حضرت ابو قتادہ رضی اللہ عنہ فرماتے ہیں کہ جب ہم غزوہ تبوک سے واپس آئے تو رسول اللہ صلی اللہ علیہ وسلم نے فرمایا کہ اگر تم میں سے کوئی پیچھے رہ جانے والوں سے ملے تو نہ ان سے بات کرے اور نہ ان کی ہم نشینی اختیار کرے۔ [مصنف ابن ابي شيبه/كتاب الجهاد/حدیث: 20540]

حضرت عمر رضی اللہ عنہ فرماتے ہیں کہ تم پر حج لازم ہے، یہ ایک نیک عمل ہے، جس کا اللہ تعالیٰ نے حکم دیا ہے، اور جہاد حج سے افضل ہے۔ [مصنف ابن ابي شيبه/كتاب الجهاد/حدیث: 20541]

حضرت عبد اللہ بن عمرو رضی اللہ عنہ رضی اللہ عنہ فرماتے ہیں کہ جنت میں ایک محل ہے جس کا نام عدن ہے۔ اس کے اردگرد چراگاہیں ہیں۔ اس کے پانچ ہزار دروازے ہیں۔ ہر دروازے سے صرف نبی، صدیق، شہید یا عادل امام ہی داخل ہوسکتا ہے۔ [مصنف ابن ابي شيبه/كتاب الجهاد/حدیث: 20542]

حضرت عبد اللہ رضی اللہ عنہ فرماتے ہیں کہ جنگ کے وقت نیند آنا اللہ کی طرف سے نازل ہونے والی طمانیت ہے اور نماز کے وقت نیند آنا شیطان کی طرف سے ہے۔ پھر انہوں نے اس آیت کی تلاوت کی: {إذْ یُغَشَاکُم النُّعَاسَ أَمَنَۃً مِنْہُ } [مصنف ابن ابي شيبه/كتاب الجهاد/حدیث: 20543]

حضرت انس رضی اللہ عنہ فرماتے ہیں کہ حضرت ابو طلحہ رضی اللہ عنہ حضور صلی اللہ علیہ وسلم کے آگے کھڑے تیر چلا رہے تھے اور حضور صلی اللہ علیہ وسلم ان کے پیچھے تھے، حضور صلی اللہ علیہ وسلم نے سر مبارک بلند کر رکھا تھا، اور حضرت ابو طلحہ رضی اللہ عنہ بھی اپنا سر بلند کر کے کہہ رہے تھے کہ اے اللہ کے رسول! میں آپ سے پہلے نشانہ بنوں گا۔ [مصنف ابن ابي شيبه/كتاب الجهاد/حدیث: 20544]

حضرت ابو طلحہ رضی اللہ عنہ فرماتے ہیں کہ میں غزوہ احد کے دن ان لوگوں میں سے تھا جن پر اللہ تعالیٰ نے سکون کی نیند طاری کی۔ [مصنف ابن ابي شيبه/كتاب الجهاد/حدیث: 20545]

حضرت ابو طلحہ رضی اللہ عنہ کی روایت حضرت زبیر رضی اللہ عنہ سے بھی منقول ہے۔ [مصنف ابن ابي شيبه/كتاب الجهاد/حدیث: 20546]

حضرت انس رضی اللہ عنہ فرماتے ہیں کہ جب حضرت ابو موسیٰ رضی اللہ عنہ کو بصرہ بھیجا گیا تو ان کے ساتھ جانے والوں میں حضرت براء رضی اللہ عنہ بھی تھے۔ وہ ان کے نائبین اور وزراء میں سے تھے۔ حضرت ابو موسیٰ رضی اللہ عنہ ان سے فرمایا کرتے تھے کہ آپ اپنے لیے کوئی عہدہ منتخب کرلیجئے۔ حضرت براء رضی اللہ عنہ نے ان سے فرمایا کہ میں جو آپ سے طلب کروں گا آپ مجھے دیں گے؟ حضرت ابو موسیٰ رضی اللہ عنہ نے فرمایا کہ جی ہاں! حضرت براء رضی اللہ عنہ نے فرمایا کہ میں آپ سے کسی شہر کی امارت یا محصولات کی وصولی نہیں مانگتا، بلکہ میں آپ سے سوال کرتا ہوں کہ آپ مجھے میری کمان، میرا گھوڑا، میرا نیزہ اور میری تلوار دے دیں اور مجھے اللہ کے راستے میں جہاد کے لیے جانے دیں۔ حضرت ابو موسیٰ رضی اللہ عنہ نے حضرت براء رضی اللہ عنہ کو ایک لشکر کے ساتھ بھیج دیا۔ وہ اس لشکر کے سب سے پہلے شہید تھے۔ [مصنف ابن ابي شيبه/كتاب الجهاد/حدیث: 20547]

حضرت انس رضی اللہ عنہ فرماتے ہیں کہ ایک مرتبہ حضرت براء رضی اللہ عنہ نے ایک شعر گنگنایا۔ میں نے ان سے کہا اے بھائی! آپ شعر گنگنا رہے ہیں، اگر یہ آپ کا آخری کلام ہو اتو کیا بنے گا؟ انہوں نے فرمایا: کہ میں اپنے بستر پر نہیں مروں گا، میں نے ننانوے مشرکوں اور منافقوں کو قتل کیا ہے۔ [مصنف ابن ابي شيبه/كتاب الجهاد/حدیث: 20548]

حضرت انس بن مالک رضی اللہ عنہ فرماتے ہیں کہ ان کے چچا کسی وجہ سے غزوہ بدر میں شریک نہ ہو سکے۔ انہوں نے کہا کہ میں رسول اللہ صلی اللہ علیہ وسلم کی معیت میں پہلی لڑائی میں تو شریک نہ ہوسکا، لیکن اگر اللہ نے مجھے دوبارہ کافروں سے لڑنے کا موقع دیا تو اللہ تعالیٰ دیکھ لے گا کہ میں کیا کرتا ہوں! پھر غزوہ أحد میں جب مسلمان بکھر گئے تو میرے چچا نے کہا کہ اے اللہ! مسلمانوں نے جو کیا میں اس پر تجھ سے معذرت کرتا ہوں اور مشرکین جو کچھ لے کر آئے ہیں اس سے تیرے سامنے براءت کا اظہار کرتا ہوں۔ پھر وہ آگے بڑھے تو انہیں احد کے پاس حضرت سعد رضی اللہ عنہ ملے۔ حضرت سعد رضی اللہ عنہ نے ان سے کہا کہ میں آپ کے ساتھ ہوں۔ حضرت سعد رضی اللہ عنہ فرماتے ہیں کہ جیسی لڑائی انہوں نے کی میں ایسی لڑائی کی طاقت نہ رکھتا تھا۔ ان کے جسم میں بیس سے زیادہ تلواروں، نیزوں اور تیروں کے نشان تھے۔ ہم ان کے اور ان کے ساتھیوں کے بارے میں کہا کرتے تھے کہ یہ آیت ان کے بارے میں نازل ہوئی ہے:: ”ان میں سے بعض نے تو اپنی منت کو پورا کردیا اور بعض انتظار کر رہے ہیں۔“ (الاحزاب: ٢٣) [مصنف ابن ابي شيبه/كتاب الجهاد/حدیث: 20549]