سیدنا ابن عباس رضی اللہ عنہما فرماتے ہیں: ایک شخص نے پوچھا: یا رسول اللہ صلی اللہ علیہ وسلم سب سے افضل عمل کون سا ہے؟ آپ صلی اللہ علیہ وسلم نے فرمایا: حال اور مرتحل (سفر سے آ کر دوبارہ سفر پر جانا) صحابہ کرام رضی اللہ عنہم نے عرض کی: حال اور مرتحل کا کیا مطلب ہے؟ آپ صلی اللہ علیہ وسلم نے فرمایا: قرآن کے اوّل سے آخر کی طرف سفر کیا جائے اور آخر سے اوّل کی طرف۔ (یعنی قرآن ختم ہوتے ہی دوبارہ شروع کر لیا جائے)۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2115]

سیدنا ابن عباس رضی اللہ عنہما سے مروی ہے: ایک شخص نے عرض کی: یا رسول اللہ صلی اللہ علیہ وسلم کون سا عمل سب سے افضل ہے؟ آپ صلی اللہ علیہ وسلم نے فرمایا: حال اور مرتحل۔ اُس نے پوچھا: یا رسول اللہ صلی اللہ علیہ وسلم ! حال اور مرتحل کیا ہوتا ہے؟ آپ صلی اللہ علیہ وسلم نے فرمایا: قرآن کا قاری اول سے آخر کی طرف سفر کرتے کرتے آخر تک پہنچ جاتا ہے پھر وہاں سے سفر کرتے ہوئے اول تک پہنچ جاتا ہے۔ جیسے ہی سفر ختم کرے، فوراً دوبارہ سفر شروع کر لے۔ ٭٭ یہ حدیث روایت کرنے میں صالح المری متفرد ہیں اور اہلِ بصرہ کے عبادت گزار لوگوں میں سے ہیں۔ مگر شیخین رحمۃ اللہ علیہما نے ان کی رویات نقل نہیں کی ہیں۔ اور ایک حدیث اس کی شاہد ہے جو کہ سیدنا ابوہریرہ رضی اللہ عنہ سے مروی ہے۔ (وہ شاہد حدیث درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2116]

سیدنا ابوہریرہ رضی اللہ عنہ سے مروی ہے: ایک شخص نے عرض کی: یا رسول اللہ صلی اللہ علیہ وسلم کون سا عمل سب سے افضل ہے؟ آپ صلی اللہ علیہ وسلم نے فرمایا: حال اور مرتحل۔ اُس نے پوچھا: یا رسول اللہ صلی اللہ علیہ وسلم ! حال اور مرتحل کیا ہوتا ہے؟ آپ صلی اللہ علیہ وسلم نے فرمایا: قرآن کا قاری قرآن کریم شروع کرے اور اس کے آخر تک پہنچے۔ قرآن پڑھنے والا اول سے آخر کی طرف سفر کرتے کرتے آخر تک پہنچ جاتا ہے پھر وہاں سے سفر کرتے ہوئے اول تک پہنچ جاتا ہے۔ جیسے ہی سفر ختم کرے، فوراً دوبارہ سفر پر نکل جائے۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2117]

عبداللہ ابن ابی نہیک فرماتے ہیں: میں سیدنا سعد رضی اللہ عنہ کے پاس آیا، انہوں نے مجھ سے میرا تعارف پوچھا، میں نے ان کو اپنا تعارف کروایا، (وہ مجھے پہچان گئے اور کہنے لگے) تم تو کمائی کرنے والے تاجر ہو، میں نے رسول اللہ صلی اللہ علیہ وسلم کو فرماتے سنا ہے ” وہ شخص ہم میں سے نہیں جو قرآن کو اچھی آواز کے ساتھ نہیں پڑھتا “ سیدنا سفیان فرماتے ہیں: اس کا مطلب ہے (جو قرآن کو اچھی آواز کے ساتھ پڑھنے کی کوشش نہیں کرتا) ٭٭ اسی حدیث کی سفیان بن عیینہ کی ایک اور بھی سند ہے۔ (جو کہ درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2118]

سیدنا سفیان بن عیینہ رضی اللہ عنہ اپنی اس سند کے ہمراہ روایت کرتے ہیں کہ سیدنا عبداللہ بن ابی نہیک سے سیدنا سعد نے کہا: تم کمائی کرنے والے تاجر ہو، میں نے رسول اللہ صلی اللہ علیہ وسلم کو یہ فرماتے سنا ہے کہ ” وہ شخص ہم میں سے نہیں ہے جو قرآن کو اچھی آواز کے ساتھ نہیں پڑھتا “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس سند کے ہمراہ نقل نہیں کیا ہے۔ اور سعید بن حسان المخزومی نے عبداللہ ابن ابی ملکیہ کے واسطے سے عبداللہ بن ابی نہیک کے حوالے سے سیدنا سعد رضی اللہ عنہ سے روایت کی ہے۔ اور عمرو بن دینار، ابن جریج اور سعید بن حسان کی ابن ابی ملیکہ کے واسطے سے عبداللہ ابن ابی نہیک سے روایات متفق ہیں، جبکہ لیث بن سعد نے ان کی مخالفت کرتے ہوئے یوں سند بیان کی:” عَنْ عَبْدِاللّٰہِ بْنِ اَبِیْ مُلَیْکَۃَ، عَنْ عَبْدِ اللّٰہِ بْنِ اَبِیْ نَھِیْکٍ۔ “ (لیث کی روایت درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2119]

سیدنا سعد بن ابی وقاص رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”وہ ہم میں سے نہیں جو قرآن کو خوش الحانی سے (ترنم کے ساتھ) نہ پڑھے“۔ عمرو بن دینار، ابن جریج اور سعید بن حسان کی روایات اس بات پر متفق ہیں کہ انہوں نے ابن ابی ملیکہ سے، انہوں نے عبید اللہ بن ابی نہیک سے (روایت کیا ہے)۔ البتہ لیث بن سعد نے ان کی مخالفت کی ہے، انہوں نے (سند میں) عبداللہ بن ابی ملیکہ سے، انہوں نے عبداللہ بن ابی نہیک کا نام ذکر کیا ہے۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2120]

سیدنا لیث بن سعد، ابن ابی ملکیہ رضی اللہ عنہ سے روایت کرتے ہیں کہ عبداللہ ابن ابی نہیک نے سیدنا سعد بن مالک کا یہ فرمان نقل کیا ہے کہ رسول اللہ صلی اللہ علیہ وسلم نے ارشاد فرمایا: وہ شخص ہم میں سے نہیں ہے جو قرآن کو خوبصورت آواز کے ساتھ نہیں پڑھتا۔ ٭٭ لیث کی یہ روایت، عبداللہ ابن ابی نہیک سے مروی دیگر روایات کو مخدوش نہیں کرتی کیونکہ وہ دونوں بھائی ہیں، تابعی ہیں اور دونوں روایتوں کی صحت پر دلیل عمرو بن حارث کی روایت ہے۔ (اور وہ ثبت، حفاظ میں سے ہیں) جو انہوں نے ابن ابی ملیکہ سے روایت کی ہے۔ (وہ حدیث درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2121]

سیدنا ابن ابی ملیکہ رضی اللہ عنہ فرماتے ہیں: کچھ لوگ جو سیدنا سعد بن ابی وقاص رضی اللہ عنہ کے پاس گئے تھے، انہوں نے یہ بات بتائی کہ انہوں نے سیدنا سعد رضی اللہ عنہ سے قرآن کے متعلق پوچھا تو سیدنا سعد رضی اللہ عنہ بولے: بہرحال میں نے رسول اللہ صلی اللہ علیہ وسلم کو یہ فرماتے سنا ہے کہ وہ شخص ہم میں سے نہیں ہے جو قرآن کو سُر کے ساتھ نہیں پڑھتا۔ ٭٭ یہ روایت اس بات پر دلالت کرتی ہے کہ ابن ابی ملیکہ نے صرف ایک راوی سے یہ حدیث نہیں سنی بلکہ سیدنا سعد رضی اللہ عنہ کے متعدد راویوں سے انہوں نے یہ حدیث سنی ہے۔ جبکہ عبیداللہ بن اخنس اور عسل بن سفیان نے ابن ابی ملیکہ کی سند ترک کی اور اس میں دو شاذ سندیں استعمال کی ہیں۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2122]

سیدنا عبیداللہ بن اخنس رضی اللہ عنہ، عبیداللہ بن عبداللہ بن ابی ملیکہ کے واسطے سے سیدنا ابن عباس رضی اللہ عنہما سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: وہ شخص ہم میں سے نہیں ہے جو قرآن کو سُر کے ساتھ نہیں پڑھتا۔ ٭٭ اسی حدیث کو حارث بن مرہ ثقفی بصری نے عسل بن سفیان کے واسطے سے ابن ابی ملیکہ سے روایت کیا ہے کہ اُمّ المومنین سیّدہ عائشہ رضی اللہ عنہا، نبی اکرم صلی اللہ علیہ وسلم کے حوالے سے بیان کرتی ہیں۔ اور حارث نے اسی سند کے ہمراہ یہ حدیث ابن عباس رضی اللہ عنہما سے بھی روایت کی ہے۔ (جیسا کہ درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2123]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”وہ ہم میں سے نہیں جو قرآن کو خوش الحانی سے (ترنم کے ساتھ) نہ پڑھے“۔ حارث بن مرہ ثقفی بصری نے اس حدیث کو عسل بن سفیان کے واسطے سے ابن ابی ملیکہ سے، انہوں نے سیدنا ابن عباس رضی اللہ عنہما سے روایت کیا ہے: [المستدرك على الصحيحين/كِتَابُ فَضَائِلِ الْقُرْآنِ/حدیث: 2124]