حضرت وکیع نے یہ الفاظ بیان فرمائے کہ جب داڑھی قبضہ سے تجاوز کر جاتی تو اس کو چھانٹ لیتے۔ [مصنف ابن ابي شيبه/ كتاب الأدب/حدیث: 27134]

حضرت قتادہ فرماتے ہیں کہ حضرت جابر نے ارشاد فرمایا: تم داڑھی کی لمبائی کو سوائے حج یا عمرے کے مت چھانٹو۔ [مصنف ابن ابي شيبه/ كتاب الأدب/حدیث: 27135]

حضرت ابو زرعہ فرماتے ہیں کہ حضرت ابوہریرہ کی داڑھی جب ایک قبضہ سے تجاوز کر جاتی تو وہ اس کو چھانٹ لیتے تھے۔ [مصنف ابن ابي شيبه/ كتاب الأدب/حدیث: 27136]

حضرت ابو ھلال فرماتے ہیں کہ میں نے حضرت حسن بصری اور حضرت ابن سیرین دونوں حضرات سے اس بارے میں پوچھا: تو ان دونوں حضرات نے فرمایا: اس میں کوئی حرج نہیں ہے کہ تم اپنی داڑھی کی لمبائی کو چھانٹ لو۔ [مصنف ابن ابي شيبه/ كتاب الأدب/حدیث: 27137]

حضرت منصور فرماتے ہیں کہ ابراہیم نے ارشاد فرمایا: وہ حضرات ٹھوڑی کے نیچے کے بال چھانٹ لیتے تھے اور داڑھی کے کناروں کے بال بھی چھانٹتے تھے۔ [مصنف ابن ابي شيبه/ كتاب الأدب/حدیث: 27138]

حضرت مغیرہ فرماتے ہیں کہ حضرت ابراہیم نے داڑھی کے کناروں کو کاٹنے اور برابر کرنے کو مکروہ قرار دیا ہے۔ [مصنف ابن ابي شيبه/ كتاب الأدب/حدیث: 27139]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: مونچھیں کاٹنے میں مبالغہ کرو اور داڑھی کو بڑھاؤ۔ [مصنف ابن ابي شيبه/ كتاب الأدب/حدیث: 27140]

حضرت زید بن ارقم رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جو اپنی مونچھ کو نہ چھانٹے وہ ہم میں سے نہیں۔ [مصنف ابن ابي شيبه/ كتاب الأدب/حدیث: 27141]

حضرت عثمان حاطبی فرماتے ہیں کہ میں نے حضرت ابن عمر رضی اللہ عنہما کو مونچھیں کاٹنے میں مبالغہ کرتے ہوئے دیکھا۔ [مصنف ابن ابي شيبه/ كتاب الأدب/حدیث: 27142]

حضرت حبیب فرماتے ہیں کہ میں نے حضرت ابن عمر رضی اللہ عنہما کو دیکھا تحقیق انہوں نے اپنی مونچھ کو اس طرح کاٹا ہوا تھا گویا اسے مونڈ دیا ہو۔ [مصنف ابن ابي شيبه/ كتاب الأدب/حدیث: 27143]