حضرت اشعث فرماتے ہیں کہ حضرت عامر شعبی، حضرت حسن بصری، حضرت ابن سیرین اور حضرت عمرو بن دینار نے ارشاد فرمایا: عمد میں قصاص ہوگا۔ [مصنف ابن ابي شيبه/كتاب الديات/حدیث: 29581]

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: عمد کی صورت میں قصاص ہوگا مگر یہ کہ مقتول کا سرپرست معاف کردے۔ [مصنف ابن ابي شيبه/كتاب الديات/حدیث: 29582]

حضرت شیبانی فرماتے ہیں کہ حضرت شعبی، حضرت حکم اور حضرت حماد نے ارشاد فرمایا: جو کوئی ضرب کوڑے یا لاٹھی یا پتھر کے ساتھ ہو اور جان سے کم بھی ہو تو وہ عمد ہوگا اور اس میں قصاص ہوگا۔ [مصنف ابن ابي شيبه/كتاب الديات/حدیث: 29583]

حضرت معمر فرماتے ہیں کہ حضرت زہری نے ارشاد فرمایا: جب کوئی آدمی اور لڑکا کسی آدمی کے قتل میں شریک ہوجائیں تو اس آدمی کو قتل کیا جائے گا اور لڑکے کے خاندان والوں پر کامل دیت لازم ہوگی۔ [مصنف ابن ابي شيبه/كتاب الديات/حدیث: 29584]

حضرت جریر بن حازم فرماتے ہیں کہ حضرت حماد سے ایسے آدمی اور بچہ کے متعلق دریافت کیا گیا جس نے کسی آدمی کو جان بوجھ کر قتل کردیا ہو تو اس کا کیا حکم ہے؟ آپ نے فرمایا: آدمی کو قتل کیا جائے گا اور بچہ کے اولیاء پر اس کے حصہ کی دیت لازم ہوگی۔ [مصنف ابن ابي شيبه/كتاب الديات/حدیث: 29585]

حضرت حماد فرماتے ہیں کہ حضرت ابراہیم نے ارشاد فرمایا: جب قتل میں ایسے شخص نے مدد کی جس سے قصاص نہیں لیا جاسکتا تو اس صورت میں دیت ہوگی۔ [مصنف ابن ابي شيبه/كتاب الديات/حدیث: 29586]

حضرت عمرو فرماتے ہیں کہ حضرت حسن بصری نے ارشاد فرمایا: جب بچہ اور غلام کسی قتل میں شریک ہوگئے تو دیت ہوگی اور جب دونوں جمع ہوئے بایں طور کہ اس نے تلوار سے مارا اور اس نے لاٹھی سے تو بھی دیت ہوگی۔ [مصنف ابن ابي شيبه/كتاب الديات/حدیث: 29587]

حضرت ہشام فرماتے ہیں کہ حضرت حسن بصری نے ایسی قوم کے بارے میں میں جنہوں نے جان بوجھ کر قتل کردیا تھا بایں طور پر کہ ان میں بچہ اور مجنون بھی تھے۔ آپ نے فرمایا: اس صورت میں خاندان والوں پر قتل خطا کی دیت ہوگی۔ [مصنف ابن ابي شيبه/كتاب الديات/حدیث: 29588]

حضرت ابراہیم اور حضرت حسن بصری نے ارشاد فرمایا: ایسے آدمی کے بارے میں کہ جس کو عمداً قتل کردیا گیا تھا پس قاتل کو قید کرلیا گیا تا کہ مقتول کے بدلہ اسے قتل کردیا جائے۔ پس ایک آدمی آیا اس نے اس قاتل کو غلطی سے قتل کردیا کہ اس کی دیت قیدی کے گھر والوں کے لیے ہوگی اور حضرت عطاء نے فرمایا: پہلے مقتول کے گھر والوں کو اس کی دیت ملے گی۔ [مصنف ابن ابي شيبه/كتاب الديات/حدیث: 29589]

حضرت قتادہ فرماتے ہیں کہ حسن بصری اور ابراہیم نے ایسے آدمی کے بارے میں ارشاد فرمایا: جس نے عمداً قتل کردیا تھا پس قاتل کو قید کرلیا گیا تا کہ مقتول کے بدلہ اسے قتل کردیا جائے۔ پس ایک آدمی آیا اس نے اس قاتل کو غلطی سے قتل کردیا۔ ان دونوں نے فرمایا: اس کی دیت قیدی کے گھر والوں کے لیے ہوگی۔ [مصنف ابن ابي شيبه/كتاب الديات/حدیث: 29590]