سیدنا مہلب بن ابی صفرہ رضی اللہ عنہ بیان کرتے ہیں کہ وہ اس شخص سے بیان کرتے ہیں جس نے نبی کریم صلی اللہ علیہ وسلم کو فرماتے ہوئے سنا: اگر دشمن رات کی تاریکی میں آپ پر حملہ کر دے تو آپ کا شعار (کوڈ) حم لا ينصرون ہونا چاہیے۔ [المنتقى ابن الجارود/كتاب الطلاق/حدیث: 1063]

سیدنا عبد الله بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے اس اندیشے سے دشمن کے ممالک میں قرآن لے جانے سے منع فرمایا ہے کہ کہیں دشمن کے ہاتھ نہ لگ جائے۔ [المنتقى ابن الجارود/كتاب الطلاق/حدیث: 1064]

سیدنا سہل بن سعد رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: دو دعائیں نامنظور نہیں ہوتیں، اذان کے وقت دعا کرنا اور لڑائی کے وقت دعا کرنا جب وہ خوب زوروں پر ہو۔ [المنتقى ابن الجارود/كتاب الطلاق/حدیث: 1065]

سیدنا براء بن عازب رضی اللہ عنہ بیان کرتے ہیں کہ نبی کریم صلی اللہ علیہ وسلم (سواری سے) اترے، مدد کے لیے دعا کی، پھر فرمایا: میں جھوٹا نبی نہیں ہوں، میں عبد المطلب کا بیٹا ہوں۔ پھر اپنے صحابہ کرام کی صف بندی کروائی۔ [المنتقى ابن الجارود/كتاب الطلاق/حدیث: 1066]

سیدنا ابو طلحہ رضی اللہ عنہ بیان کرتے ہیں کہ رسول اللہ صلی اللہ علیہ وسلم جب کسی قوم پر غلبہ حاصل کر لیتے تو ان کے صحن (علاقے) میں تین دن قیام کرنا پسند کرتے تھے۔ [المنتقى ابن الجارود/كتاب الطلاق/حدیث: 1067]

سیدنا عبد الله بن عمر رضی اللہ عنہما بیان کرتے ہیں کہ سیدنا عبد الله بن عمر رضی اللہ عنہما کا ایک گھوڑا بھاگ گیا تو دشمن نے اسے پکڑ لیا، مسلمان ان پر غالب آئے تو رسول اللہ صلی اللہ علیہ وسلم کے دور میں وہ انہیں واپس کر دیا گیا اور ان کا ایک غلام بھاگ کر رومیوں سے جا ملا، مسلمان ان پر غالب آئے تو نبی کریم صلی اللہ علیہ وسلم کے بعد سیدنا خالد بن ولید رضی اللہ عنہ نے انہیں (غلام) واپس کر دیا۔ [المنتقى ابن الجارود/كتاب الطلاق/حدیث: 1068]

سیدنا سلیم بن عامر رضی اللہ عنہ کہتے ہیں کہ سیدنا معاویہ رضی اللہ عنہ اور رومیوں کے درمیان معاہدہ تھا، وہ چلتے چلتے ان کے علاقے کے قریب چلے گئے اور جب معاہدہ پورا ہو گیا تو ان پر حملہ کر دیا، ایک آدمی جس کا نام عمرو بن عبسہ تھا گھوڑے پر سوار ہو کر آیا اور کہنے لگا: الله أكبر، عہد پورا کریں اور عہد شکنی نہ کریں، میں نے رسول الله صلی الله علیہ وسلم کو فرماتے ہوئے سنا: جس کا کسی قوم سے معاہدہ ہو تو وہ مدت معاہدہ پوری ہونے سے پہلے یا انہیں معاہدہ ختم کرنے کی اطلاع کرنے سے پہلے نہ اسے پختہ کرے اور نہ اسے توڑے (یعنی کوئی تبدیلی نہ کرے)۔ راوی کہتے ہیں: یہ سن کر معاویہ رضی اللہ عنہ لشکر واپس لے آئے۔ [المنتقى ابن الجارود/كتاب الطلاق/حدیث: 1069]

سیدنا ابو بکرہ رضی اللہ عنہ بیان کرتے ہیں کہ رسول الله صلی الله علیہ وسلم نے فرمایا: جس نے کسی معاہد (ذمی) کو بلا وجہ قتل کر دیا تو الله تعالیٰ اس پر جنت کی خوشبو حرام کر دے گا۔ [المنتقى ابن الجارود/كتاب الطلاق/حدیث: 1070]

سیدنا ابو ہریرہ رضی اللہ عنہ بیان کرتے ہیں کہ رسول الله صلی الله علیہ وسلم نے فرمایا: تم سے پہلے کسی کالے بالوں والی قوم کے لیے غنیمتیں حلال نہیں کی گئیں، آسمان سے آگ اترتی تھی اور اسے کھا جاتی تھی، بدر کے دن جب لوگ جلدی جلدی مال غنیمت اکٹھا کرنے لگے تو الله تعالیٰ نے یہ آیت اتاری: ﴿لَوْلَا كِتَابٌ مِنَ اللهِ سَبَقَ لَمَسَّكُمْ فِيمَا أَخَذْتُمْ عَذَابٌ عَظِيمٌ﴾ (الأنفال: 68) (اگر الله تعالیٰ نے پہلے سے لکھ نہ دیا ہوتا تو تمہیں اس کی وجہ سے جو تم نے حاصل کیا ہے بڑا عذاب پہنچتا)۔ [المنتقى ابن الجارود/كتاب الطلاق/حدیث: 1071]

محمد بن ابی مجالد رحمہ اللہ بیان کرتے ہیں کہ مسجد والوں نے مجھے سیدنا عبد الله بن ابی اوفی رضی اللہ عنہ کے پاس بھیجا تو میں نے ان سے خیبر کی اشیائے خوردنی کے متعلق پوچھا: کیا رسول الله صلی الله علیہ وسلم نے ان میں سے خمس لیا تھا؟ تو انہوں نے فرمایا: نہیں! معاملہ بڑا آسان تھا، ہم میں سے ہر آدمی اپنی ضرورت کے مطابق اس میں سے لے لیتا تھا۔ [المنتقى ابن الجارود/كتاب الطلاق/حدیث: 1072]