حضرت ابو طلحہ رضی اللہ عنہ فرماتے ہیں کہ میں نے غزوہ احد میں اپنا سر اٹھایا تو میں نے دیکھا کہ ہر شخص نیند کا شکار ہے۔ [مصنف ابن ابي شيبه/كتاب الجهاد/حدیث: 20700]

حضرت زبیر رضی اللہ عنہ سے بھی یونہی منقول ہے۔ [مصنف ابن ابي شيبه/كتاب الجهاد/حدیث: 20701]

حضرت صعصعہ بن معاویہ رحمہ اللہ فرماتے ہیں کہ میں حضرت ابو ذر غفاری رضی اللہ عنہ سے ملا اور میں نے عرض کیا کہ مجھے کوئی ایسی حدیث سنائیے جو آپ نے نبی کریم صلی اللہ علیہ وسلم سے سنی ہو۔ انہوں نے فرمایا کہ نبی کریم صلی اللہ علیہ وسلم کا ارشاد ہے کہ جب کوئی مسلمان اللہ کے راستے میں اپنے مال کے دو حصے خرچ کرتا ہے تو جنت کے فرشتے اسے اپنی طرف بلاتے ہیں۔ [مصنف ابن ابي شيبه/كتاب الجهاد/حدیث: 20702]

اور حضرت حسن بصری رحمہ اللہ فرمایا کرتے تھے کہ اپنے مال میں سے زوجین (دو) کا مطلب ہے: دو دینار، دو درہم، دو غلام، یا ہر چیز میں سے دو۔ [مصنف ابن ابي شيبه/كتاب الجهاد/حدیث: 20703]

حضرت میمون بن مہران رحمہ اللہ فرماتے ہیں کہ حضرت ابوبکر رضی اللہ عنہ جب کوئی لشکر بھیجنے کا ارادہ کرتے تو لوگوں کو اس کے لیے جمع فرماتے، جب مطلوبہ مقدار پوری ہوجاتی تو اپنے پاس موجود چیزوں سے انہیں سامان جہاد فراہم کرتے۔ حضرت ابوبکر رضی اللہ عنہ کے دور میں ”اعطیہ“ فرض نہ تھا۔ [مصنف ابن ابي شيبه/كتاب الجهاد/حدیث: 20704]

حضرت سعد بن عیاض رحمہ اللہ فرماتے ہیں کہ حضور صلی اللہ علیہ وسلم زیادہ تر خاموش رہتے اور بہت کم بات فرماتے تھے۔ جب قتال کا حکم ہوتا تو اس کے لیے مستعد ہوجاتے اور سب لوگوں سے زیادہ بہادری کا مظاہرہ فرماتے۔ [مصنف ابن ابي شيبه/كتاب الجهاد/حدیث: 20705]

حضرت زید بن اسلم رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جہاد کرو تندرست رہو گے اور مال غنیمت حاصل کرو گے۔ [مصنف ابن ابي شيبه/كتاب الجهاد/حدیث: 20706]

حضرت عقبہ بن عامر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ اللہ تعالیٰ ایک تیر کی وجہ سے تین آدمیوں کو جنت میں داخل فرمائے گا، اس کے بنانے والے کو جو اس کی بناوٹ میں خیر کی نیت رکھے، اس کے چلانے والے کو اور اسے (تیر انداز کو) پکڑانے والے کو۔ تیر چلاؤ اور جانور کی سواری کرو۔ میرے نزدیک تمہارا تیر اندازی کرنا سواری کرنے سے بہتر ہے۔ مسلمان آدمی جس چیز سے بھی دل بہلائے وہ باطل ہے، سوائے کمان سے تیر چلانے، گھوڑے کو سدھانے اور بیوی سے دل لگی کرنے کے، کیونکہ یہ حق میں سے ہیں۔ [مصنف ابن ابي شيبه/كتاب الجهاد/حدیث: 20707]

حضرت ابو ریحانہ فرماتے ہیں کہ ایک مرتبہ ہم حضور صلی اللہ علیہ وسلم کے ساتھ ایک جہاد پر نکلے۔ ایک رات بہت شدید سردی تھی سردی کی وجہ سے لوگوں کا یہ حال تھا کہ گڑھا کھود کر اس میں داخل ہوتے اور اس پر اپنی ڈھال ڈال دیتے۔ اس موقع پر رسول اللہ صلی اللہ علیہ وسلم نے فرمایا کہ آج رات ہمارا پہرہ کون دے گا؟ ایک انصاری آدمی نے کہا کہ میں پہرہ دوں گا۔ حضور صلی اللہ علیہ وسلم نے فرمایا کہ تم کون ہو؟ اس پر اس نے اپنا نسب نامہ بیان کیا تو حضور صلی اللہ علیہ وسلم نے اسے خیر کی دعا دی۔ پھر آپ نے فرمایا کہ آج رات ہمارا پہرہ کون دے گا؟ میں نے کہا میں پہرہ دوں گا۔ حضور صلی اللہ علیہ وسلم نے پوچھا تم کون ہو؟ میں نے کہا: میں ابو ریحانہ ہوں۔ حضور صلی اللہ علیہ وسلم نے میرے لیے اس سے کم دعا فرمائی جو ان انصاری صحابی کے لیے فرمائی تھی، پھر فرمایا کہ تین آنکھیں ایسی ہیں جن پر جہنم کی آگ حرام ہے، ایک وہ آنکھ جو اللہ کے راستے میں بیدار رہی اور دوسری وہ آنکھ جس نے اللہ کے خوف سے آنسو بہایا۔ راوی محمد بن سمیر نے تیسری آنکھ کا ذکر نہیں کیا۔ (شواہد سے معلوم ہوتا ہے کہ تیسری آنکھ وہ ہے جو غیر محرم کو دیکھنے سے جھک گئی)۔ [مصنف ابن ابي شيبه/كتاب الجهاد/حدیث: 20708]

حضرت طارق بن شہاب فرماتے ہیں کہ حضرت سلمان رضی اللہ عنہ جب جہاد سے واپس آتے تو قادسیہ ٹھہرتے اور جب حج سے واپس ہوتے تو جہاد کے لیے مدائن میں قیام فرماتے۔ [مصنف ابن ابي شيبه/كتاب الجهاد/حدیث: 20709]