حضرت ابن عباس رضی اللہ عنہما قرآن مجید کی آیت { الَّذِینَ یُنْفِقُونَ أَمْوَالَہُمْ بِاللَّیْلِ وَالنَّہَارِ سِرًّا وَعَلاَنِیَۃً } کے بارے میں فرماتے ہیں کہ اس سے مراد اللہ کے راستہ میں گھوڑوں پر خرچ کرنا ہے۔ [مصنف ابن ابي شيبه/كتاب الجهاد/حدیث: 20510]

حضرت سھل بن عجلان باہلی رحمہ اللہ قرآن مجید کی آیت: { الَّذِینَ یُنْفِقُونَ أَمْوَالَہُمْ بِاللَّیْلِ وَالنَّہَارِ سِرًّا وَعَلاَنِیَۃً } کے بارے میں فرماتے ہیں کہ اس سے مراد اللہ کے راستے میں گھوڑوں پر خرچ کرنا ہے۔ پھر آپ نے فرمایا کہ جو شخص اللہ کے راستے میں گھوڑا باندھے اور اس میں کسی قسم کی ریا یا شہرت پسندی کی آمیزش نہ ہو تو یہ ان لوگوں میں سے ہوگا جو اپنا مال دن رات اللہ کے راستے میں خرچ کرتے ہیں۔ [مصنف ابن ابي شيبه/كتاب الجهاد/حدیث: 20511]

حضرت ابوہریرہ رضی اللہ عنہ فرماتے ہیں کہ اللہ کے راستے کا غبار اور جہنم کا دھواں ایک ناک میں جمع نہیں ہوسکتے۔ اللہ کے خوف سے رونے والے کا جہنم میں داخل ہونا اسی طرح ناممکن ہے جس طرح تھنوں میں دودھ کا واپس جانا۔ [مصنف ابن ابي شيبه/كتاب الجهاد/حدیث: 20512]

حضرت سالم بن ابی جعد رحمہ اللہ فرماتے ہیں کہ کچھ صحابہ کرام خواب میں نبی کریم صلی اللہ علیہ وآلہ وسلم کو دکھائے گئے۔ آپ نے دیکھا کہ حضرت جعفر رضی اللہ عنہ دو پروں والے ایک فرشتے کی صورت میں ہیں اور خون میں لت پت ہیں۔ حضرت زید رضی اللہ عنہ ان کے سامنے ایک تخت پر بیٹھے ہیں۔ حضرت عبد اللہ بن رواحہ رضی اللہ عنہ بھی ان کے ساتھ بیٹھے ہیں لیکن ان دونوں حضرات کا رخ حضرت ابن رواحہ رضی اللہ عنہ سے دوسری طرف ہے۔ [مصنف ابن ابي شيبه/كتاب الجهاد/حدیث: 20513]

حضرت ربیع بن زید رضی اللہ عنہ کہتے ہیں کہ ایک مرتبہ رسول اللہ صلی اللہ علیہ وسلم چلتے جا رہے تھے کہ قریش کا ایک لڑکا رستے سے ذرا ہٹ کر چل رہا تھا۔ آپ نے اسے دیکھ کر اس کے بارے میں پوچھا کہ کیا یہ فلاں لڑکا نہیں ہے؟ لوگوں نے کہا کہ جی ہاں وہی ہے۔ آپ نے اسے بلا کر اس سے پوچھا کہ تم راستے سے ہٹ کر کیوں چل رہے ہو؟ ا س نے کہا: کہ میں غبار سے بچنا چاہتا ہوں۔ آپ نے فرمایا کہ راستے سے ہٹ کر نہ چلو کیوں کہ قسم ہے اس ذات کی جس کے قبضے میں محمد صلی اللہ علیہ وسلم کی جان ہے! یہ غبار جنت کی خوشبو ہے۔ [مصنف ابن ابي شيبه/كتاب الجهاد/حدیث: 20514]

حضرت ابو عوام رحمہ اللہ فرماتے ہیں کہ ایک مرتبہ حضرت ابو ایوب رضی اللہ عنہ کسی وجہ سے ایک سال جہاد پر نہ جاسکے۔ پھر انہوں نے قرآن مجید کی یہ آیت پڑھی: { انْفِرُوا خِفَافًا وَثِقَالاَ } ”نکلو! ہلکے ہو یا بوجھل۔“ پھر آپ اسی سال جہاد کے لیے نکل گئے اور فرماتے تھے اس آیت کے بعد کسی قسم کی رخصت باقی نہیں رہتی۔ [مصنف ابن ابي شيبه/كتاب الجهاد/حدیث: 20515]

حضرت ابو مالک رحمہ اللہ فرماتے ہیں کہ سورة البرائۃ کی سب سے پہلے یہ آیت نازل ہوئی: { انْفِرُوا خِفَافًا وَثِقَالاَ } [مصنف ابن ابي شيبه/كتاب الجهاد/حدیث: 20516]

حضرت ابو صالح رحمہ اللہ فرماتے ہیں کہ { انْفِرُوا خِفَافًا وَثِقَالاَ } سے مراد ہے جوان اور بوڑھے سب نکلیں۔ [مصنف ابن ابي شيبه/كتاب الجهاد/حدیث: 20517]

حضرت حسن رحمہ اللہ نے اس کی تشریح جوان اور بوڑھوں سے کی ہے۔ [مصنف ابن ابي شيبه/كتاب الجهاد/حدیث: 20518]

حضرت قتادہ رحمہ اللہ نے اس کی تشریح خوشی سے اور بغیر خوشی کے (یعنی ہشاش بشاش ہو یا نہ ہو) سے کی ہے۔ [مصنف ابن ابي شيبه/كتاب الجهاد/حدیث: 20519]