سیدنا عبداللہ بن مسعود رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”جو لوگوں پر رحم نہیں کرتا، اللہ اس پر رحم نہیں فرماتا۔“
امام طبرانی رحمہ اللہ فرماتے ہیں: ”اس حدیث کو زید بن ابی انیسہ سے ابو شیبہ کے سوا کسی نے روایت نہیں کیا، اور اس میں اسماعیل بن عیاش منفرد ہیں۔“ [المعجم الأوسط/باب العين/حدیث: 3721]

سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”ہمارے لیے بری مثال زیبا نہیں، اپنے ہبہ (عطیہ) کو واپس لینے والا اس شخص کی طرح ہے جو اپنی قے کو چاٹ لے۔“ [المعجم الأوسط/باب العين/حدیث: 3722]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم ہمیں کسی کام میں استخارہ کرنا اسی طرح سکھاتے تھے جیسے ہم میں سے کسی کو قرآن کی کوئی سورت سکھاتے تھے: «اللَّهُمَّ إِنِّي أَسْتَخِيرُكَ بِعِلْمِكَ، وَأَسْتَقْدِرُكَ بِقُدْرَتِكَ وَأَسْأَلُكَ مِنْ فَضْلِكَ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوبِ، اللَّهُمَّ إِنْ كَانَ فِي هَذَا الْأَمْرِ خِيرَةٌ فِي دِينِي وَدُنْيَايَ وَعَاقِبَةِ أَمْرِي فَقَدِّرْهُ لِي، وَإِنْ كَانَ غَيْرَ ذَلِكَ خَيْرٌ لِي فَسَهِّلْ لِيَ الْخَيْرَ حَيْثُ كَانَ، وَاصْرِفْ عَنِّي السُّوءَ وَرَضِّنِي بِقَضَائِكَ» ”اے اللہ! میں تیرے علم کے واسطے سے تجھ سے خیر مانگتا ہوں، تیری قدرت کے واسطے سے تجھ سے قدرت طلب کرتا ہوں اور تیرے فضل سے سوال کرتا ہوں، کیونکہ تو قدرت رکھتا ہے اور میں قدرت نہیں رکھتا، تو جانتا ہے اور میں نہیں جانتا، اور تو غیبوں کو خوب جاننے والا ہے۔ اے اللہ! اگر اس کام میں میرے دین، میری دنیا اور میرے انجامِ کار کے اعتبار سے بھلائی ہے تو اسے میرے لیے مقدر فرما دے، اور اگر اس کے سوا کچھ میرے لیے بہتر ہے تو بھلائی کو میرے لیے آسان فرما دے جہاں کہیں بھی ہو، اور برائی کو مجھ سے پھیر دے اور مجھے اپنے فیصلے پر راضی رکھ۔“
امام طبرانی رحمہ اللہ فرماتے ہیں: ”اس حدیث کو امام ابوحنیفہ رحمہ اللہ سے اسماعیل بن عیاش رحمہ اللہ کے سوا کسی نے روایت نہیں کیا۔“ [المعجم الأوسط/باب العين/حدیث: 3723]

سیدنا عبداللہ بن مسعود رضی اللہ عنہ نے نبی کریم صلی اللہ علیہ وسلم سے استخارہ کے بارے میں اسی کے مثل روایت کیا ہے۔
امام طبرانی رحمہ اللہ فرماتے ہیں: ”اس حدیث کو حکم رحمہ اللہ سے مسعودی رحمہ اللہ کے سوا کسی نے روایت نہیں کیا۔“ [المعجم الأوسط/باب العين/حدیث: 3724]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے مدینہ میں کتوں کو مار ڈالنے کا حکم دیا، تو سیدنا ابن ام مکتوم رضی اللہ عنہ آپ صلی اللہ علیہ وسلم کے پاس آئے اور عرض کیا: ”اے اللہ کے رسول! میں نابینا آدمی ہوں۔“ تو آپ صلی اللہ علیہ وسلم نے چند دن انہیں رخصت دی، پھر ان کے کتے کے بارے میں حکم دیا تو اسے مار دیا گیا۔ [المعجم الأوسط/باب العين/حدیث: 3725]

سیدنا جابر رضی اللہ عنہما بیان کرتے ہیں کہ سیدنا ابن ام مکتوم رضی اللہ عنہ نبی کریم صلی اللہ علیہ وسلم کی خدمت میں حاضر ہوئے اور عرض کیا: ”اے اللہ کے رسول! میں نابینا ہوں، میرا گھر بھی دور ہے اور میں اذان کی آواز سنتا ہوں (تو کیا مجھے مسجد میں آنا ضروری ہے؟)۔“ آپ صلی اللہ علیہ وسلم نے فرمایا: ”اگر تم اذان سنو تو (مسجد) آؤ، خواہ گھسٹ کر ہی آنا پڑے۔“ [المعجم الأوسط/باب العين/حدیث: 3726]

سیدنا جابر رضی اللہ عنہما سے روایت ہے کہ ایک شخص نبی کریم صلی اللہ علیہ وسلم کے پاس آیا اور عرض کیا: ”اے اللہ کے رسول! مجھے یہ خبر پہنچی ہے کہ شراب حرام کر دی گئی ہے؟“ آپ صلی اللہ علیہ وسلم نے فرمایا: ”ہاں (درست ہے)۔“ اس نے کہا: ”میرے پاس ایک یتیم کی شراب موجود ہے۔“ تو آپ صلی اللہ علیہ وسلم نے اس کے متعلق حکم دیا اور وہ بہا دی گئی۔ [المعجم الأوسط/باب العين/حدیث: 3727]

سیدنا جابر رضی اللہ عنہما بیان کرتے ہیں کہ سیدنا ابن مسعود رضی اللہ عنہ مسجد میں داخل ہوئے جبکہ نبی کریم صلی اللہ علیہ وسلم کھڑے خطبہ دے رہے تھے، تو وہ سیدنا ابی رضی اللہ عنہ کے پہلو میں بیٹھ گئے اور ان سے کوئی بات پوچھی، مگر انہوں نے جواب نہ دیا۔ پھر جب (نبی کریم صلی اللہ علیہ وسلم نماز سے فارغ ہو کر) مڑے تو سیدنا ابن مسعود رضی اللہ عنہ نے سیدنا ابی رضی اللہ عنہ سے کہا: ”آپ کو میرا جواب دینے سے کس چیز نے روکا؟“ انہوں نے کہا: ”آپ کو ہمارے ساتھ جمعہ کا (کامل) ثواب نہیں ملا۔“ انہوں نے پوچھا: ”وہ کیوں؟“ فرمایا: ”اس لیے کہ آپ نے اس وقت کلام کیا جب نبی کریم صلی اللہ علیہ وسلم خطبہ دے رہے تھے۔“ تو رسول اللہ صلی اللہ علیہ وسلم نے فرمایا: ”ابی نے سچ کہا۔“ [المعجم الأوسط/باب العين/حدیث: 3728]

سیدنا جابر رضی اللہ عنہما بیان کرتے ہیں کہ مسلمانوں میں سے ایک آدمی مکہ میں ایک چٹان پر کھڑا نماز پڑھ رہا تھا، نبی کریم صلی اللہ علیہ وسلم اس کے پاس سے گزرے تو نبی کریم صلی اللہ علیہ وسلم نے فرمایا: ”بلاشبہ اللہ تعالیٰ (ثواب دینے سے) نہیں اکتاتا، یہاں تک کہ تم (عمل کرنے سے) اکتا جاؤ۔“ [المعجم الأوسط/باب العين/حدیث: 3729]

سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم نے دعا فرمائی: «اللَّهُمَّ اغْفِرْ لِلْأَنْصَارِ، وَلِأَبْنَاءِ الْأَنْصَارِ، وَلِأَبْنَاءِ أَبْنَاءِ الْأَنْصَارِ، وَلِأَزْوَاجِهِمْ، وَلِذَرَارِيِّهِمْ» ”اے اللہ! انصار کو بخش دے، انصار کے بیٹوں کو اور انصار کے پوتوں کو بھی، اور ان کی بیویوں کو اور ان کی اولاد کو بھی (بخش دے)۔“ [المعجم الأوسط/باب العين/حدیث: 3730]