ایک شخص نے اپنی بیوی سے کہا: تیرا معاملہ تیرے ہاتھ، پھر سیدنا عمر بن خطاب رضی اللہ عنہ کے پاس آیا، انہوں نے خانہ کعبہ کے رکن و مقام کے درمیان اسے قسم دی کہ نیت کیا تھی، اس نے کہا: طلاق کی نیت تھی، تو عمر رضی اللہ عنہ نے جدائی کروا دی۔ [سنن سعید بن منصور/كِتَابُ الطَّلَاقِ/حدیث: 2329]

اسی طرح کے واقعہ میں سیدنا عمر بن خطاب اور علی بن ابی طالب رضی اللہ عنہم نے قسم لے کر نیت پوچھی، جب نیت جدائی کی نکلی تو جدائی کروا دی۔ [سنن سعید بن منصور/كِتَابُ الطَّلَاقِ/حدیث: 2330]

حضرت حسن بصری رحمہ اللہ نے فرمایا: جو بیوی سے کہے کہ چلی جا، مجھے تجھ سے کوئی حاجت نہیں، تو وہ تین طلاق ہے۔ [سنن سعید بن منصور/كِتَابُ الطَّلَاقِ/حدیث: 2331]

حضرت ابراہیم نخعی رحمہ اللہ سے سوال ہوا کہ ایک شخص نے بیوی سے کہا: چلی جا، شادی کر لے، تو فرمایا: اگر طلاق کی نیت نہ کی تو کچھ نہیں۔ حضرت عامر شعبی رحمہ اللہ نے فرمایا: اللہ کی قسم، اس سے ہلکی بات پر بھی طلاق واقع ہو جاتی ہے۔ [سنن سعید بن منصور/كِتَابُ الطَّلَاقِ/حدیث: 2332]

حضرت ابراہیم نخعی رحمہ اللہ نے فرمایا: جو بیوی سے کہے: جس سے چاہو نکاح کر لو، اگر طلاق کی نیت نہ ہو تو کچھ نہیں۔ [سنن سعید بن منصور/كِتَابُ الطَّلَاقِ/حدیث: 2333]

اگر نیت طلاق کی ہو تو طلاق ہے، ورنہ کچھ نہیں۔ [سنن سعید بن منصور/كِتَابُ الطَّلَاقِ/حدیث: 2334]

حضرت حسن بصری اور عامر شعبی رحمہما اللہ نے فرمایا: جو بیوی سے کہے: اپنے گھر چلی جا، یا کہے کہ میرا کوئی حق تجھ پر نہیں یا راستہ تیرے لیے کھلا ہے، اگر طلاق کی نیت ہو تو ایک طلاق ہے اور شوہر بیوی کا زیادہ حق دار ہے، اور اگر نیت نہ ہو تو کچھ نہیں۔ [سنن سعید بن منصور/كِتَابُ الطَّلَاقِ/حدیث: 2335]

حضرت ابراہیم نخعی رحمہ اللہ نے فرمایا: جو بار بار کہے کہ تو میری بیوی نہیں، تو میں نہیں سمجھتا کہ وہ تین مرتبہ کہے اور نیت طلاق نہ کرے۔ [سنن سعید بن منصور/كِتَابُ الطَّلَاقِ/حدیث: 2336]

حضرت ابراہیم نخعی رحمہ اللہ نے فرمایا: جو کہے کہ تو میری بیوی نہیں، اور بار بار کہے، تو اگر تین مرتبہ کہے اور نیت طلاق ہو تو طلاق واقع ہو جائے گی۔ [سنن سعید بن منصور/كِتَابُ الطَّلَاقِ/حدیث: 2337]

حضرت حسن بصری، ابراہیم نخعی، اور عامر شعبی رحمہم اللہ نے فرمایا: جس سے پوچھا گیا کہ تمہاری بیوی ہے؟ اس نے کہا: نہیں، حالانکہ بیوی تھی، تو یہ جھوٹ ہے۔ [سنن سعید بن منصور/كِتَابُ الطَّلَاقِ/حدیث: 2338]