مبارک تھام لیا اور (اللہ تعالیٰ کا یہ حکم سنایا): ﴿وَلَا تُصَلِّ عَلَى أَحَدٍ مِنْهُمْ مَاتَ أَبَدًا وَلَا تَقُمْ عَلَى قَبْرِهِ﴾ یعنی ”اور ان (منافقین) میں سے جو کوئی مر جائے آپ اس پر کبھی بھی نماز نہ پڑھیں اور نہ ہی اس کی قبر پر کھڑے ہوں“۔“ [مسند أبي يعلى الموصلي/مسند أنس بن مالك/حدیث: 4112]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «مَنْ مَاتَ يَوْمَ الْجُمُعَةِ وُقِيَ عَذَابَ الْقَبْرِ» ”جو شخص جمعہ کے دن وفات پا جائے، اسے قبر کے عذاب سے محفوظ کر لیا جاتا ہے“۔ [مسند أبي يعلى الموصلي/مسند أنس بن مالك/حدیث: 4113]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص دن میں دس مرتبہ شیطان کے شر سے اللہ تعالیٰ کی پناہ طلب کرے تو اللہ تعالیٰ اس کی نگرانی پر ایک فرشتہ مامور فرما دیتا ہے جو شیاطین کو اس سے دور رکھتا ہے۔“ [مسند أبي يعلى الموصلي/مسند أنس بن مالك/حدیث: 4114]