حضرت لقیط بن صبرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: تم ہرگز اپنی بیویوں کو اپنی باندیوں کی طرح مت مارو۔ [مصنف ابن ابي شيبه/ كتاب الأدب/حدیث: 27104]

حضرت میمون بن ابی شبیب فرماتے ہیں کہ حضرت عمار نے ارشاد فرمایا: جس شخص نے اپنے غلام کو ظلماً مارا تو اس سے قصاص لیا جائے گا۔ [مصنف ابن ابي شيبه/ كتاب الأدب/حدیث: 27105]

حضرت عبد اللہ بن زمعہ فرماتے ہیں کہ رسول اللہ صلی اللہ علیہ وآلہ وسلم نے خطبہ دیا پھر عورتوں کا ذکر فرمایا اور ان کے بارے میں وعظ و نصیحت فرمائی، اور فرمایا: تم میں سے کوئی ایک اپنی بیوی کو باندیوں کی طرح کیوں مارتا ہے؟ حالانکہ شاید وہ دن کے آخری حصہ میں اس سے ہمبستری کرے۔ [مصنف ابن ابي شيبه/ كتاب الأدب/حدیث: 27106]

حضرت عمار فرماتے ہیں کہ رسول اللہ صلی اللہ علیہ وآلہ وسلم نے ارشا دفرمایا: جس شخص کے دنیا میں دو چہرے ہوں گے تو قیامت کے دن اس کی آگ کی دو زبانیں ہوں گی۔ [مصنف ابن ابي شيبه/ كتاب الأدب/حدیث: 27107]

امام زہری فرماتے ہیں کہ ایک آدمی نے نبی کریم صلی اللہ علیہ وآلہ وسلم کو تین مرتبہ سلام کیا لیکن آپ صلی اللہ علیہ وآلہ وسلم نے اس کو جواب نہیں دیا۔ آپ صلی اللہ علیہ وآلہ وسلم سے اس بارے میں پوچھا گیا! تو آپ صلی اللہ علیہ وآلہ وسلم نے فرمایا: بیشک وہ دو رخا شخص ہے۔ [مصنف ابن ابي شيبه/ كتاب الأدب/حدیث: 27108]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا! تو قیامت کے دن اللہ کے نزدیک بدترین لوگوں میں سے دو چہرے والے کو پائے گا۔ [مصنف ابن ابي شيبه/ كتاب الأدب/حدیث: 27109]

حضرت عکرمہ فرماتے ہیں کہ حضرت لقمان نے ارشاد فرمایا: دو چہرے والا شخص اللہ کے نزدیک امانت دار نہیں ہوگا۔ [مصنف ابن ابي شيبه/ كتاب الأدب/حدیث: 27110]

حضرت مالک بن اسماء بن خارجہ اپنے والد سے نقل کرتے ہیں کہ انہوں نے فرمایا: میں نے حضرت عبد اللہ بن مسعود رضی اللہ عنہ کو یوں فرماتے ہوئے سُنا: بیشک دو زبانوں والے کی قیامت کے دن آگ کی دو زبانیں ہوں گی۔ [مصنف ابن ابي شيبه/ كتاب الأدب/حدیث: 27111]

حضرت اعمش فرماتے ہیں کہ حضرت ابراہیم نے مجھے دیکھا کہ میں اپنے داہنے ہاتھ سے ناک صاف کر رہا تھا، تو آپ نے مجھے منع فرمایا: اور فرمایا: تم پر بایاں ہاتھ لازم ہے اور تم دائیں ہاتھ سے ناک صاف کرنے کی عادت مت بناؤ۔ [مصنف ابن ابي شيبه/ كتاب الأدب/حدیث: 27112]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم کا داہنا ہاتھ کھانے اور نماز کے لیے اور بایاں ہاتھ ان کے علاوہ کاموں کے لیے تھا۔ [مصنف ابن ابي شيبه/ كتاب الأدب/حدیث: 27113]