حضرت نافع رحمہ اللہ سے مروی ہے کہ میں نے رسول اللہ صلی اللہ علیہ وسلم کے اصحاب کو دیکھا کہ ان کے سامنے غلے کے وسق لائے جاتے تھے اور عید گاہ میں ڈال دیے جاتے تھے اور ایک آدمی کہتا کہ میں نے ان چیزوں کو کیل کر کے لیا ہے میں انہیں کیل کے حساب سے نہیں بلکہ اندازے سے بیچوں گا۔ اصحاب نبی اس میں کوئی حرج نہیں سمجھتے تھے۔ [مصنف ابن ابي شيبه/كتاب البيوع والأقضية/حدیث: 22766]

حضرت ابن عمر رضی اللہ عنہما سے مروی ہے کہ ہم لوگ سواروں سے ملتے اور ان سے اندازے سے گندم وغیرہ خریدتے تھے، آنحضرت صلی اللہ علیہ وسلم نے ہمیں اس کو آگے فروخت کرنے سے روک دیا جب تک کہ ہم اس کو اس کی جگہ سے منتقل نہ کردیں۔ [مصنف ابن ابي شيبه/كتاب البيوع والأقضية/حدیث: 22767]

حضرت شریح رحمہ اللہ اس مکاتب کے بارے میں فرماتے ہیں جو اس حال میں فوت ہو کہ اس پر قرض بھی ہو اور بدل کتابت بھی باقی ہو تو اس کے آقا واجب الاداء قسطوں کے بقدر (قرض خواہوں کے ساتھ) حصہ پائیں گے۔ [مصنف ابن ابي شيبه/كتاب البيوع والأقضية/حدیث: 22768]

اور حضرت حماد رحمہ اللہ فرماتے ہیں کہ آقا واجب الاداء اور غیر واجب الاداء (دونوں قسم کی) قسطوں کے بقدر حصہ پائیں گے۔ [مصنف ابن ابي شيبه/كتاب البيوع والأقضية/حدیث: 22769]

حضرت سعید بن المسیب رحمہ اللہ فرماتے ہیں کہ حضرت شریح رحمہ اللہ اگرچہ قاضی تھے لیکن ان سے غلطی ہوئی ہے، حضرت زید بن ثابت رضی اللہ عنہ فرماتے تھے بدل کتابت سے پہلے قرض اداکریں گے۔ [مصنف ابن ابي شيبه/كتاب البيوع والأقضية/حدیث: 22770]

ابراہیم رحمہ اللہ فرماتے ہیں کہ اگر مکاتب غلام اس حال میں فوت ہو کہ اس پر قرض ہو تو اس کے آقا کو قرض خواہوں کے ساتھ رکھیں گے، قسطوں میں سے جو واجب الاداء ہے اس کے بقدر اس کو حصہ دیں گے اور اگر اس پر فی الفور کوئی قسط لازم نہ ہو تو قرض خواہوں سے ابتداء کریں گے پس وہ اپنا قرض وصول کرلیں گے، اور اگر اس میں سے کچھ بچ جائے تو وہ آقاوں کو ملے گا یہاں تک کہ بدل کتابت مکمل ہوجائے اور اگر بدل کتابت ادا کرنے کے بعد بھی کچھ بچ جائے تو وہ اس کے ورثاء کے ملے گا۔ [مصنف ابن ابي شيبه/كتاب البيوع والأقضية/حدیث: 22771]

حضرت ابراہیم رحمہ اللہ فرماتے ہیں کہ اس کے آقا کو قرض خواہوں کے ساتھ ملائیں گے قسطوں میں سے جو قسط واجب الاداء ہوئی ہو۔ [مصنف ابن ابي شيبه/كتاب البيوع والأقضية/حدیث: 22772]

حضرت حسن رحمہ اللہ فرماتے ہیں کہ قرض سے ابتداء کریں گے۔ [مصنف ابن ابي شيبه/كتاب البيوع والأقضية/حدیث: 22773]

حضرت شریح رحمہ اللہ فرماتے ہیں کہ قرض سے ابتداء کریں گے۔ [مصنف ابن ابي شيبه/كتاب البيوع والأقضية/حدیث: 22774]

حضرت شعبی رحمہ اللہ اور حضرت حکم فرماتے ہیں کہ اگر غلام پر قرض بھی ہو اور بدل کتابت بھی باقی ہو تو قسطوں میں سے جو قسط واجب الاداء ہوئی ہو اس کو دیکھیں گے اور جو اس کے قرض خواہوں کے لئے تھا اس کے حصوں کے اعتبار سے تقسیم کردیں گے۔ [مصنف ابن ابي شيبه/كتاب البيوع والأقضية/حدیث: 22775]