حضرت محمد بن قیس فرماتے ہیں کہ انہوں نے امام شعبی کو یہ بات فرماتے ہوئے سنا کہ جب ایک شخص نے دوسرے شخص کو اپنے گھر میں داخل کیا تو وہ اس کے لیے ضامن ہوگا یہاں تک کہ اسے ایسے ہی نکالے جیسا کہ اسے داخل کیا تھا۔ [مصنف ابن ابي شيبه/كتاب الديات/حدیث: 29531]

حضرت ابو معشر فرماتے ہیں کہ ابراہیم نے ارشاد فرمایا: جب وہ شخص گھر والوں کی اجازت سے داخل ہوا پھر کتے نے اسے کاٹا تو وہ ضامن ہوں گے اور اگر وہ ان کی اجازت کے بغیر داخل ہوا پھر کتے نے اسے کاٹا تو وہ ضامن نہیں ہوں گے۔ [مصنف ابن ابي شيبه/كتاب الديات/حدیث: 29532]

حضرت طارق بن عبدالرحمن نے ارشاد فرمایا کہ میں قاضی شریح کے پاس تھا کہ ایک سائل آپ کے پاس آیا اس حال میں کہ اس کا تھیلا پھٹا ہوا تھا اور اس کی پنڈلی زخمی تھی پس وہ کہنے لگا: میں فلاں لوگوں کے گھر میں داخل ہوا تو ان کے کتے نے مجھے کاٹ لیا۔ اس پر حضرت شریح نے فرمایا: اگر تو انہوں نے تجھے اجازت دی تھی پھر تو وہ ضامن ہوں گے ورنہ ان پر کوئی ضمان نہیں ہوگا۔ [مصنف ابن ابي شيبه/كتاب الديات/حدیث: 29533]

حضرت شعبہ فرماتے ہیں کہ حضرت حکم نے بہت زیادہ کاٹنے والے کتے کے بارے میں ارشاد فرمایا: ضمان ادا نہیں کیا جائے گا۔ [مصنف ابن ابي شيبه/كتاب الديات/حدیث: 29534]

حضرت حصین فرماتے ہیں کہ حضرت عامر کتوں کے بارے میں فرمایا کرتے تھے: جب آدمی کتوں کے پاس آگیا اس حال میں کہ وہ کتے ریوڑ کے ساتھ تھے پھر انہوں نے اس کو کاٹ لیا تو کتوں کے مالک پر کوئی ضمان نہیں ہوگا اورا گر کتے راستہ میں لوگوں کے سامنے آجائیں اور کسی ایک کو کاٹ لیں تو اس صورت میں اس پر ضمان لازم ہوگا۔ [مصنف ابن ابي شيبه/كتاب الديات/حدیث: 29535]

حضرت حسن بصری فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: قصاص نہیں ہوگا مگر تلوار کے ذریعہ۔ [مصنف ابن ابي شيبه/كتاب الديات/حدیث: 29536]

حضرت مغیرہ فرماتے ہیں کہ حضرت ابراہیم نے اس آدمی کے بارے میں جو کسی کو کنکریاں مار کر قتل کردے یا اس کو مثلہ کردے۔ آپ نے فرمایا: بیشک قصاص تو تلوار کے ذریعہ ہوگا کیونکہ مثلہ کرنا صحابہ کا طریقہ نہیں تھا۔ [مصنف ابن ابي شيبه/كتاب الديات/حدیث: 29537]

حضرت محمد بن قیس فرماتے ہیں کہ حضرت شعبی نے ارشاد فرمایا: قصاص نہیں ہوگا مگر لوہے کے آلہ کے ساتھ۔ [مصنف ابن ابي شيبه/كتاب الديات/حدیث: 29538]

حضرت ابو معشر فرماتے ہیں کہ حضرت ابراہیم نے ارشاد فرمایا: قصاص نہیں ہوگا مگر لوہے کے آلہ کے ساتھ۔ [مصنف ابن ابي شيبه/كتاب الديات/حدیث: 29539]

حضرت قتادہ فرماتے ہیں کہ حضرت حسن بصری سے بھی مذکورہ ارشاد منقول ہے۔ [مصنف ابن ابي شيبه/كتاب الديات/حدیث: 29540]