سیدنا جابر بن عبداللہ رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے بادشاہ کو راضی کرنے کے لئے اللہ تعالیٰ کو ناراض کیا وہ اللہ تعالیٰ کے دین سے (باہر) نکل جاتا ہے۔ ٭٭ یہ حدیث روایت کرنے میں علاق بن ابی مسلم منفرد ہیں۔ اور اس کے تمام راوی ثقہ ہیں۔ [المستدرك على الصحيحين/كِتَابُ الْأَطْعِمَةِ/حدیث: 7248]

سیدنا عمر بن خطاب رضی اللہ عنہ فرماتے ہیں: میں رسول اللہ صلی اللہ علیہ وسلم کی خدمت میں حاضر ہونے کی اجازت لے کر بالاخانے میں آپ کے پاس پہنچا، حضور صلی اللہ علیہ وسلم اپنی خصف (کھال کی بنی ہوئی چٹائی) پر لیٹے ہوئے تھے، آپ کے جسم مبارک کا کچھ حصہ زمین پر لگ رہا تھا، آپ کے سر کے نیچے ایک تکیہ تھا جس میں لیف بھرا ہوا تھا، آپ کے سر پر دباغت دی ہوئی کھال تھی، اور چشمے کی ایک جانب اس درخت کے پتے پڑے ہوئے تھے جس کے ساتھ کھال کو رنگا جاتا ہے۔ میں نے آپ کو سلام کیا اور آپ کے قریب بیٹھ گیا، میں نے کہا: یا رسول اللہ صلی اللہ علیہ وسلم ، آپ اللہ کے نبی ہیں، اللہ کی مخلوقات میں بزرگ تر ہیں، چنے ہوئے ہیں۔ قیصر اور کسریٰ سونے کے تخت اور ریشم کے بچھونوں پر ہیں۔ حضور صلی اللہ علیہ وسلم نے فرمایا: اے عمر! ان کو آسائش کی چیزیں جلدی دے دی گئی ہیں، اور وہ سب بہت جلد ختم ہونے والا ہے جب کہ ہمارے لئے ہماری آسائش کی چیزیں آخرت کے لئے ذخیرہ کر کے رکھی گئی ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7249]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے لقمہ حلال کھایا اور سنت کے مطابق عمل کیا اور لوگ اس کے شر سے محفوظ ہیں، وہ جنتی ہے۔ صحابہ کرام رضی اللہ عنہم نے عرض کیا: یا رسول اللہ صلی اللہ علیہ وسلم ایسے لوگ تو آپ کی امت میں بہت سارے ہیں، آپ صلی اللہ علیہ وسلم نے فرمایا: اور میرے بعد بھی ایسے لوگ بہت زیادہ ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7250]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم اپنی ایک زوجہ محترمہ کے پاس تشریف لے جاتے، ان کے پاس شہد کا ایک ڈبہ تھا، حضور صلی اللہ علیہ وسلم اس میں سے شہد استعمال کرتے تھے اور ان کے پاس بیٹھ جاتے۔ یہ چیز (دیگر ازواج) کو ناگوار گزرتی تھی، ام المومنین سیدہ عائشہ رضی اللہ عنہا نے ام المومنین سیدہ حفصہ اور دیگر ازواج سے مشورہ کیا، اور ہم نے حضور صلی اللہ علیہ وسلم سے کہا: ہمیں آپ سے مغافیر (ایک درخت کا گوند ہے) کی بدبو آ رہی ہے، حضور صلی اللہ علیہ وسلم نے فرمایا: میں نے تو ابھی فلاں زوجہ کے پاس شہد استعمال کیا تھا، اب میں اس کے پاس نہیں جاؤں گا۔ [المستدرك على الصحيحين/كِتَابُ الْأَطْعِمَةِ/حدیث: 7251]

سیدنا انس بن مالک رضی اللہ عنہ فرماتے ہیں: سیدنا ام سلیم کے پاس ایک پیالہ ہوتا تھا، میں نے اس میں حضور صلی اللہ علیہ وسلم کو شہد، دودھ، نبیذ، پانی اور ہر طرح کے مشروبات پلائے ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7252]

معاویہ بن قرہ بیان کرتے ہیں کہ میرے والد نے بتایا ہے: ہم نے رسول اللہ صلی اللہ علیہ وسلم کے ہمراہ غزوات میں شرکت کی ہے، ہمارے پاس کھانے کے لئے دو سیاہ چیزوں کے علاوہ کچھ نہیں ہوتا تھا، راوی کہتے ہیں: تمہیں پتا ہے کہ ” سیاہ چیزیں کیا ہیں؟“ انہوں نے کہا: جی نہیں۔ راوی نے کہا: پانی اور کھجور۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7253]

ام المومنین سیدہ عائشہ رضی اللہ عنہا فرماتی ہیں: محمد صلی اللہ علیہ وسلم کے گھر والوں پر آدھا آدھا اور پورا پورا مہینہ گزر جاتا تھا، ان کے پاس (کھانے پکانے اور) چراغ جلانے تک کے لئے آگ نہ ہوتی تھی۔ (قاسم بن محمد کہتے ہیں) میں نے پوچھا: آپ لوگ کھاتے پیتے کیا تھے؟ ام المومنین رضی اللہ عنہا نے فرمایا: کھجور اور پانی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7254]

سیدنا عروہ روایت کرتے ہیں کہ ام المومنین سیدہ عائشہ رضی اللہ عنہا فرماتی ہیں: محمد صلی اللہ علیہ وسلم کے دو وقت کے کھانے میں ایک وقت کھجور ضرور ہوتی تھی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7255]

سیدنا عبداللہ بن شقیق فرماتے ہیں: میں دو سال تک سیدنا ابوہریرہ رضی اللہ عنہ کے پاس رہا، ایک آپ نے فرمایا: اے ابن شقیق! تم اس پتھر کو دیکھ رہے ہو؟ یہ نبی اکرم صلی اللہ علیہ وسلم کا پتھر ہے، تو نے یہ پتھر ہمارے پاس دیکھا ہے، ہمارے پاس اتنا کھانا نہیں ہوتا تھا جس سے پیٹ بھرا جا سکے، ہم پتھر لے کر کسی رسی یا کپڑے کے ساتھ اپنے پیٹ پر باندھ لیا کرتے تھے، اس ذات کی قسم! جس کے قبضہ قدرت میں میری جان ہے، مجھے آج تک یاد ہے نبی اکرم صلی اللہ علیہ وسلم نے ہمارے درمیان کھجوریں تقسیم کیں، ہر شخص کو سات سات کھجوریں ملیں، اور مجھے ساتویں کھجور کی جگہ حشفہ (کھجور کا بچا ہوا دھانسا) ملا، اس کے ملنے پر میں اتنا خوش ہوا، اس کے ملنے پر مجھے جو خوشی ہوئی، وہ عمدہ کھجور ملنے پر نہیں ہونی تھی۔ (عبداللہ بن شقیق) کہتے ہیں، میں نے پوچھا: اے ابوہریرہ! اس کی وجہ کیا ہے؟ انہوں نے کہا: اس لئے کہ اس کا چبانا مجھے دشوار ہو رہا تھا تو میں اس کو آہستہ آہستہ چباتا رہا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7256]