سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے چوکوں، چوراہوں میں بیٹھنے سے منع فرمایا: صحابہ کرام نے عرض کیا: یا رسول اللہ صلی اللہ علیہ وسلم ہم یہ عمل نہیں چھوڑ سکتے۔ آپ صلی اللہ علیہ وسلم نے فرمایا: اگر تم اس کے بغیر نہیں رہ سکتے تو پھر اس کا حق ادا کرو، صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم اس کا حق کیا ہے؟ آپ صلی اللہ علیہ وسلم نے فرمایا: اس کا حق یہ ہے کہ سلام کا جواب دو، اور چھینکنے والا ” الحمد للہ “ کہے تو اس کو ” یرحمک اللہ “ کہہ کر جواب دو۔ آنکھوں کو جھکا کر رکھو، اور کوئی راستہ پوچھے تو اس کو راستہ بتلاؤ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7881]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم کی بارگاہ میں دو آدمی بیٹھے ہوئے تھے، ایک امیر اور دوسرا غریب تھا۔ امیر آدمی کو چھینک آئی، اس نے الحمد اللہ نہ پڑھا، نبی اکرم صلی اللہ علیہ وسلم نے اس کو جواب نہیں دیا۔ پھر دوسرے کو چھینک آئی، اس نے الحمد للہ کہا۔ نبی اکرم صلی اللہ علیہ وسلم نے اس کو ” یرحمک اللہ “ کہا۔ امیر شخص کہنے لگا: مجھے چھینک آئی تو آپ نے مجھے ” یرحمک اللہ “ نہیں کہا اور اس کو آئی تو آپ نے اس کو ” یرحمک اللہ “ کہہ دیا۔ حضور صلی اللہ علیہ وسلم نے فرمایا: تو نے اللہ تعالیٰ کو بھلا دیا، میں نے تجھے بھلا دیا، اس نے اللہ تعالیٰ کو یاد رکھا، میں نے اس کو یاد رکھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7882]

ابوبردہ بن ابی موسیٰ فرماتے ہیں: میں ابوموسیٰ کے پاس گیا، وہ اس وقت سیدنا ام فضل رضی اللہ عنہا کے گھر میں تھے۔ ام الفضل رضی اللہ عنہا کو چھینک آئی، ابوموسیٰ نے ان کو ” یرحمک اللہ “ کہہ دیا، پھر مجھے چھینک آئی تو انہوں نے مجھے ” یرحمک اللہ “ نہ کہا۔ ابوبردہ کہتے ہیں: میں اپنی والد کے پاس واپس آیا اور ان کو ساری بات سنائی، جب ابوموسیٰ گھر آئے تو میری والدہ نے ان سے کہا: تیرے پاس میرے بیٹے کو چھینک آئی، لیکن تو نے اسے ” یرحمک اللہ “ نہیں کہا۔ جبکہ تیری بیوی کو چھینک آئی تو، تو نے ” یرحمک اللہ “ کہہ دیا۔ ابوموسیٰ نے کہا: تیرے بیٹے کو چھینک آئی تھی، لیکن اس نے ” الحمدللہ “ نہیں کہا۔ اس لیے میں نے ” یرحمک اللہ “ بھی نہیں کہا۔ اور اس کو چھینک آئی تو اس نے ” الحمدللہ “ کہا، تو میں نے بھی ” یرحمک اللہ “ کہہ دیا۔ اس کی وجہ یہ ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جب کسی کو چھینک آئے اور وہ ” الحمد للہ “ کہے، تو تم اس کو جواب میں ” یرحمک اللہ “ کہو۔ اور اگر وہ ” الحمد للہ “ نہ کہے تو تم بھی جواب میں ” یرحمک اللہ “ نہ کہو۔ ابوبردہ کی والدہ نے کہا: تم نے ٹھیک کیا، تم نے ٹھیک کیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7883]

سیدنا نافع فرماتے ہیں: سیدنا عبداللہ بن عمر رضی اللہ عنہما کے پاس ایک آدمی کو چھینک آئی، اس نے کہا: الحمدللہ والسلام علی رسول اللہ “ سیدنا عبداللہ بن عمر رضی اللہ عنہما نے کہا: میں بھی ” الحمد للہ والسلام علی رسول اللہ “ کو مانتا ہوں، لیکن رسول اللہ صلی اللہ علیہ وسلم نے ہمیں یہ سکھایا تھا کہ جب کسی کو چھینک آئے تو ہم کہیں ” الحمد اللہ علی کل حال “۔ ٭٭ یہ حدیث نافع کے شیوخ کے ترجمہ میں صحیح الاسناد ہے، غریب المتن ہے۔ اس موضوع پر امیرالمومنین سیدنا علی ابن ابی طالب رضی اللہ عنہ دو حدیثیں مروی ہیں، ان دونوں حدیثوں کو محمد بن عبدالرحمن بن ابی لیلی اپنے آباء سے روایت کرنے میں منفرد ہیں۔ ان میں سے پہلی حدیث یہ ہے۔ [المستدرك على الصحيحين/كِتَابُ الْأَدَبِ/حدیث: 7884]

سیدنا ابوایوب انصاری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: چھینکنے والا ” الحمدللہ علی کل حال “ کہے، اور اس کو جواب دینے والا ” یرحمک اللہ “ کہے، اور چھینکنے والا اس کے جواب میں ” یہدیکم ویصلح بالکم “ کہے۔ ٭٭ یہ محمد بن عبدالرحمن بن ابی لیلی فقیہہ انصاری قاضی رحمۃ اللہ علیہ کے اوہام میں سے ہے، اگر ان کے اوہام میں سے ایسی باتیں ظاہر نہ ہوتیں، ائمہ حدیث ان کو سوء حفظ کی جانب منسوب نہ کرتے۔ [المستدرك على الصحيحين/كِتَابُ الْأَدَبِ/حدیث: 7885]