سیدنا عبد الله بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: قیامت کے دن جب اللہ تعالیٰ اگلے پچھلے لوگوں کو جمع کریں گے تو ہر عہد شکنی کرنے والے کا ایک جھنڈا نصب کر دیا جائے گا تو کہا جائے گا یہ فلاں کی عہد شکنی ہے۔ یہ حدیث ابن یحییٰ کی ہے۔ زعفرانی نے روز قیامت کا ذکر نہیں کیا۔ [المنتقى ابن الجارود/كتاب الطلاق/حدیث: 1053]

سیدنا عبد الله بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے بنو نضیر کے کھجوروں کے درخت جلا دیے تھے۔ [المنتقى ابن الجارود/كتاب الطلاق/حدیث: 1054]

سیدنا ابو مرہ رضی اللہ عنہ بیان کرتے ہیں کہ سیدہ ام ہانی رضی اللہ عنہا نے اپنے دو سسرالیوں کو پناہ دی تو رسول اللہ صلی اللہ علیہ وسلم نے فرمایا: جسے آپ نے پناہ دی ہم نے بھی اسے پناہ دی اور جسے آپ نے امان دی ہم نے بھی اسے امان دی۔ ابن مقری کہتے ہیں: یہ روایت ایک اور سند سے بھی مروی ہے جس میں ہے کہ ام ہانی رضی اللہ عنہا فرماتی ہیں: میں نبی کریم صلی اللہ علیہ وسلم کے پاس آئی اور آپ سے اس کا تذکرہ کیا۔ [المنتقى ابن الجارود/كتاب الطلاق/حدیث: 1055]

ہیاج بن عمران رضی اللہ عنہ بیان کرتے ہیں کہ ان کے والد کا غلام بھاگ گیا، انہوں نے اس کے خلاف نذر مانی کہ اگر وہ ان کے قابو آ گیا تو وہ اس کا کوئی عضو کاٹ دیں گے، جب وہ ان کے پاس واپس آیا تو انہوں نے مجھے سیدنا عمران بن حصین رضی اللہ عنہ کے پاس بھیجا، میں نے ان سے (اس کے متعلق) پوچھا تو سیدنا عمران رضی اللہ عنہ کہنے لگے: چاہے تو اپنے غلام کو آزاد کر دیں یا پھر قسم کا کفارہ دے دیں، بے شک رسول اللہ صلی اللہ علیہ وسلم ہمیں صدقہ کرنے کی ترغیب دیتے تھے اور مثلہ کرنے سے منع فرماتے تھے، ہیاج رضی اللہ عنہ کہتے ہیں: میں سیدنا سمرہ بن جندب رضی اللہ عنہ کے پاس آیا تو انہوں نے بھی وہی سیدنا عمران بن حصین رضی اللہ عنہ والی بات کی۔ [المنتقى ابن الجارود/كتاب الطلاق/حدیث: 1056]

سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں ایک مہم پر روانہ کیا اور فرمایا: اگر آپ کو فلاں فلاں دو قریشی آدمی مل جائیں تو انہیں آگ میں جلا دینا، پھر جب ہم نے روانگی کا ارادہ کیا تو آپ صلی اللہ علیہ وسلم نے فرمایا: میں نے آپ کو فلاں فلاں کو آگ میں جلانے کا حکم دیا تھا لیکن آگ کے ساتھ صرف اللہ تعالیٰ ہی عذاب دے سکتا ہے، اگر وہ مل جائیں تو انہیں قتل کر دینا۔ [المنتقى ابن الجارود/كتاب الطلاق/حدیث: 1057]

سیدنا فرات بن حیان رضی اللہ عنہ بیان کرتے ہیں کہ وہ ابو سفیان کے جاسوس اور حلیف تھے، رسول اللہ صلی اللہ علیہ وسلم نے انہیں قتل کرنے کا حکم دے رکھا تھا، وہ انصاریوں کے ایک گروہ کے پاس سے گزرے تو کہنے لگے: میں مسلمان ہو گیا ہوں، ان میں سے ایک آدمی نے کہا: اللہ کے رسول! وہ تو کہتے ہیں کہ میں مسلمان ہوں، رسول اللہ صلی اللہ علیہ وسلم نے فرمایا: آپ میں سے بعض لوگ ایسے بھی ہیں جنہیں ہم ان کے ایمان کے سپرد کر دیتے ہیں، فرات بن حیان بھی انہی میں سے ہے۔ [المنتقى ابن الجارود/كتاب الطلاق/حدیث: 1058]

سیدنا عبد الله بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: روز قیامت تک گھوڑوں کی پیشانی کے بالوں میں خیر رکھی گئی ہے۔ ابن یحییٰ کی روایت میں یہ الفاظ ہیں: قیامت کے دن تک کے لیے۔ [المنتقى ابن الجارود/كتاب الطلاق/حدیث: 1059]

سیدنا سائب بن یزید رضی اللہ عنہ بیان کرتے ہیں کہ غزوہ احد کے دن نبی صلی اللہ علیہ وسلم پر دو زرہیں تھیں۔ [المنتقى ابن الجارود/كتاب الطلاق/حدیث: 1060]

سیدنا جابر رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: نبی کو یہ مناسب نہیں ہے کہ اسلحہ پہنے اور جنگ کیے بغیر اتار دے۔ [المنتقى ابن الجارود/كتاب الطلاق/حدیث: 1061]

خالد بن یزید رحمہ اللہ کہتے ہیں کہ میں تیراندازی میں ماہر تھا، سیدنا عقبہ جہنی رضی اللہ عنہ مجھے بلا کر کہتے: خالد! آئیں ہمارے ساتھ تیراندازی کریں، ایک دن میں لیٹ ہو گیا تو انہوں نے کہا: آئیں میں آپ کو رسول اللہ صلی اللہ علیہ وسلم کی حدیث بیان کرتا ہوں اور جو بات آپ نے مجھ سے کہی تھی آپ کو بتاتا ہوں، میں نے رسول اللہ صلی اللہ علیہ وسلم کو فرماتے ہوئے سنا: اللہ تعالیٰ ایک تیر کی وجہ سے تین آدمیوں کو جنت میں داخل فرمائیں گے: تیر بنانے والا جو حصول ثواب کی نیت سے بناتا ہے، تیر چلانے والا، تیر انداز کو تیر پکڑانے والا۔ تیراندازی اور گھڑ سواری کریں، گھڑ سواری کی بہ نسبت تیراندازی مجھے زیادہ پسند ہے۔ تین طرح کے کھیل جائز ہیں: گھوڑے کو سکھانا اور سدھارنا، بیوی سے کھیل کود چھیڑ چھاڑ کرنا، تیر کمان کے ساتھ تیراندازی کرنا۔ جس نے تیراندازی سیکھی اور پھر اسے بے حیثیت سمجھ کر ترک کر دیا تو اس نے ایک نعمت کی ناشکری کی۔ [المنتقى ابن الجارود/كتاب الطلاق/حدیث: 1062]