حضرت ابن عمر رضی اللہ عنہما نے جعالہ (جہاد پر جانے کے معاوضے) کے بارے میں فرمایا کہ میں جہاد میں سے اپنا حصہ فروخت نہیں کرتا اور میں اجرت کے لیے جہاد نہیں کرتا۔ [مصنف ابن ابي شيبه/كتاب الجهاد/حدیث: 20680]

حضرت شقیق رحمہ اللہ فرماتے ہیں کہ میں نے حضرت عبد اللہ بن زبیر رضی اللہ عنہ سے جعائل (جہاد پر جانے کے معاوضوں) کے بارے میں سوال کیا تو انہوں نے فرمایا کہ اگر تم انہیں لے لو تو اللہ کے راستے میں خرچ کرو، اور انہیں چھوڑ دینا بہتر ہے۔ [مصنف ابن ابي شيبه/كتاب الجهاد/حدیث: 20681]

حضرت شقیق رحمہ اللہ فرماتے ہیں کہ میں نے حضرت ابن عمر رضی اللہ عنہما سے (اس بارے میں) سوال کیا تو انہوں نے فرمایا کہ میں رشوت لینے والا نہیں، سوائے اس کے جو اللہ مجھے عطا فرمائے۔ [مصنف ابن ابي شيبه/كتاب الجهاد/حدیث: 20682]

حضرت عبید بن اعجم رحمہ اللہ فرماتے ہیں کہ میں نے حضرت ابن عباس رضی اللہ عنہما سے جعائل (جہاد پر جانے کے معاوضوں) کے بارے میں سوال کیا تو انہوں نے فرمایا کہ اگر تم اس مال کو اللہ کے راستے میں کسی ہتھیار یا گھوڑے پر خرچ کرو تو اس میں کوئی حرج نہیں۔ [مصنف ابن ابي شيبه/كتاب الجهاد/حدیث: 20683]

حضرت ابن عباس رضی اللہ عنہما نے فرمایا کہ اور اگر تم اسے کسی غلام یا باندی میں لگا دو تو یہ کوئی فائدہ مند بات نہیں۔ [مصنف ابن ابي شيبه/كتاب الجهاد/حدیث: 20684]

حضرت ابوبکر بن عمرو بن عتبہ رحمہ اللہ فرماتے ہیں کہ حضرت معاویہ رضی اللہ عنہ کے زمانے میں لوگوں کو ایک مرتبہ زبردستی جہاد کے لیے بھیجا گیا۔ حضرت معاویہ رضی اللہ عنہ نے حضرت جریر بن عبداللہ رضی اللہ عنہ کو خط میں لکھا کہ ہم نے آپ کو اور آپ کے بیٹے کو زبردستی نہیں بھیج رہے۔ حضرت جریر بن عبداللہ رضی اللہ عنہ نے جواب میں لکھا کہ میں نے رسول اللہ صلی اللہ علیہ وسلم کے دست اقدس پر امیر کی اطاعت و فرمانبرداری اور مسلمانوں کی خیر خواہی کی بیعت کی ہے۔ اگر ہمیں (جانے کی) چستی ہوئی تو ہم اس میں نکلیں گے، وگرنہ جانے والوں کو قوت فراہم کریں گے۔ [مصنف ابن ابي شيبه/كتاب الجهاد/حدیث: 20685]

حضرت ابراہیم رحمہ اللہ فرماتے ہیں کہ حضرت اسود رحمہ اللہ سے ایسے آدمی کے بارے میں سوال کیا گیا جسے (جہاد پر جانے کا) معاوضہ دیا جائے، پھر وہ (اپنی جگہ کسی اور کو بھیجنے کے لیے) اس سے کم معاوضہ مقرر کرے اور باقی بچا لے؟ تو انہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب الجهاد/حدیث: 20686]

حضرت شریح رحمہ اللہ سے اس بارے میں سوال کیا گیا تو انہوں نے فرمایا کہ جو چیز تمہیں شک میں ڈالے اسے چھوڑ کر وہ اختیار کرو جو تمہیں شک میں نہ ڈالے۔ [مصنف ابن ابي شيبه/كتاب الجهاد/حدیث: 20687]

حضرت مکحول رحمہ اللہ قبیلے کے اندر (جہاد پر جانے والے کو) جُعل (معاوضہ) دینے میں کوئی حرج نہ سمجھتے تھے۔ [مصنف ابن ابي شيبه/كتاب الجهاد/حدیث: 20688]

حضرت جبیر بن نفیر حضرمی رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ میری امت کے وہ لوگ جو جہاد کرتے ہیں اور جُعل (معاوضہ) لیتے ہیں اور اس کے ذریعے دشمن کے خلاف قوت حاصل کرتے ہیں۔ ان لوگوں کی مثال حضرت موسیٰ علیہ السلام کی والدہ کی سی ہے جو اپنے بیٹے کو دودھ پلاتی تھیں اور (فرعون سے) اس کا عوض لیتی تھیں۔ [مصنف ابن ابي شيبه/كتاب الجهاد/حدیث: 20689]