راوی موسیٰ رحمہ اللہ فرماتے ہیں کہ میں نے اپنے شیوخ کو یہ کہتے ہوئے سنا ہے کہ زوجین سے مراد دینار اور درہم یا درہم اور دینار ہیں۔ [مصنف ابن ابي شيبه/كتاب الجهاد/حدیث: 20650]

حضرت ابو شیبہ مہری اور حضرت مدرک رحمہ اللہ فرماتے ہیں کہ اللہ کے راستے کا غبار اور جہنم کا دھواں ایک مومن کے سینے میں جمع نہیں ہوسکتے۔ [مصنف ابن ابي شيبه/كتاب الجهاد/حدیث: 20651]

ابراہیم تیمی رحمہ اللہ فرماتے ہیں کہ شہداء کی روحیں سبز رنگ کے پرندوں میں جنت کی سیر کرتی ہیں۔ وہ عرش سے لٹکی ہوئی قندیلوں میں آکر ٹھہرتی ہیں تو تمہارا رب ان کی طرف جھانکتا ہے اور ان سے تین مرتبہ فرماتا ہے کہ تم مجھ سے جو چاہتے ہو مانگو۔ وہ کہتے ہیں کہ اے ہمارے رب! ہم تجھ سے سوال کرتے ہیں کہ تو ہمیں دنیا میں واپس بھیج دے تاکہ ہم تیرے راستے میں ایک مرتبہ اور قتل کیے جائیں۔ [مصنف ابن ابي شيبه/كتاب الجهاد/حدیث: 20652]

حضرت عاصم بن عمر بن قتادہ رحمہ اللہ فرماتے ہیں کہ حضرت معاذ بن عفرائ رضی اللہ عنہ نے سوال کیا یا رسول اللہ! اللہ تعالیٰ اپنے بندے کی کس بات پر مسکراتا ہے؟ آپ صلی اللہ علیہ وسلم نے فرمایا جب کوئی مجاہد بغیر زرہ کے دشمن پر چڑھائی کرتا ہے۔ اس پر حضرت معاذ رضی اللہ عنہ نے اپنی زرہ پھینک دی اور دشمن سے لڑتے ہوئے شہید ہوگئے۔ [مصنف ابن ابي شيبه/كتاب الجهاد/حدیث: 20653]

نمران بن مخمر رحبی رحمہ اللہ کہتے ہیں کہ حضرت ابو عبیدہ بن جراح رضی اللہ عنہایک لشکر کے ساتھ جا رہے تھے اور ساتھ ساتھ یہ فرما رہے تھے۔ بہت سے کپڑوں کو صاف رکھنے والے ایسے ہیں جو دین کو میلا کر رہے ہیں۔ [مصنف ابن ابي شيبه/كتاب الجهاد/حدیث: 20654]

حضرت ابو عبیدہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس شخص نے اللہ کے راستے میں اپنے زائد مال میں سے کچھ خرچ کیا اسے سات سو گنا اجر دیا جائے گا۔ [مصنف ابن ابي شيبه/كتاب الجهاد/حدیث: 20655]

حضرت عمر رضی اللہ عنہ نے ایک مرتبہ مکہ مکرمہ کی طرف اشارہ کرتے ہوئے فرمایا کہ میں یہاں حج کروں گا پھر اللہ کے راستے میں نکل جاؤں گا۔ [مصنف ابن ابي شيبه/كتاب الجهاد/حدیث: 20656]

حسناء بنت معاویہ رحمہا اللہ فرماتی ہیں کہ مجھ سے میرے چچا (اسلم بن سلیم رضی اللہ عنہ) نے بیان کیا میں نے رسول اللہ صلی اللہ علیہ وسلم سے سوال کیا کہ اے اللہ کے رسول صلی اللہ علیہ وسلم ! جنت میں کون جائے گا؟ حضور صلی اللہ علیہ وسلم نے فرمایا نبی جنت میں جائیں گے، شہید جنت میں جائے گا اور زندہ درگور کی ہوئی لڑکی جنت میں جائے گی۔ [مصنف ابن ابي شيبه/كتاب الجهاد/حدیث: 20657]

حضرت موسیٰ بن طلحہ رحمہ اللہ فرماتے ہیں کہ حضور صلی اللہ علیہ وسلم کے ساتھ حضرت طلحہ رضی اللہ عنہ کو بیس سے زیادہ زخم آئے تھے۔ [مصنف ابن ابي شيبه/كتاب الجهاد/حدیث: 20658]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ جو شخص اللہ کی رضا کو چاہتے ہوئے اللہ کے وعدے کے حصول کے لئے اللہ کے راستے میں نکلے، وہ اس روزہ دار، شب زندہ دار کی طرح ہے جو مجاہد کے نکلنے سے واپس آنے تک روزے میں مصروف رہے۔ [مصنف ابن ابي شيبه/كتاب الجهاد/حدیث: 20659]