سیدنا علی بن ابی طالب رضی اللہ عنہ فرماتے ہیں: سفیانی شام میں ظاہر ہو گا، پھر قرقیسا میں ان کے درمیان ایک جنگ ہو گی، پرندے اور درندے ان کے لاشوں کو کھا کھا کر اپنا پیٹ بھریں گے، پھر ان میں اختلافات رونما ہوں گے، ان میں سے ایک جماعت نکلے گی اور خراسان میں جائے گی، اور سفیانی کے گھڑ سوار اہل خراسان کے تعاقب میں نکلیں گے، اور کوفہ میں رسول اللہ صلی اللہ علیہ وسلم کی آل کی جماعت سے جنگ کریں گے۔ پھر اہل خراسان مہدی کی طلب میں نکل جائیں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8740]

سیدنا ثوبان رضی اللہ عنہ فرماتے ہیں: جب تم دیکھو کہ خراسان کی طرف سے کالے جھنڈے والے لشکر نمودار ہو گئے ہیں، تو اس میں لازمی شریک ہونا کیونکہ اس لشکر میں اللہ کا خلیفہ سیدنا مہدی رضی اللہ عنہ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8741]

سلمان بن ربیعہ فرماتے ہیں: میں اپنے چند دوستوں کے ہمراہ مکہ مکرمہ میں آیا، ہم نے وہاں سیدنا عبداللہ بن عمرو رضی اللہ عنہ کو ڈھونڈا، لیکن وہ ہمیں نہ ملے، ہم نے تقریبا 300 سواروں کو دیکھا، لیکن ہمیں وہ نہ ملے، پھر ہم مسجد میں آ گئے، یہاں ہم نے ایک بزرگ کو دیکھا، اس نے دو قطری چادریں زیب تن کی ہوئی تھیں، سر پر عمامہ تھا، اور قمیص نہیں پہنا ہوا تھا، انہوں نے ہم سے پوچھا: تم کون ہو؟ ہم نے کہا: ہم عراق سے آئے ہیں، انہوں نے فرمایا: اے عراقیو! تم جھوٹ بھی بولتے ہو، اور جھٹلاتے بھی ہو اور تم مذاق بھی کرتے ہو، ہم نے کہا: ہم نہ جھوٹ بولتے ہیں، نہ کسی چیز کو جھٹلاتے ہیں، اور نہ ہی ہم کسی چیز کا مذاق اڑاتے ہیں، انہوں نے کہا: تمہارے اور ایلہ کے درمیان کتنی مسافت ہے؟ ہم نے بتایا کہ چار فرسخ۔ انہوں نے فرمایا: قریب ہے کہ ” بنی قنطوراء بن کرکر “ تمہیں خراسان اور سجستان سے سختی کے ساتھ ہانکتے ہوئے لائیں گے، پھر یہ نکلیں گے اور اپنے گھوڑے دریائے دجلہ کے کنارے پر باندھیں گے، ان لوگوں کی آنکھیں چھوٹی چھوٹی ہوں گی، ناک چپٹے ہوں گے۔ اور ان کے چہرے ڈھال کی طرح ہوں گے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8742]

زید بن سلام اپنے والد سے، وہ ان کے دادا سے روایت کرتے ہیں کہ جب سیدنا حذیفہ بن یمان رضی اللہ عنہ کی وفات کا وقت قریب آیا تو ان کے پاس کچھ دیہاتی لوگ آئے اور کہنے لگے: اے حذیفہ! ہم دیکھ رہے ہیں کہ آپ کی وفات ہونے والی ہے، سیدنا حذیفہ نے ان سے فرمایا: میرے چہرے پر خوشی کے آثار ہیں اور حبیب فاقوں سے ہی ملتا ہے، وہ کامیاب نہیں ہوتا جو ان باتوں پر پریشان ہو جاتا ہے، البتہ میں کسی باغی کی بغاوت میں شمولیت اختیار نہیں کروں گا، آج میں برے ساتھی سے تجھے اللہ کی پناہ میں دیتا ہوں، لوگ رسول اللہ صلی اللہ علیہ وسلم سے خیر کے بارے میں پوچھا کرتے تھے اور میں آپ صلی اللہ علیہ وسلم سے شر کے بارے میں پوچھا کرتا تھا، میں نے عرض کی: یا رسول اللہ! ہم شر میں ہیں، پھر اللہ تعالیٰ ہم پر خیر لائے گا، کیا اس خیر کے بعد کوئی شر بھی آئے گا؟ آپ صلی اللہ علیہ وسلم نے فرمایا: ہاں۔ میں نے عرض کی: کیا اس خیر کے بعد پھر کوئی شر آئے گا؟ آپ صلی اللہ علیہ وسلم نے فرمایا: ہاں۔ میں نے کہا: یا رسول اللہ صلی اللہ علیہ وسلم وہ کیسے؟ آپ صلی اللہ علیہ وسلم نے فرمایا: میرے بعد کچھ ائمہ ایسے ہوں گے جو میری ہدایت پر نہیں ہوں گے، نہ میری سنت پر عمل پیرا ہوں گے، اور عنقریب کچھ لوگ ایسے پیدا ہوں گے جن کے دل دیکھنے میں تو ایسے ہی ہوں گے جیسے کسی انسان کے جسم میں دل ہوتا ہے، میں نے کہا: اگر میں وہ زمانہ پاؤں تو میں کیا کروں؟ آپ صلی اللہ علیہ وسلم نے فرمایا: تم امیر اعظم کی پیروی کرنا، اگرچہ وہ تیری پیٹھ پر مارے، اگرچہ وہ تیرا مال کھا لے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8743]

سیدنا ابوسعود انصاری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: خلافت ہمیشہ تم میں رہے گی اور تم امیر رہو گے جب تک کہ تم من گھڑت اعمال کو نہ اپنا لو گے، جب تم من گھڑت اعمال کو اپنا لو گے تو خلافت تم سے چھن جائے گی، اگر تم نے ایسا کیا تو اللہ تعالیٰ تم پر دنیا کے خبیث ترین لوگوں کو تمہارا حکمران بنا دے گا، وہ تمہیں اس طرح چھیل کر رکھ دیں گے جیسے کاٹی ہوئی شاخ کو چھیلا جاتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8744]