سیدنا ثوبان رضی اللہ عنہ بیان کرتے ہیں کہ میں رمضان کے مہینے کی اٹھارہ راتیں گزرنے کے بعد رسول اللہ صلی اللہ علیہ وسلم کے ساتھ نکلا، جب آپ صلی اللہ علیہ وسلم بقیع کے مقام پر پہنچے تو ایک شخص کو پچھنے لگواتے (حجامت کرواتے) ہوئے دیکھا، تو رسول اللہ صلی اللہ علیہ وسلم نے فرمایا: ”پچھنے لگانے والے اور لگوانے والے دونوں کا روزہ ٹوٹ گیا۔“
امام اوزاعی نے اس سند کو انتہائی عمدگی اور پختگی کے ساتھ بیان کیا ہے اور ہر راوی کا اپنے استاد سے سماع بھی واضح کیا ہے، اسی طرح ثقہ رواۃ کی ایک جماعت نے ان کی متابعت کی ہے، لہٰذا یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الصَّوْمِ/حدیث: 1572]

سیدنا ثوبان رضی اللہ عنہ (رسول اللہ صلی اللہ علیہ وسلم کے آزاد کردہ غلام) بیان کرتے ہیں کہ رسول اللہ صلی اللہ علیہ وسلم رمضان میں بقیع سے گزر رہے تھے کہ آپ صلی اللہ علیہ وسلم نے ایک شخص کو پچھنے لگواتے ہوئے دیکھا تو فرمایا: ”پچھنے لگانے والے اور لگوانے والے دونوں کا روزہ ٹوٹ گیا۔“
امام احمد بن حنبل رحمہ اللہ فرماتے ہیں کہ اس باب میں یہ سب سے صحیح ترین روایت ہے۔ [المستدرك على الصحيحين/كِتَابُ الصَّوْمِ/حدیث: 1573]

سیدنا ثوبان رضی اللہ عنہ بیان کرتے ہیں کہ رسول اللہ صلی اللہ علیہ وسلم رمضان میں بقیع میں تشریف فرما تھے کہ ایک شخص کو حجامت (پچھنے) کرواتے ہوئے دیکھا تو فرمایا: ”پچھنے لگانے والے اور لگوانے والے دونوں کا روزہ ٹوٹ گیا۔“
یہ اسانید جن میں ثقہ رواۃ کا سماع بالکل واضح ہے، ان پر ان لوگوں کے اختلاف کی وجہ سے کوئی اعتراض نہیں کیا جا سکتا جو ابو قلابہ وغیرہ سے روایت کرنے میں مجروح (کمزور) رواۃ کے زمرے میں آتے ہیں۔ [المستدرك على الصحيحين/كِتَابُ الصَّوْمِ/حدیث: 1574]

سیدنا رافع بن خدیج رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”پچھنے لگانے والے اور لگوانے والے دونوں کا روزہ ٹوٹ گیا۔“ اسحاق دبری کی روایت میں ”پچھنے کی طلب کرنے والے“ کے الفاظ بھی منقول ہیں۔ ابوبکر بن اسحاق کہتے ہیں کہ میں نے عباس بن عبدالعظیم کو یہ کہتے ہوئے سنا کہ میں نے علی بن مدینی کو یہ فرماتے ہوئے سنا: پچھنے لگانے اور لگوانے والے کے متعلق میں اس سے زیادہ صحیح کوئی حدیث نہیں جانتا۔ [المستدرك على الصحيحين/كِتَابُ الصَّوْمِ/حدیث: 1575]

سیدنا معاویہ بن سلام رضی اللہ عنہ کی سند کے ہمراہ، رافع بن خدیج کے حوالے سے بھی رسول اللہ صلی اللہ علیہ وسلم کا ایسا ہی فرمان منقول ہے۔ ٭٭ اس علم کے طلبگار کو یہ بات یاد رکھنی چاہیے کہ یہ دونوں اسنادیں یحیی بن ابی کثیر کی ہیں، ان میں سے ایک کو امام احمد بن حنبل نے اور دوسری کو علی بن المدینی نے صحیح قرار دیا ہے، اس لیے ان میں سے کسی ایک کی وجہ سے دوسری کو معلل قرار نہیں دے سکتے۔ اور اسحاق بن ابراہیم الحنظلی نے شداد بن اوس کی حدیث کو بھی صحیح قرار دیا ہے۔ [المستدرك على الصحيحين/كِتَابُ الصَّوْمِ/حدیث: 1576]

سیدنا شداد بن اوس رضی اللہ عنہ فرماتے ہیں: رسول اللہ صلی اللہ علیہ وسلم جنت البقیع میں ایک شخص کے پاس گئے تو وہ پچھنے لگوا رہا تھا، اس وقت رسول اکرم صلی اللہ علیہ وسلم میرا ہاتھ پکڑے ہوئے تھے اور یہ اٹھارھویں روزے کا واقعہ ہے۔ آپ صلی اللہ علیہ وسلم نے فرمایا: پچھنے لگانے اور لگوانے والے دونوں کا روزہ ٹوٹ گیا ہے۔ ٭٭ (امام حاکم فرماتے ہیں) محمد بن صالح نے احمد بن سلمہ کے حوالے سے اسحاق بن ابراہیم کا یہ بیان نقل کیا ہے: یہ اسناد صحیح ہے، اس کے ساتھ حجت قائم کی جا سکتی ہے اور یہ حدیث دیگر اسانید کے ہمراہ بھی صحیح ہے اور وہ یہی کہا کرتے تھے: اللہ تعالیٰ ہمارے امام ابویعقوب سے راضی ہو جنہوں نے اس حدیث کے صحیح ہونے کا فیصلہ کیا ہے اور یہ حدیث عاصم الاحول کے واسطے سے ابوقلابہ سے ثوری اور شعبہ نے بھی اس انداز میں بیان کی ہے۔ [المستدرك على الصحيحين/كِتَابُ الصَّوْمِ/حدیث: 1577]

ثوری اپنی سند کے ہمراہ شداد بن اوس رضی اللہ عنہ کا یہ بیان نقل کرتے ہیں: نبی اکرم صلی اللہ علیہ وسلم رمضان المبارک کی اٹھارہ تاریخ کو دن کے وقت سیدنا معقل بن یسار رضی اللہ عنہ کے پاس سے گزرے تو وہ پچھنے لگوا رہے تھے، آپ صلی اللہ علیہ وسلم نے فرمایا: پچھنے لگانے والا اور لگوانے والا دونوں کا روزہ جاتا رہا۔ [المستدرك على الصحيحين/كِتَابُ الصَّوْمِ/حدیث: 1578]

سیدنا شعبہ رضی اللہ عنہ اپنی سند کے ہمراہ شداد بن اوس رضی اللہ عنہ کا یہ بیان نقل کرتے ہیں: نبی اکرم صلی اللہ علیہ وسلم سترھویں روزے ایک شخص کے پاس سے گزرے تو وہ پچھنے لگوا رہا تھا، آپ صلی اللہ علیہ وسلم نے فرمایا: پچھنے لگانے اور لگوانے والے دونوں کا روزہ جاتا رہا۔ ٭٭ (امام حاکم فرماتے ہیں) ابومحمد الحسن بن محمد بن اسحاق الاسفرائنی نے محمد بن احمد البراء کے حوالے سے علی بن المدینی کا یہ بیان نقل کیا ہے کہ شداد بن اوس کی نبی اکرم صلی اللہ علیہ وسلم کے حوالے سے یہ حدیث کہ ” آپ نے رمضان میں ایک شخص کو پچھنے لگواتے دیکھا “ اس کو عاصم الاحوال نے ابوقلابہ کے واسطے سے ابوالاشعث سے روایت کیا ہے اور اسی کو یحیی بن ابی کثیر نے ابوقلابہ کے بعد ابواسماء کے واسطے سے ابوالاشعث سے روایت کیا ہے۔ اور میرے نزدیک یہ دونوں حدیثیں صحیح ہیں۔ اور یہ ممکن ہے کہ انہوں نے اس حدیث کا دونوں سے سماع کیا ہو۔ اور روزہ دار کے لیے پچھنے لگوانے کی اجازت پر مشتمل حدیث درج ذیل ہے۔ اور اس کو امام بخاری رحمۃ اللہ علیہ نے بخاری میں نقل کیا ہے۔ [المستدرك على الصحيحين/كِتَابُ الصَّوْمِ/حدیث: 1579]

0 [المستدرك على الصحيحين/كِتَابُ الصَّوْمِ/حدیث: 1580]