نبی کریم صلی اللہ علیہ وسلم نے ارشاد فرمایا: تین کام سنت ہیں، ان کا اجر میرے ذمہ ہے، یعنی بڑے عظیم کام ہیں، دودھ والا جانور عاریت پر دینا، قربانی کرنا، اور آدمی کا دوسرے شخص کی طرف سے حج کرنا جبکہ اس نے خود بالکل حج نہ کیا ہو۔ [مصنف ابن ابي شيبه/كتاب البيوع والأقضية/حدیث: 23676]

حضرت شریح رحمہ اللہ فرماتے ہیں کہ کوئی شخص دودھ والے جانور کا قرضہ نہیں دیتا اور نہ ہی مال دیتا ہے مگر مقرض ان دونوں سے افضل ہوتا ہے، اور اگر ادا کرے تو اچھا ادا کرنا ہے۔ [مصنف ابن ابي شيبه/كتاب البيوع والأقضية/حدیث: 23677]

حضرت ابو الدرداء فرماتے ہیں کہ میں کسی کو دو دینار دو مرتبہ قرضہ دوں یہ مجھے اس سے زیادہ پسند ہے کہ میں ان دونوں کو صدقہ کروں، بیشک میں جب ان کو قرض دوں گا پھر وہ مجھے واپس ملیں گے پھر میں ان کو صدقہ کروں گا تو مجھے دو گنا اجر ملے گا۔ [مصنف ابن ابي شيبه/كتاب البيوع والأقضية/حدیث: 23678]

حضرت جابر رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو فتح مکہ کے سال یہ ارشاد فرماتے ہوئے سنا: بیشک اللہ اور اس کے رسول صلی اللہ علیہ وسلم نے شراب، خنزیر، بتوں اور مردار کی بیع کو حرام قرار دیا ہے۔ [مصنف ابن ابي شيبه/كتاب البيوع والأقضية/حدیث: 23679]

حضرت شقیق فرماتے ہیں کہ حضرت مسروق مقام سلسلہ میں تھے کہ ان کے پاس سے پیتل کے مجسمے گزارے گئے جو فروخت کیے جا رہے تھے۔ حضرت مسروق نے فرمایا اگر مجھے معلوم ہوتا کہ وہ مجھے قتل کر دے گا تو میں انہیں غرق کر دیتا۔ لیکن مجھے اندیشہ ہے کہ وہ مجھے عذاب دے گا اور آزمائش میں ڈال دے گا۔ بخدا! میں نہیں جانتا کہ دو آدمیوں میں سے کون سا برا ہے؟ ایک وہ جس کے لیے اس کا برا عمل مزین کیا گیا اور دوسرا وہ جو آخرت سے ناامید ہو کر دنیا سے ہی نفع حاصل کرنا چاہتا ہے۔ [مصنف ابن ابي شيبه/كتاب البيوع والأقضية/حدیث: 23680]

حضرت مجاہد رحمہ اللہ فرماتے ہیں کہ ایک شخص کو وراثت میں چاندی کے بت، خنزیر اور شراب ملی، اس نے صحابہ رضی اللہ عنہ م کی ایک جماعت سے اس کے متعلق دریافت کیا، ان سب نے اس کو حکم دیا کہ بتوں کو توڑ کر چاندی بنا لے اور سب نے شراب اور خنزیر سے منع فرمایا۔ [مصنف ابن ابي شيبه/كتاب البيوع والأقضية/حدیث: 23681]

حضرت عبایہ بن رفاعہ فرماتے ہیں کہ ان کے دادا کا انتقال ہوا اور انہوں نے ایک باندی چھوڑی جو کمائی کرتی تھی۔ اس بات کا حضور صلی اللہ علیہ وسلم سے ذکر کیا گیا تو آپ صلی اللہ علیہ وسلم نے باندی کی کمائی کو مکروہ قرار دیا اور فرمایا کہ شاید وہ (کمائی کا ذریعہ) نہ پائے تو بدکاری کرنے لگے۔ [مصنف ابن ابي شيبه/كتاب البيوع والأقضية/حدیث: 23682]

حضرت ابوہریرہ رضی اللہ عنہ سے مروی ہے کہ آنحضرت صلی اللہ علیہ وسلم نے باندی کی کمائی سے منع فرمایا۔ [مصنف ابن ابي شيبه/كتاب البيوع والأقضية/حدیث: 23683]

حضرت عثمان رضی اللہ عنہارشاد فرماتے ہیں کہ بچے کو کمائی کرنے کا مکلف نہ بناؤ ورنہ وہ چوری کرے گا، اور جو باندی کوئی ہنر نہ رکھتی ہو اس کو کمائی کا مکلف نہ بناؤ ورنہ اپنی شرمگاہ سے کمائی حاصل کرے گی، اور پاک دامن رہو جب اللہ نے تمہیں پاک دامن رکھا ہے، اور تمہارے لئے وہ منافع ہیں جو تمہارے پاک اور حلال ہیں۔ [مصنف ابن ابي شيبه/كتاب البيوع والأقضية/حدیث: 23684]

حضرت جابر رضی اللہ عنہ سے مروی ہے کہ آنحضرت صلی اللہ علیہ وسلم نے باندی سے خراج وصول کرنے سے منع فرمایا ہے مگر یہ کہ وہ مستقل عمل کرتی ہو۔ [مصنف ابن ابي شيبه/كتاب البيوع والأقضية/حدیث: 23685]