سیدنا ناجیہ اسلمی رضی اللہ عنہ کا بیان ہے کہ رسول اللہ صلی اللہ علیہ وسلم نے ان کے ہاتھ اپنی قربانی بھجوائی اور انہیں فرمایا: ”اگر ان میں سے کوئی جانور ہلاک ہونے لگے تو اسے نحر کر دینا، اس کے جوتے کو اس کے خون سے رنگ دینا، پھر اسے لوگوں کے لیے چھوڑ دینا۔“ [سنن ابي داود/كِتَاب الْمَنَاسِكِ/حدیث: 1762]

سیدنا ابن عباس رضی اللہ عنہ سے مروی ہے کہ رسول اللہ صلی اللہ علیہ وسلم نے فلاں اسلمی رضی اللہ عنہ کو بھیجا اور اس کے ساتھ قربانی کے اٹھارہ اونٹ روانہ کیے۔ وہ عرض کرنے لگے: ”فرمائیے اگر ان میں سے کوئی اپنے پاؤں گھسیٹنے لگے (چلنے سے لاچار ہو جائے اور تھک جائے تو؟)“ آپ صلی اللہ علیہ وسلم نے فرمایا: ”اسے نحر کر دینا، اس کے جوتوں کو خون سے لتھیڑ کر اس کی کوہان پر نشان لگا دینا اور تم یا تمہارے ساتھیوں میں سے کوئی اس سے نہ کھائے۔“ حدیث کے لفظ «مِنْ أَصْحَابِكَ» ”تمہارے ساتھیوں میں سے“ تھے یا «أَهْلِ رُفْقَتِكَ» ”تمہارے قافلے والوں میں سے“ تھے۔ امام ابوداؤد رحمہ اللہ فرماتے ہیں کہ اس حدیث میں یہ جملہ «وَلَا تَأْكُلْ مِنْهَا أَنْتَ وَلَا أَحَدٌ مِنْ أَهْلِ رُفْقَتِكَ» ”اور نہ تم خود اس میں سے کھانا اور نہ تمہارے قافلے والوں میں سے کوئی کھائے“ منفرد ہے، اور عبدالوارث کی روایت میں «ثُمَّ اضْرِبْهَا» ”پھر اسے مارو“ کی بجائے «اجْعَلْهُ عَلَى صَفْحَتِهَا» ”اسے اس کے پہلو پر رکھ دو“ آیا ہے۔ امام ابوداؤد رحمہ اللہ کہتے ہیں کہ میں نے ابوسلمہ موسیٰ بن اسماعیل منقری رحمہ اللہ سے سنا، وہ کہتے تھے: ”جب تم نے حدیث کی سند اور اس کے معنی صحیح اور درست طور پر بیان کر دیے تو کافی ہے (الفاظ بدلنے سے کوئی فرق نہیں پڑتا یعنی روایت بالمعنی جائز ہے)۔“ [سنن ابي داود/كِتَاب الْمَنَاسِكِ/حدیث: 1763]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے جب اپنے اونٹ نحر کیے تو ”تیس اونٹ اپنے ہاتھ سے نحر کیے اور باقی کے متعلق مجھے حکم فرمایا اور میں نے انہیں نحر کیا۔“ [سنن ابي داود/كِتَاب الْمَنَاسِكِ/حدیث: 1764]