حضرت ابن عون رحمہ اللہ فرماتے ہیں کہ میں نے حضرت ابن سیرین رحمہ اللہ سے سوال کیا کہ اگر کوئی شخص جہاد کرنا چاہے تو کیا اس کی مدد کی جائے گی؟ انہوں نے فرمایا کہ مسلمان ہمیشہ ایک دوسرے کو فائدہ پہنچاتے ہیں۔ [مصنف ابن ابي شيبه/كتاب الجهاد/حدیث: 20690]

حضرت نسیر فرماتے ہیں کہ حضرت ربیع رحمہ اللہ جعالہ (جہاد پر جانے کا معاوضہ) لیتے تھے اور اسے مساکین میں تقسیم کردیتے تھے۔ [مصنف ابن ابي شيبه/كتاب الجهاد/حدیث: 20691]

حضرت عثمان بن اسود رحمہ اللہ فرماتے ہیں کہ حضرت مجاہد رحمہ اللہ کو جس دن وہ جہاد کے لیے نکلے اس دن کوئی چیز پیش کی گئی جو انہوں نے قبول فرما لی۔ [مصنف ابن ابي شيبه/كتاب الجهاد/حدیث: 20692]

حضرت عکرمہ رحمہ اللہ، حضرت اسود رحمہ اللہ اور حضرت مسروق رحمہ اللہ نے جعائل (جہاد پر جانے کے معاوضوں) کو مکروہ قرار دیا ہے، اور یہ (لشکر کے لیے لوگوں کو) بھیجنے کے معاملے میں تھا۔ [مصنف ابن ابي شيبه/كتاب الجهاد/حدیث: 20693]

حضرت مسروق رحمہ اللہ نے جعائل کو مکروہ قرار دیا ہے۔ [مصنف ابن ابي شيبه/كتاب الجهاد/حدیث: 20694]

حضرت نعمان بن ابی عیاش رحمہ اللہ، ابن قسیط رحمہ اللہ اور حضرت عمرو بن علقمہ رحمہ اللہ جعائل (جہاد پر جانے کے معاوضے) لیتے تھے اور جہاد کے لیے نکلتے تھے۔ [مصنف ابن ابي شيبه/كتاب الجهاد/حدیث: 20695]

حضرت عبد الرحمن بن یزید رحمہ اللہ کسی آدمی سے دوستی لگاتے تھے اور پھر ا س کے حصے کا جہاد کرتے تھے۔ [مصنف ابن ابي شيبه/كتاب الجهاد/حدیث: 20696]

حضرت ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے ارشاد فرمایا کہ عمل صالح کے لیے اللہ تعالیٰ کو ذوالحجہ کے دس دن سے زیادہ محبوب دن اور کوئی نہیں۔ لوگوں نے پوچھا اے اللہ کے رسول! کیا یہ دن اللہ کے راستے میں جہاد کرنے سے بھی زیادہ افضل ہیں؟ حضور صلی اللہ علیہ وسلم نے فرمایا کہ یہ دن اللہ کے راستے میں جہاد کرنے سے بھی زیادہ افضل ہیں۔ البتہ اگر کوئی آدمی اللہ کے راستے میں اپنی جان اور اپنا مال لے کر جائے اور کچھ بھی واپس نہ لائے۔ [مصنف ابن ابي شيبه/كتاب الجهاد/حدیث: 20697]

حضرت بریدہ اسلمی رضی اللہ عنہ نے دریائے بلخ کے پار کھڑے ہو کر فرمایا کہ زندگی تو بس گھوڑوں کی چمک کے ساتھ ہے۔ [مصنف ابن ابي شيبه/كتاب الجهاد/حدیث: 20698]

حضرت ابو مسعود عقبہ بن عمرو رضی اللہ عنہ سے روایت ہے کہ ایک مرتبہ ایک آدمی ایک لگام والی اونٹنی لے کر حضور صلی اللہ علیہ وسلم کی خدمت میں حاضر ہوا اور اس نے عرض کیا کہ یہ اونٹنی میں اللہ کے راستے میں وقف کرتا ہوں۔ اس پر حضور صلی اللہ علیہ وسلم نے فرمایا کہ قیامت کے دن تجھے اس کے بدلے سات سو اونٹنیاں ملیں گی، وہ سب کی سب بالگام اونٹنیاں ہوں گی۔ [مصنف ابن ابي شيبه/كتاب الجهاد/حدیث: 20699]