حضرت عمر بن خطاب رضی اللہ عنہ فرماتے ہیں کہ مجھے سمندری سفر کرنے والے اور تجارت کی خاطر ہجرت کرنے والے پر بہت تعجب ہے۔ [مصنف ابن ابي شيبه/كتاب الجهاد/حدیث: 20560]

حضرت ابن عمر رضی اللہ عنہما فرماتے ہیں کہ اللہ تعالیٰ مجھ سے سمندر کا سفر کرنے والے لشکر کے بارے میں کبھی سوال نہیں کرے گا، یعنی (انہیں) خطرے میں ڈالنے کے بارے میں۔ [مصنف ابن ابي شيبه/كتاب الجهاد/حدیث: 20561]

ابو راشد حبرانی رحمہ اللہ کہتے ہیں کہ وہ حضرت مقداد رضی اللہ عنہ کے پاس آئے، وہ صرافوں کے صندوقوں میں سے ایک صندوق پر بیٹھے تھے۔ ان کا جسم اتنا وزنی اور زیادہ تھا کہ صندوق سے باہر نکل رہا تھا۔ میں نے ان سے کہا کہ اے ابو الاسود رضی اللہ عنہ: اللہ تعالیٰ نے آپ جیسے لوگوں کو معذور قرار دیا ہے۔ انہوں نے فرمایا کہ سورة البحوث یعنی سورۃ التوبہ کی آیت { انْفِرُوا خِفَافًا وَثِقَالاَ } نے ہمارے معذور ہونے کا انکار کیا ہے۔ [مصنف ابن ابي شيبه/كتاب الجهاد/حدیث: 20562]

حضرت عبد اللہ بن زبیر رضی اللہ عنہ فرماتے ہیں کہ میرے بنو مرہ کے رضاعی والد نے مجھے بتایا کہ انہوں نے جنگ مؤتہ میں حضرت جعفر رضی اللہ عنہ کو دیکھا کہ وہ اپنے شقراء گھوڑے سے اترے، اس کی کونچیں کاٹیں پھر آگے بڑھے اور لڑتے لڑتے شہید ہوگئے۔ [مصنف ابن ابي شيبه/كتاب الجهاد/حدیث: 20563]

حضرت ابن عمر رضی اللہ عنہما فرماتے ہیں کہ جنگ یمامہ میں، میں حضرت عبد اللہ بن مخرمہ رضی اللہ عنہ کے پاس آیا، وہ زخموں سے چور زمین پر پڑے تھے۔ میں ان کے پاس کھڑا ہوا تو انہوں نے پوچھا: اے عبد اللہ بن عمر رضی اللہ عنہما! کیا روزے دار نے افطار کرلیا ہے؟ میں نے کہا: جی ہاں! انہوں نے فرمایا کہ پھر مجھے اس ڈھال میں پانی دے دو تاکہ میں افطار کرلوں۔ میں پانی لینے حوض پر گیا تو وہ خون سے بھرا ہوا تھا۔ میں نے خون کو الگ کر کے پانی لیا، جب میں ان کے پاس آیا تو ان کی روح پرواز کرچکی تھی۔ [مصنف ابن ابي شيبه/كتاب الجهاد/حدیث: 20564]

حضرت سعید بن مسیب رحمہ اللہ فرماتے ہیں کہ حضرت سعد بن ابی وقاص رضی اللہ عنہ نے غزوہ احد میں تمام مسلمانوں سے بڑھ کر لڑائی کی۔ [مصنف ابن ابي شيبه/كتاب الجهاد/حدیث: 20565]

حضرت جابر بن سمرہ رضی اللہ عنہ فرماتے ہیں کہ اللہ کے راستے میں سب سے پہلے حضرت سعد رضی اللہ عنہ نے تیر چلایا۔ [مصنف ابن ابي شيبه/كتاب الجهاد/حدیث: 20566]

حضرت ابو الدرداء رضی اللہ عنہ فرماتے ہیں کہ اگر کسی آدمی نے اللہ کے راستے میں کوئی چیز خرچ کرنے کی وصیت کی تو وہ چیز مجاہدین کو دی جائے گی۔ [مصنف ابن ابي شيبه/كتاب الجهاد/حدیث: 20567]

حضرت ابو الدرداء رضی اللہ عنہ فرماتے ہیں کہ جس شخص نے اللہ کے راستے میں ایک روزہ رکھا، اللہ تعالیٰ اس کے اور جہنم کے درمیان ایک ایسی خندق بنا دیتے ہیں جس کا فاصلہ زمین و آسمان کے خلاء کے برابر ہے۔ [مصنف ابن ابي شيبه/كتاب الجهاد/حدیث: 20568]

حضرت عمر رضی اللہ عنہ فرماتے ہیں کہ اگر میں اللہ کے راستے میں نہ چلوں، میں اللہ کے راستے میں اپنی پیشانی کو مٹی پر نہ رکھوں اور ان لوگوں کی ہم نشینی اختیار نہ کروں جو اچھے کلام کو اس طرح چنتے ہیں جیسے عمدہ کھجوروں کو چنا جاتا ہے تو میری خواہش ہوگی کہ میرا انتقال ہوجائے۔ [مصنف ابن ابي شيبه/كتاب الجهاد/حدیث: 20569]