حضرت حسن رحمہ اللہ فرماتے ہیں کہ ہر وارث کے نفقہ پر مجبور کیا جائے گا۔ [مصنف ابن ابي شيبه/كتاب الطلاق/حدیث: 20314]

حضرت حسن رحمہ اللہ فرماتے ہیں کہ حضرت عمر رضی اللہ عنہ نے ایک آدمی کو اپنے بھتیجے کا نفقہ دینے پر مجبور کیا تھا۔ [مصنف ابن ابي شيبه/كتاب الطلاق/حدیث: 20315]

حضرت زہری رحمہ اللہ فرماتے ہیں کہ آدمی کو اس کے والدین کا نفقہ دینے پر مجبور کیا جائے گا اور وہ ان پر نیکی کے ساتھ خرچ کرے گا۔ [مصنف ابن ابي شيبه/كتاب الطلاق/حدیث: 20316]

حضرت ابراہیم رحمہ اللہ فرماتے ہیں کہ اگر کسی کا بھائی تنگدست ہو تو اسے اس پر خرچ کرنے پر مجبور کیا جائے گا۔ [مصنف ابن ابي شيبه/كتاب الطلاق/حدیث: 20317]

حضرت حسن رحمہ اللہ فرماتے ہیں کہ اگر دادا مالدار ہو تو اسے تنگدست پوتے پر خرچ کرنے کا حکم دیا جائے گا۔ [مصنف ابن ابي شيبه/كتاب الطلاق/حدیث: 20318]

حضرت عمرو رحمہ اللہ فرماتے ہیں کہ ایک آدمی نے حضرت جابر بن زید رحمہ اللہ سے کہا کہ میرے والد مجھے اپنے مال سے محروم رکھتے ہیں اور کہتے ہیں کہ میں تجھ پر خرچ نہیں کروں گا۔ انہوں نے فرمایا کہ اپنے باپ کے مال میں سے نیکی کے ساتھ لے لو۔ [مصنف ابن ابي شيبه/كتاب الطلاق/حدیث: 20319]

حضرت حسن رحمہ اللہ سے سوال کیا گیا کہ اگر کوئی شخص اپنی بیوی کو ”اے چھوٹی بہن“ کہہ دے تو کیا حکم ہے؟ انہوں نے فرمایا کہ یہ اور دو کھجوریں ایک جیسی چیز ہیں۔ [مصنف ابن ابي شيبه/كتاب الطلاق/حدیث: 20320]

حضرت عمرو بن شعیب رحمہ اللہ سے روایت ہے کہ رسول اللہ صلی اللہ علیہ وسلم نے ایک آدمی کو سنا کہ وہ اپنی بیوی کو اے چھوٹی بہن کہہ رہا تھا۔ آپ نے فرمایا کہ اسے اے چھوٹی بہن مت کہو۔ [مصنف ابن ابي شيبه/كتاب الطلاق/حدیث: 20321]

حضرت حسن رحمہ اللہ فرماتے ہیں کہ اگر ایک عورت نے اپنے خاوند کی دستاویز چھپا دی تو آدمی نے کہا کہ اگر تو نے اسے نہ چھپایا ہو تو تجھے تین طلاق۔ حضرت حسن رحمہ اللہ فرماتے ہیں کہ اگر آدمی سچا ہے تو وہ اس کی بیوی رہے گی۔ [مصنف ابن ابي شيبه/كتاب الطلاق/حدیث: 20322]

حضرت ابو داود رحمہ اللہ فرماتے ہیں کہ میں نے حضرت حماد رحمہ اللہ کو فرماتے سنا کہ اس معاملے میں اس کی دینداری دیکھی جائے گی۔ [مصنف ابن ابي شيبه/كتاب الطلاق/حدیث: 20323]