حضرت حکم رحمہ اللہ نے آیت قرآنی { انْفِرُوا خِفَافًا وَثِقَالاَ } کی تفسیر مصروف اور فارغ سے کی ہے۔ [مصنف ابن ابي شيبه/كتاب الجهاد/حدیث: 20520]

حضرت عکرمہ رحمہ اللہ نے اس کی تفسیر جوان اور بوڑھوں سے کی ہے۔ [مصنف ابن ابي شيبه/كتاب الجهاد/حدیث: 20521]

حضرت مجاہد رحمہ اللہ { انْفِرُوا خِفَافًا وَثِقَالاَ } کے بارے میں فرماتے ہیں کہ ہم میں مریض، ضرورت مند، کمزور اور مصروف لوگ ہیں۔ [مصنف ابن ابي شيبه/كتاب الجهاد/حدیث: 20522]

حضرت حسن رحمہ اللہ فرماتے ہیں کہ اس سے مراد جوان اور بوڑھے ہیں۔ [مصنف ابن ابي شيبه/كتاب الجهاد/حدیث: 20523]

حضرت مکحول رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس شخص نے اللہ کے راستے میں ایک روزہ رکھا وہ جہنم سے سو خریف دور کردیا جاتا ہے۔ [مصنف ابن ابي شيبه/كتاب الجهاد/حدیث: 20524]

حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جب کوئی شخص اللہ کے راستے میں روزہ رکھتا ہے تو اس کی وجہ سے ستر خریف جہنم سے دور کردیا جاتا ہے۔ [مصنف ابن ابي شيبه/كتاب الجهاد/حدیث: 20525]

حضرت ابو سعید رضی اللہ عنہ کا اپنا قول بھی یہی منقول ہے۔ [مصنف ابن ابي شيبه/كتاب الجهاد/حدیث: 20526]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس شخص نے اللہ کے راستے میں ایک روزہ رکھا۔ اللہ تعالیٰ اسے جہنم سے ستر خریف دور فرما دیتے ہیں۔ [مصنف ابن ابي شيبه/كتاب الجهاد/حدیث: 20527]

حضرت ابو دردائ رضی اللہ عنہ فرماتے ہیں کہ جس شخص نے اللہ کے راستے میں ایک روزہ رکھا اللہ تعالیٰ اس کو جہنم سے ایک خندق دور فرما دیں گے اور اس خندق کا فاصلہ زمین و آسمان کے درمیانی خلاء کے برابر ہے۔ [مصنف ابن ابي شيبه/كتاب الجهاد/حدیث: 20528]

حضرت عبد اللہ بن عمرو رضی اللہ عنہما فرماتے ہیں کہ جنت میں ایک محل ہے جس کا نام عدن ہے۔ اس میں پانچ ہزار دروازے ہیں۔ ہر دروازے پر پانچ ہزار پردے ہیں۔ حضرت یعلی رحمہ اللہ کہتے ہیں کہ میرا خیال ہے انہوں نے یہ بھی فرمایا کہ اس میں صرف نبی، صدیق یا شہید داخل ہوں گے۔ [مصنف ابن ابي شيبه/كتاب الجهاد/حدیث: 20529]