سیدنا عبد الله بن عمرو بن العاص رضی اللہ عنہما بیان کرتے ہیں کہ رسول الله صلی الله علیہ وسلم نے فرمایا: مسلمانوں کے خون (دیت میں) برابر ہیں، ان میں سے معمولی آدمی بھی امان دے سکتا ہے، اسی طرح دور کا رہائشی قریبی رہائشی کی موجودگی میں پناہ دے سکتا ہے، مخالفین کے مقابلے میں مسلمان ایک دوسرے کی مدد کریں، جن کی سواریاں زور آور ہوں وہ ان کے ساتھ رہیں جن کی سواریاں ضعیف ہیں اور جو فوجی دستہ بڑے لشکر سے الگ ہو کر کسی مہم پر جائے تو وہ اپنے اس بڑے لشکر کو بھی مال غنیمت میں شریک کرے، کسی مؤمن کو کافر کے بدلے قتل نہ کیا جائے اور نہ ہی ذمی کو اس کی مدت معاہدہ کے دوران قتل کیا جائے۔ [المنتقى ابن الجارود/كتاب الطلاق/حدیث: 1073]

سیدنا عبد الله بن عمر رضی اللہ عنہما بیان کرتے ہیں کہ رسول الله صلی الله علیہ وسلم نے نجد کی طرف ایک لشکر روانہ کیا، پھر اسی لشکر سے ایک دستہ (الگ مہم پر) روانہ کیا جس میں سیدنا عبد الله بن عمر رضی اللہ عنہما بھی شامل تھے، وہ بیان کرتے ہیں: لشکر کے ہر فرد کو بارہ بارہ اونٹ ملے اور اس دستے کو جس میں سیدنا عبد الله بن عمر رضی اللہ عنہما بھی تھے ایک ایک اونٹ اضافی دیا گیا، دستے والوں کے تیرہ تیرہ اونٹ ہو گئے اور (باقی) لشکر والوں کے بارہ بارہ۔ [المنتقى ابن الجارود/كتاب الطلاق/حدیث: 1074]

سیدنا سلمہ بن اکوع رضی اللہ عنہ بیان کرتے ہیں کہ نبی کریم صلی الله علیہ وسلم نے فرمایا: ابو قتادہ آج کے بہترین شہسوار ہیں اور سلمہ ہمارے آج کے بہترین پیادہ ہیں۔ پھر آپ نے مجھے شہسوار اور پیادہ دونوں (والے) حصے دیے۔ [المنتقى ابن الجارود/كتاب الطلاق/حدیث: 1075]

سیدنا ابو قتادہ رضی اللہ عنہ بیان کرتے ہیں کہ ہم رسول الله صلی الله علیہ وسلم کی معیت میں غزوہ حنین کے لیے روانہ ہوئے، جب ہم برسر پیکار ہوئے تو مسلمانوں میں افراتفری پھیل گئی، کہتے ہیں: میں نے ایک مشرک کو دیکھا کہ اس نے ایک مسلمان کو قابو میں لیا ہوا ہے، میں گھوم کر اس کے پیچھے آیا اور اس کی گردن کے پٹھے پر تلوار کا وار کیا، وہ پلٹ کر میری طرف آیا اور مجھے اتنے زور سے بھینچا کہ مجھے موت کی تلخی یاد آ گئی، پھر اسے موت آ گئی تو اس نے مجھے چھوڑ دیا، میں سیدنا عمر بن خطاب رضی اللہ عنہ سے ملا تو انہیں کہا: آج لوگوں کو شکست کیوں ہو گئی ہے؟ انہوں نے کہا: الله تعالیٰ کو یہی منظور تھا۔ کہتے ہیں: پھر سب لوگ واپس آگئے اور رسول الله صلی الله علیہ وسلم تشریف فرما ہوئے تو آپ نے فرمایا: جس نے کسی کافر کو قتل کیا اور اس کے پاس ثبوت بھی ہو تو اس مقتول کا مال و متاع اسی (قاتل) کو ملے گا۔ ابو قتادہ رضی اللہ عنہ کہتے ہیں: میں کھڑا ہو گیا پھر یہ سوچ کر بیٹھ گیا کہ میری گواہی کون دے گا؟ آپ نے (دوبارہ) فرمایا: جس نے کسی کافر کو قتل کیا اور اس کے پاس ثبوت بھی ہو تو اس مقتول کا مال و متاع اسی (قاتل) کو ملے گا۔ (ابو قتادہ) کہتے ہیں: میں کھڑا ہو گیا اور پھر یہ سوچ کر بیٹھ گیا کہ میری گواہی کون دے گا؟ آپ نے تیسری بار پھر یہی فرمایا تو میں کھڑا ہو گیا۔ رسول الله صلی الله علیہ وسلم نے مجھ سے پوچھا: ابو قتادہ! کیا بات ہے؟ کہتے ہیں: میں نے آپ کو پورا واقعہ سنا دیا۔ ایک آدمی کہنے لگا: الله کے رسول! یہ سچ کہتا ہے اور اس مقتول کا مال و متاع میرے پاس ہے، آپ ان کو راضی کر دیں۔ سیدنا ابو بکر صدیق رضی اللہ عنہ کہنے لگے: الله کی قسم! ایسا نہیں ہوگا، آپ ایسا نہیں کریں گے کہ الله کا شیر الله اور اس کے رسول کی حمایت میں جہاد کرے اور مال و متاع تجھے دے دیں۔ رسول الله صلی الله علیہ وسلم نے فرمایا: انہوں نے سچ کہا ہے، وہ سامان انہیں (ابو قتادہ کو) دے دیں۔ تو اس نے وہ مال مجھے دے دیا، میں نے ایک زرہ فروخت کر کے (محلہ) بنو سلمہ میں ایک باغ خرید لیا اور یہ وہ پہلا مال ہے جو میں نے اسلام میں حاصل کیا۔ مخرف کھجوروں کے باغ کو کہتے ہیں۔ [المنتقى ابن الجارود/كتاب الطلاق/حدیث: 1076]

سیدنا عوف بن مالک اشجعی اور سیدنا خالد بن ولید رضی اللہ عنہما بیان کرتے ہیں کہ نبی کریم صلی الله علیہ وسلم نے سلب (مقتول کا سامان) سے خمس نہیں نکالا۔ [المنتقى ابن الجارود/كتاب الطلاق/حدیث: 1077]

سیدنا حبیب بن مسلمہ رضی اللہ عنہ بیان کرتے ہیں کہ نبی کریم صلی اللہ علیہ وسلم خمس نکالنے کے بعد ایک چوتھائی عطیہ دیا کرتے تھے۔ [المنتقى ابن الجارود/كتاب الطلاق/حدیث: 1078]

سیدنا حبیب بن مسلمہ رضی اللہ عنہ بیان کرتے ہیں کہ رسول اللہ صلی اللہ علیہ وسلم ابتدائے جہاد میں خمس نکالنے کے بعد ایک چوتھائی عطیہ دیا کرتے تھے اور جہاد سے لوٹنے کے بعد ایک تہائی۔ [المنتقى ابن الجارود/كتاب الطلاق/حدیث: 1079]

سیدنا عبد الله بن عمرو رضی اللہ عنہ بیان کرتے ہیں کہ رسول الله صلی الله علیہ وسلم نے فرمایا: میری چادر واپس کر دیں، میری چادر واپس کر دیں، الله کی قسم! اگر میرے پاس تہامہ کے درختوں کے بقدر اونٹ ہوتے تو میں آپ کے درمیان تقسیم کر دیتا اور آپ مجھے بخیل، بزدل اور جھوٹا نہ پاتے۔ پھر ایک اونٹ کے پاس کھڑے ہوئے اور اس کی کوہان سے ایک بال لے کر فرمانے لگے: لوگو! آپ کی غنیمتوں سے خمس کے علاوہ اتنا بھی میرے لیے جائز نہیں اور خمس بھی آپ کی طرف ہی لوٹا دیا جاتا ہے، چنانچہ سوئی اور دھاگے تک ادا کر دیں، کیونکہ خیانت قیامت کے روز خائن کے لیے عار، جہنم اور رسوائی کا ذریعہ ہوگی۔ ایک انصاری بالوں کی رسی کا گچھا لے کر آیا اور کہنے لگا: الله کے رسول! میں نے یہ رسی اپنے اونٹ کی چادر سینے کے لیے لی تھی، تو رسول الله صلی الله علیہ وسلم نے فرمایا: میرے حصے کی رسی آپ کو دے دی۔ (باقیوں کا میں ذمہ دار نہیں) وہ کہنے لگا: اگر معاملہ اس قدر سخت ہے تو پھر مجھے اس کی کوئی ضرورت نہیں۔ [المنتقى ابن الجارود/كتاب الطلاق/حدیث: 1080]

سیدنا زید بن خالد جہنی رضی اللہ عنہ بیان کرتے ہیں کہ ایک مسلمان آدمی خیبر کے دن وفات پا گیا، رسول الله صلی الله علیہ وسلم کو اس کے متعلق بتایا گیا کہ آپ اس کا جنازہ پڑھیں تو آپ نے فرمایا: خود ہی اپنے ساتھی کا جنازہ پڑھ لیں۔ لوگوں کے چہرے متغیر ہو گئے، جب رسول الله صلی الله علیہ وسلم نے ان کی حالت دیکھی تو فرمایا: آپ کے اس ساتھی نے مال غنیمت میں خیانت کی ہے۔ صحابی کہتے ہیں: ہم نے اس کے سامان کی تلاشی لی تو یہودیوں کا ایک موتی ہمیں ملا۔ الله کی قسم! اس کی قیمت دو درہم کے برابر بھی نہیں تھی۔ [المنتقى ابن الجارود/كتاب الطلاق/حدیث: 1081]

سیدنا عبد الله بن عمرو رضی اللہ عنہ بیان کرتے ہیں کہ رسول الله صلی الله علیہ وسلم، سیدنا ابو بکر اور سیدنا عمر رضی اللہ عنہما نے خائن کو کوڑوں سے مارا، اس کا سامان جلا دیا اور اس کا حصہ روک لیا۔ [المنتقى ابن الجارود/كتاب الطلاق/حدیث: 1082]