حضرت ابوہریرہ رضی اللہ عنہ فرماتے ہیں کہ جس شخص نے مردوں یا عورتوں سے لواطت کی اس نے کفر کیا۔ [مصنف ابن ابي شيبه/كتاب النكاح/حدیث: 17650]

حضرت ابوہریرہ رضی اللہ عنہ فرماتے ہیں کہ جس شخص نے کسی حائضہ سے جماع کیا یا کسی عورت سے لواطت کی تو اس نے محمد صلی اللہ علیہ وسلم پر نازل ہونی والی شریعت کا انکار کیا۔ [مصنف ابن ابي شيبه/كتاب النكاح/حدیث: 17651]

حضرت خزیمہ بن ثابت رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ اللہ تعالیٰ حق کہنے سے نہیں شرماتا، تم عورتوں سے لواطت نہ کرو۔ [مصنف ابن ابي شيبه/كتاب النكاح/حدیث: 17652]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ اللہ تعالیٰ اس شخص کو رحمت کی نظر سے نہیں دیکھیں گے جس نے عورت کی دبر میں دخول کیا۔ [مصنف ابن ابي شيبه/كتاب النكاح/حدیث: 17653]

حضرت ابو معتمر یا ابو جویریہ فرماتے ہیں کہ حضرت علی رضی اللہ عنہ نے منبر پر اعلان کیا کہ مجھ سے سوال کرو، مجھ سے سوال کرو۔ ایک آدمی نے کہا کہ کیا عورتوں کی دبر میں دخول کیا جاسکتا ہے۔ انہوں نے فرمایا کہ اللہ تجھے گھٹیا کرے تو نے گھٹیا سوال کیا۔ پھر فرمایا کہ کیا تم نے اللہ تعالیٰ کا یہ فرمان نہیں پڑھا: کیا تم بےحیائی کا کام کرتے ہو۔ (الآیۃ) [مصنف ابن ابي شيبه/كتاب النكاح/حدیث: 17654]

حضرت عائشہ رضی اللہ عنہا فرماتی ہیں کہ جب ہم میں سے کوئی حالت حیض میں ہوتی تو حضور صلی اللہ علیہ وسلم اسے ازار پہننے کا حکم دیتے اور پھر ازار کے اوپر سے تعلق فرماتے۔ [مصنف ابن ابي شيبه/كتاب النكاح/حدیث: 17655]

حضرت عائشہ رضی اللہ عنہا فرماتی ہیں کہ جب ہم میں سے کوئی حالت حیض میں ہوتی تو حضور صلی اللہ علیہ وسلم اسے حیض کے بہاؤ کے دوران ازار پہننے کا حکم دیتے اور پھر ازار کے اوپر سے تعلق فرماتے۔ اور تم میں کون اس حد تک اپنی شہوت پر قابو پاسکتا ہے جتنا حضور صلی اللہ علیہ وسلم کو اپنے نفس پر قابو تھا۔ [مصنف ابن ابي شيبه/كتاب النكاح/حدیث: 17656]

ام المومنین حضرت میمونہ رضی اللہ عنہا سے بھی یونہی منقول ہے۔ [مصنف ابن ابي شيبه/كتاب النكاح/حدیث: 17657]

حضرت ام سلمہ رضی اللہ عنہا فرماتی ہیں کہ میں بستر پر حضور صلی اللہ علیہ وسلم کے ساتھ تھی کہ میں حائضہ ہوگئی، میں پیچھے ہٹنے لگی تو آپ صلی اللہ علیہ وسلم نے فرمایا کہ تم اپنی جگہ پر رہو۔ تمہارے لئے اتنا کافی ہے کہ تم اپنے اوپر کپڑا ڈال لو۔ [مصنف ابن ابي شيبه/كتاب النكاح/حدیث: 17658]

حضرت ام سلمہ رضی اللہ عنہا فرماتی ہیں کہ اگر حائضہ کی شرمگاہ پر کپڑا ہو تو اس کے ساتھ لیٹنے میں کوئی حرج نہیں۔ [مصنف ابن ابي شيبه/كتاب النكاح/حدیث: 17659]