حضرت خالد بن ولید رضی اللہ عنہ فرماتے ہیں کہ اللہ کے راستے میں زیادہ جہاد کرنے کی وجہ سے میں بہت سا قرآن نہیں سیکھ سکا۔ [مصنف ابن ابي شيبه/كتاب الجهاد/حدیث: 20570]

حضرت خالد بن ولید رضی اللہ عنہ فرماتے ہیں کہ روئے زمین پر ایسی رات جس میں مجھے ایک بیٹے کی خوشخبری دی جائے اور میری طرف ایک ایسی دلہن بھیجی جائے جس سے میں محبت رکھتا ہوں، اس رات سے زیادہ پسند نہیں، جو سخت پالے (برف) والی ہو، میں مہاجرین کے ایک لشکر کے ساتھ اسے بسر کروں اور صبح کو انہیں لے کر دشمن پر حملہ کر دوں۔ پس تم پر جہاد لازم ہے۔ [مصنف ابن ابي شيبه/كتاب الجهاد/حدیث: 20571]

حضرت خالد بن ولید رضی اللہ عنہ فرماتے ہیں کہ خدا کی قسم! میں نہیں جانتا کہ میں کس دن سے زیادہ محبت کرتا ہوں۔ اس دن سے جس میں اللہ تعالیٰ مجھے شہادت عطا فرمائیں یا اس دن سے جس میں مجھے کوئی بڑا اعزاز دیا جائے۔ [مصنف ابن ابي شيبه/كتاب الجهاد/حدیث: 20572]

حضرت عبد اللہ بن سلام رضی اللہ عنہ فرماتے ہیں کہ اگر لڑائی کا وقت آجائے اور مجھ میں اٹھنے کی طاقت نہ ہو تو مجھے ایک چارپائی پر اٹھا کر صفوں کے درمیان رکھ دینا۔ [مصنف ابن ابي شيبه/كتاب الجهاد/حدیث: 20573]

حضرت خریم بن فاتک اسدی رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جس شخص نے اللہ کے راستے میں کچھ خرچ کیا اسے سات سو گنا اجر عطا کردیا جائے گا۔ [مصنف ابن ابي شيبه/كتاب الجهاد/حدیث: 20574]

حضرت ابن عباس رضی اللہ عنہما فرماتے ہیں کہ میں نے حضرت کعب رحمہ اللہ سے جنت الماویٰ کے بارے میں سوال کیا تو انہوں نے فرمایا: کہ یہ وہ جنت ہے جس میں سبز پرندے ہیں کہ ان میں شہداء کی روحیں ہوں گی۔ [مصنف ابن ابي شيبه/كتاب الجهاد/حدیث: 20575]

حضرت ابو سعید رضی اللہ عنہ سے روایت ہے کہ رسو ل اللہ (صلی اللہ علیہ وآلہ وسلم) نے ارشاد فرمایا: کہ اللہ کے رستے میں جہاد کرنے والے کے بارے میں اللہ تعالیٰ نے ذمہ لیا ہے کہ یا تو اللہ تعالیٰ اسے (موت دے کر) اپنی مغفرت اور رحمت کی طرف لے جائیں گے یا وہ اجر اور مال غنیمت کے ساتھ واپس لوٹ آئے گا۔ اللہ کے رستے میں جہاد کرنے والے کی مثال اس شخص کی سی ہے جو دن کو روزہ رکھے اور رات کو قیام کرے اور واپس لوٹنے تک اپنے ان اعمال میں کوئی سستی نہ برتے۔ [مصنف ابن ابي شيبه/كتاب الجهاد/حدیث: 20576]

حضرت ابو منیب جرشی رحمہ اللہ فرماتے ہیں کہ ایک آدمی حضرت تمیم داری رضی اللہ عنہ کا مہمان بنا اور ان کے ساتھ سفر پر نکلا۔ اس نے دیکھا کہ سفر میں حضرت تمیم داری رضی اللہ عنہ اپنے گھر کے معمول سے کم عبادت کر رہے ہیں۔ اس آدمی نے ان سے کہا کہ اللہ آپ پر رحم فرمائے! میں دیکھ رہا ہوں کہ آپ نے اپنے گھر کے معمول سے کم عبادت کی ہے؟ انہوں نے فرمایا: کیا میرے لیے یہ کافی نہیں کہ مجھے دن کو روزہ رکھنے والے اور رات کو قیام کرنے والے کے برابر ثواب مل رہا ہے؟ [مصنف ابن ابي شيبه/كتاب الجهاد/حدیث: 20577]

حضرت محمد بن سیرین رحمہ اللہ فرماتے ہیں کہ ایک مرتبہ مشرکین کے گھڑ سواروں نے مدینہ کی چراگاہ پر حملہ کردیا۔ حضور صلی اللہ علیہ وسلم ان کو بھگانے کے لیے روانہ ہوئے۔ حضرت ابو قتادہ رضی اللہ عنہ تھوڑی دیر بعد آئے انہوں نے بالوں پر کنگھی کی ہوئی تھی۔ حضور صلی اللہ علیہ وسلم نے ان سے فرمایا کہ شاید تمہارے بالوں نے تمہیں روکے رکھا۔ انہوں نے عرض کیا کہ میں آپ کے پاس ایک آدمی قیدی بنا کر لاؤں گا۔ راوی کہتے ہیں کہ وہ لوگ بال بڑھا کر گھنے رکھنا پسند کرتے تھے۔ [مصنف ابن ابي شيبه/كتاب الجهاد/حدیث: 20578]

حضرت ابو عبد الرحمن سلمی رحمہ اللہ فرماتے ہیں کہ اللہ کے راستے میں جہاد کرنے والا ایک بیٹا میرے نزدیک ایک لاکھ سے بہتر ہے۔ [مصنف ابن ابي شيبه/كتاب الجهاد/حدیث: 20579]