حضرت ابن عمر رضی اللہ عنہما سے روایت ہے کہ رسو ل اللہ صلی اللہ علیہ وسلم نے ارشاد فرمایا کہ مجھے قیامت سے پہلے تلوار کے ساتھ بھیجا گیا ہے۔ یہاں تک کہ صرف ایک اللہ کی عبادت کی جائے اور ا س کے ساتھ کسی کو شریک نہ ٹھہرایا جائے، میرا رزق میرے نیزے کے نیچے ہے۔ میری مخالفت کرنے والے کا مقدر ذلت اور رسوائی ہے۔ جس نے کسی قوم کی مشابہت اختیار کی وہ انہی میں سے ہے۔ [مصنف ابن ابي شيبه/كتاب الجهاد/حدیث: 20550]

حضرت عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ ہمارا رب دو آدمیوں پر تعجب فرماتا ہے (یعنی ان کو دیکھ کر بہت خوش ہوتا ہے)۔ ایک وہ آدمی جو اپنی محبوب بیوی اور گھر والوں کے درمیان سے اپنا بستر اور لحاف چھوڑ کر میرے انعامات کی چاہت اور میرے عذاب کے ڈر سے نماز کے لیے کھڑا ہوجائے۔ دوسرا وہ آدمی جو اللہ کے راستے میں جہاد کرے، اس کے ساتھی بھاگ جائیں، اسے میدان جنگ سے بھاگنے کا وبال اور واپس پلٹنے کا اجر یاد آئے اور وہ واپس پلٹ کر دشمن پر لپکے یہاں تک کہ اس کا خون بہا دیا جائے۔ اس پر اللہ تعالیٰ فرشتوں سے فرماتے ہیں کہ اے میرے فرشتو! میرے اس بندے کو دیکھو، یہ میرے انعامات کی چاہت اور میرے عذاب کے ڈر سے واپس پلٹا یہاں تک کہ اس کا خون بہا دیا گیا۔ [مصنف ابن ابي شيبه/كتاب الجهاد/حدیث: 20551]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم حضرت ام حرام بنت ملحان رضی اللہ عنہا کے گھر ٹیک لگائے تشریف فرما تھے کہ آپ صلی اللہ علیہ وسلم پر نیند طاری ہوگئی، کچھ دیر بعد آپ مسکراتے ہوئے بیدار ہوئے۔ حضرت بنت ملحان رضی اللہ عنہا نے آپ صلی اللہ علیہ وسلم سے مسکرانے کی وجہ پوچھی تو آپ صلی اللہ علیہ وسلم نے فرمایا کہ میری امت کے کچھ لوگ سبز سمندر میں جہاد کریں گے، وہ تختوں پر بیٹھے بادشاہوں کی طرح ہیں۔ حضرت ام حرام بنت ملحان رضی اللہ عنہا نے کہا کہ اے اللہ کے رسول! دعا فرما دیجئے کہ اللہ تعالیٰ مجھے بھی ان لوگوں میں شامل فرما دے۔ حضور صلی اللہ علیہ وسلم نے دعا فرمائی کہ اے اللہ! اسے بھی ان میں شامل فرما دے۔ اس کے بعد ان کا نکاح حضرت عبادہ بن صامت رضی اللہ عنہ سے ہوگیا۔ بعد ازیں وہ قرظہ کی بیٹی کے ساتھ سوار ہو کر سمندری سفر پر روانہ ہوئیں، واپس آتے ہوئے اپنی سواری سے گر کر شہید ہوگئیں اور وہیں دفن ہوئیں۔ [مصنف ابن ابي شيبه/كتاب الجهاد/حدیث: 20552]

حضرت عبد اللہ بن عمرو رضی اللہ عنہ فرماتے ہیں کہ سمندر میں ایک لڑائی لڑنا میرے نزدیک اللہ کے راستے میں بہت سا مال خرچ کرنے سے بہتر ہے جو قبول ہوجائے۔ [مصنف ابن ابي شيبه/كتاب الجهاد/حدیث: 20553]

حضرت علقمہ بن شہاب رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جسے میرے ساتھ جنگ کا موقع نہ مل سکا اسے چاہیے کہ سمندری جہاد میں حصہ لے، کیونکہ ایک سمندری جنگ خشکی پر لڑی جانے والی دو جنگوں سے افضل ہے۔ سمندر میں شہید ہونے والے کے لیے خشکی کے دو شہیدوں کے برابر اجر ہے۔ اللہ کے نزدیک افضل شہدائ، ”اصحاب الو کو ف“ ہیں۔ لوگوں نے پوچھا کہ اے اللہ کے رسول! ”اصحاب الو کو ف“ کون ہیں؟ آپ نے فرمایا: کہ جن کی سواریاں الٹ جائیں اور اس سے وہ شہید ہوجائیں۔ [مصنف ابن ابي شيبه/كتاب الجهاد/حدیث: 20554]

حضرت عبد اللہ بن عمرو رضی اللہ عنہ فرماتے ہیں کہ جہاد کے لیے سمندر میں سفر کرتے ہوئے جسے (سمندر کی وجہ سے) چکر آئیں وہ اس شخص کی طرح ہے جو خشکی پر لڑتے ہوئے خون میں لوٹ پوٹ ہو کر شہید ہوچکا ہو۔ [مصنف ابن ابي شيبه/كتاب الجهاد/حدیث: 20555]

حضرت عبد اللہ بن عمرو رضی اللہ عنہ فرماتے ہیں کہ جہاد کے لیے سمندر میں سفر کرتے ہوئے جسے (سمندر کی وجہ سے) چکر آئیں وہ اس شخص کی طرح ہے جو خشکی پر لڑتے ہوئے خون میں لوٹ پوٹ ہو کر شہید ہوچکا ہو۔ [مصنف ابن ابي شيبه/كتاب الجهاد/حدیث: 20556]

حضرت عبد اللہ بن عمرو رضی اللہ عنہ فرماتے ہیں کہ سمندر کا ایک غزوہ خشکی کے دس غزوات سے افضل ہے۔ جس نے جنگ کرتے ہوئے سمندر کو عبور کیا گویا اس نے زمین کی تمام وادیوں کو عبور کرلیا۔ [مصنف ابن ابي شيبه/كتاب الجهاد/حدیث: 20557]

حضرت عکرمہ رحمہ اللہ فرماتے ہیں کہ حضرت ابن عباس رضی اللہ عنہما سمندری جہاد پر روانہ ہوئے میں ان کے ساتھ تھا۔ [مصنف ابن ابي شيبه/كتاب الجهاد/حدیث: 20558]

حضرت مجاہد رحمہ اللہ فرماتے ہیں کہ حاجی، مجاہد اور عمرے کا ارادہ کرنے والے کے علاوہ کوئی سمندر کا سفر نہ کرے۔ [مصنف ابن ابي شيبه/كتاب الجهاد/حدیث: 20559]