سیدنا انس بن مالک رضی اللہ عنہ سے روایت ہے کہ سیدنا ابو طلحہ رضی اللہ عنہ نے مجھے رسول اللہ صلی اللہ علیہ وسلم کو دعوت دینے کے لیے بھیجا جبکہ انہوں نے آپ صلی اللہ علیہ وسلم کے لیے کچھ کھانا تیار کر رکھا تھا، سیدنا انس رضی اللہ عنہ بیان کرتے ہیں کہ میں جب حاضر ہوا تو رسول اللہ صلی اللہ علیہ وسلم لوگوں کے ہمراہ تشریف فرما تھے، آپ صلی اللہ علیہ وسلم نے میری طرف دیکھا تو مجھے حیا آ گئی، پھر میں نے عرض کیا کہ ”سیدنا ابو طلحہ (رضی اللہ عنہ) کی دعوت قبول فرمائیں“، تو آپ صلی اللہ علیہ وسلم نے لوگوں سے فرمایا: ”اٹھ کھڑے ہو“، (یہ دیکھ کر) سیدنا ابو طلحہ رضی اللہ عنہ نے عرض کیا کہ ”اے اللہ کے رسول صلی اللہ علیہ وسلم ! میں نے تو محض آپ کے لیے ہی کچھ (کھانا) تیار کیا تھا“، تب رسول اللہ صلی اللہ علیہ وسلم نے اس کھانے پر اپنا دستِ مبارک پھیرا اور اس میں برکت کی دعا فرمائی، پھر آپ صلی اللہ علیہ وسلم نے فرمایا: ”میرے صحابہ میں سے دس آدمیوں کو اندر بلاؤ“، اور ان سے فرمایا: ”تم سب کھاؤ“، پھر آپ صلی اللہ علیہ وسلم نے اپنی انگلیوں کے درمیان سے کچھ (کھانا) نکالا تو ان سب نے سیر ہو کر کھانا کھایا اور باہر تشریف لے گئے، پھر آپ صلی اللہ علیہ وسلم نے فرمایا: ”مزید دس افراد کو اندر لے آؤ“، تو انہوں نے بھی سیر ہو کر کھانا کھایا اور باہر تشریف لے گئے، اسی طرح آپ صلی اللہ علیہ وسلم مسلسل دس دس آدمیوں کو اندر بلاتے اور وہ کھا کر باہر تشریف لے جاتے رہے یہاں تک کہ ان میں سے کوئی ایک شخص بھی ایسا نہ بچا جو اندر داخل ہو کر سیر ہو کر کھا نہ چکا ہو، سیدنا انس رضی اللہ عنہ کہتے ہیں کہ پھر آپ صلی اللہ علیہ وسلم نے اس کھانے کو درست کیا تو وہ اتنا ہی تھا جتنا اس وقت تھا جب انہوں نے اس میں سے کھانا شروع کیا تھا۔ [مسند أبي يعلى الموصلي/مسند أنس بن مالك/حدیث: 4145]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم کے دو آزاد کردہ غلام تھے، ایک حبشی اور دوسرا نبطی، ان دونوں نے ایک دوسرے کو برا بھلا کہا جبکہ نبی کریم صلی اللہ علیہ وسلم ان کی بات سن رہے تھے، چنانچہ ان میں سے ایک نے اپنے ساتھی سے کہا: ”اے حبشی!“ تو دوسرے نے (جواباً) کہا: ”اے نبطی!“ اس پر نبی کریم صلی اللہ علیہ وسلم نے ارشاد فرمایا: ”تم یہ بات نہ کہو؛ حقیقت تو یہ ہے کہ تم دونوں محمد صلی اللہ علیہ وسلم کے اصحاب میں سے دو مرد ہو۔“ [مسند أبي يعلى الموصلي/مسند أنس بن مالك/حدیث: 4146]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «لَا يُرَدُّ الدُّعَاءُ بَيْنَ الْأَذَانِ وَالْإِقَامَةِ» ”اذان اور اقامت کے درمیانی وقفے میں کی جانے والی دعا رد نہیں کی جاتی۔“ [مسند أبي يعلى الموصلي/مسند أنس بن مالك/حدیث: 4147]

شعبہ رحمہ اللہ بیان کرتے ہیں کہ میں نے معاویہ بن قرہ رحمہ اللہ سے دریافت کیا کہ کیا آپ نے سیدنا انس رضی اللہ عنہ کو یہ بیان کرتے ہوئے سنا ہے کہ نبی کریم صلی اللہ علیہ وسلم نے ارشاد فرمایا: ”کسی قوم کی بہن کا بیٹا (بھانجا) انہی میں سے (شمار) ہوتا ہے“؟ انہوں نے جواب دیا: ”جی ہاں“۔ [مسند أبي يعلى الموصلي/مسند أنس بن مالك/حدیث: 4148]

سیدنا انس رضی اللہ عنہ سے روایت ہے کہ انہوں نے (اپنے دور میں رونما ہونے والی تبدیلیوں کو دیکھ کر) فرمایا: ”میں لوگوں کے (دینی و سماجی) معاملات میں سے اب کوئی چیز (اپنی اصل حالت میں) نہیں پہچانتا سوائے قبلہ کے۔“ [مسند أبي يعلى الموصلي/مسند أنس بن مالك/حدیث: 4149]

سیدنا انس بن مالک رضی اللہ عنہ سے روایت ہے کہ انہوں نے فرمایا: ”حائضہ عورت (خون بند ہونے کے لیے) پانچ، سات، آٹھ، نو اور دس دن تک انتظار کرے، پھر جب دس دن کی مدت گزر جائے تو وہ مستحاضہ (استحاضہ کی مریضہ) شمار ہو گی۔“ [مسند أبي يعلى الموصلي/مسند أنس بن مالك/حدیث: 4150]

سیدنا انس رضی اللہ عنہ سے روایت ہے کہ سیدنا ابوطلحہ رضی اللہ عنہ نے رسول اللہ صلی اللہ علیہ وسلم کو بھوک کی شدت سے نڈھال دیکھا، تو وہ سیدہ ام سلیم رضی اللہ عنہا کے پاس آئے اور کہا: ”میں نے رسول اللہ صلی اللہ علیہ وسلم کو بھوک کی وجہ سے کمزور پایا ہے، کیا تمہارے پاس کچھ کھانے کو ہے؟“ انہوں نے کہا: ”ہمارے پاس جو کے تقریباً ایک مد آٹے کے سوا کچھ نہیں ہے۔“ انہوں نے کہا: ”تم اسے گوندھ کر تیار کر لو، شاید ہم رسول اللہ صلی اللہ علیہ وسلم کو دعوت دیں اور وہ ہمارے ہاں کھانا تناول فرمائیں۔“ سیدنا انس رضی اللہ عنہ بیان کرتے ہیں کہ انہوں نے آٹا گوندھا اور اس کی ایک ٹکیہ (روٹی) تیار کی۔ پھر سیدنا ابوطلحہ رضی اللہ عنہ نے مجھ سے کہا: ”نبی صلی اللہ علیہ وسلم کو بلا لاؤ۔“ چنانچہ میں نبی صلی اللہ علیہ وسلم کی خدمت میں حاضر ہوا تو آپ کے ساتھ بہت سے لوگ تشریف فرما تھے (مبارک بن فضالہ رحمہ اللہ کہتے ہیں کہ میرا خیال ہے انہوں نے اسّی سے کچھ زائد افراد کہے تھے)۔ میں نے عرض کیا: ”اے اللہ کے رسول! سیدنا ابوطلحہ رضی اللہ عنہ آپ کو دعوت دے رہے ہیں۔“ آپ صلی اللہ علیہ وسلم نے اپنے صحابہ سے فرمایا: ”سیدنا ابوطلحہ کی دعوت پر چلو۔“ میں تیزی سے واپس آیا اور انہیں بتایا کہ آپ صلی اللہ علیہ وسلم اپنے اصحاب کے ساتھ تشریف لا رہے ہیں۔ بکر رحمہ اللہ کہتے ہیں کہ (یہ سن کر) انہوں نے مجھے پریشانی میں دبایا، جبکہ ثابت بنانی رحمہ اللہ کہتے ہیں کہ سیدنا ابوطلحہ رضی اللہ عنہ نے کہا: ”رسول اللہ صلی اللہ علیہ وسلم میرے گھر کی صورتحال (کہ وہاں کتنا کھانا ہے) مجھ سے زیادہ بہتر جانتے ہیں۔“ اور ان دونوں نے سیدنا انس رضی اللہ عنہ کے حوالے سے بیان کیا کہ پھر سیدنا ابوطلحہ رضی اللہ عنہ نے آپ صلی اللہ علیہ وسلم کا استقبال کیا اور عرض کیا: ”اے اللہ کے رسول! ہمارے پاس اس ایک ٹکیہ کے سوا کچھ نہیں ہے، میں نے آپ کو بھوک کی حالت میں دیکھا تو سیدہ ام سلیم رضی اللہ عنہا کو حکم دیا اور انہوں نے آپ کے لیے یہ ایک روٹی تیار کی۔“ آپ صلی اللہ علیہ وسلم نے وہ روٹی اور ایک بڑا پیالہ منگوایا اور اسے اس میں رکھ دیا، پھر پوچھا: ”کیا کچھ گھی وغیرہ ہے؟“ سیدنا ابوطلحہ رضی اللہ عنہ نے کہا: ”گھی کے چمڑے کے برتن میں کچھ گھی باقی تھا۔“ وہ اسے لے آئے، تو نبی صلی اللہ علیہ وسلم اور سیدنا ابوطلحہ رضی اللہ عنہ اسے نچوڑنے لگے یہاں تک کہ اس میں سے کچھ (گھی) نکل آیا۔ پھر نبی صلی اللہ علیہ وسلم نے اپنی شہادت کی انگلی اس پر پھیری اور روٹی پر بھی پھیری تو وہ پھول گئی، پھر آپ صلی اللہ علیہ وسلم نے فرمایا: «بِسْمِ اللَّهِ» ”اللہ کے نام کے ساتھ“، تو وہ روٹی مزید پھول گئی، آپ صلی اللہ علیہ وسلم مسلسل ایسا ہی کرتے رہے اور وہ روٹی پھولتی رہی یہاں تک کہ میں نے دیکھا کہ وہ پیالے میں لبالب بھر گئی ہے۔ پھر آپ صلی اللہ علیہ وسلم نے فرمایا: ”میرے صحابہ میں سے دس آدمیوں کو بلاؤ۔“ میں نے ان کے لیے دس آدمیوں کو بلایا، تو نبی صلی اللہ علیہ وسلم نے اپنا دستِ مبارک روٹی کے درمیان میں رکھا اور فرمایا: «كُلُوا بِسْمِ اللَّهِ» ”اللہ کا نام لے کر کھاؤ“، چنانچہ انہوں نے روٹی کے کناروں سے کھانا شروع کیا یہاں تک کہ وہ سب سیر ہو گئے۔ پھر آپ صلی اللہ علیہ وسلم نے فرمایا: ”مزید دس کو بلاؤ۔“ میں نے دس اور آدمیوں کو بلایا تو آپ صلی اللہ علیہ وسلم نے فرمایا: ”اللہ کا نام لے کر کھاؤ۔“ انہوں نے بھی روٹی کے کناروں سے کھایا یہاں تک کہ وہ بھی سیر ہو گئے۔ آپ صلی اللہ علیہ وسلم اسی طرح دس دس کر کے بلاتے رہے اور وہ سب اس روٹی سے کھاتے رہے یہاں تک کہ سب سیر ہو گئے، اور روٹی کا درمیانی حصہ جہاں رسول اللہ صلی اللہ علیہ وسلم نے اپنا دستِ مبارک رکھا تھا، ویسے کا ویسا ہی برقرار رہا۔ [مسند أبي يعلى الموصلي/مسند أنس بن مالك/حدیث: 4151]

سیدنا انس رضی اللہ عنہ سے روایت ہے کہ انہوں نے فرمایا: ”ہم رسول اللہ صلی اللہ علیہ وسلم کے ساتھ سخت گرمی کے موسم میں نماز ادا کیا کرتے تھے، پس جب ہم میں سے کوئی (زمینی تپش کی وجہ سے) اپنی پیشانی کو زمین پر پوری طرح ٹکا کر رکھنے کی استطاعت نہ پاتا تو وہ اپنا کپڑا پھیلا دیتا اور اسی پر سجدہ کر لیتا تھا۔“ [مسند أبي يعلى الموصلي/مسند أنس بن مالك/حدیث: 4152]

سیدنا انس رضی اللہ عنہ سے روایت ہے کہ انہوں نے بیان فرمایا: ”ہم جب نبی کریم صلی اللہ علیہ وسلم کے ہمراہ نماز ادا کرتے تھے تو گرمی کی شدت (اور زمین کی تپش) کے ڈر سے اپنے کپڑوں پر سجدہ کر لیا کرتے تھے۔“ [مسند أبي يعلى الموصلي/مسند أنس بن مالك/حدیث: 4153]

سیدنا انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے حج اور عمرہ دونوں کا ایک ساتھ احرام باندھا اور تلبیہ پکارا“، بکر بن عبداللہ رحمہ اللہ بیان کرتے ہیں کہ میں نے اس بات کا تذکرہ سیدنا عبداللہ بن عمر رضی اللہ عنہما سے کیا تو انہوں نے فرمایا کہ ”آپ صلی اللہ علیہ وسلم نے (صرف) حج کا تلبیہ پکارا تھا“، پھر جب میں نے سیدنا عبداللہ بن عمر رضی اللہ عنہما کا یہ قول سیدنا انس بن مالک رضی اللہ عنہ کو بتایا تو انہوں نے (اظہارِ تعجب کے طور پر) فرمایا کہ ”تم لوگ ہمیں محض بچے ہی سمجھتے ہو“۔ [مسند أبي يعلى الموصلي/مسند أنس بن مالك/حدیث: 4154]