حضرت مغیرہ اپنے اصحاب سے یا ابراہیم سے نقل کرتے ہیں کہ انہوں نے ارشاد فرمایا: مکاتب جو جرم کرے گا تو وہ اسی کے ذمہ ہوگا، وہ اس کا تاوان اور بدل کتابت دونوں ادا کرے گا۔ [مصنف ابن ابي شيبه/كتاب الديات/حدیث: 29121]

حضرت وکیع فرماتے ہیں کہ میں نے حضرت سفا ن کو یوں فرماتے ہوئے سنا کہ مکاتب کے جرم کا تاوان اسی کے ذمہ ہوگا۔ [مصنف ابن ابي شيبه/كتاب الديات/حدیث: 29122]

حضرت ابن جریج فرماتے ہیں کہ حضرت عطاء نے ارشاد فرمایا: مکاتب کو نقصان پہنچنے کی صورت میں جو تاوان ملا ہے وہ اسی کا ہے، وہ اس کے ذریعہ اپنے بدل کتابت میں مدد لے گا۔ تم سے پہلے لوگوں نے ایسا ہی فرمایا تھا۔ [مصنف ابن ابي شيبه/كتاب الديات/حدیث: 29123]

حضرت مغیرہ فرماتے ہیں کہ حضرت ابراہیم نے ارشاد فرمایا: مکاتب کو نقصان پہنچنے کی صورت میں جو تاوان کا مال ملا ہے تو وہ ہی اس کا حقدار ہوگا۔ [مصنف ابن ابي شيبه/كتاب الديات/حدیث: 29124]

حضرت وکیع فرماتے ہیں کہ میں نے حضرت سفیان کو یوں فرماتے ہوئے سنا جب مکاتب کو نقصان پہنچنے کی صورت میں تاوان کا مال ملے گا تو اس کے آقا کے بجائے اس کا ہوگا۔ [مصنف ابن ابي شيبه/كتاب الديات/حدیث: 29125]

حضرت سفیان بن حسین فرماتے ہیں کہ حضرت حکم، ام ولد کی جنایت کے تاوان کے بارے میں فرمایا کرتے تھے: وہ اس کی قیمت سے تجاوز نہ کرتاہو۔ [مصنف ابن ابي شيبه/كتاب الديات/حدیث: 29126]

حضرت حماد نے فرمایا: جو اس نے جنایت کی ہے اسی کی دیت ہوگی۔ [مصنف ابن ابي شيبه/كتاب الديات/حدیث: 29127]

حضرت ابو معشر فرماتے ہیں کہ حضرت ابراہیم نے ارشاد فرمایا: ام ولد کے جرم کا تاوان اس کے آقا پر لازم ہوگا۔ [مصنف ابن ابي شيبه/كتاب الديات/حدیث: 29128]

حضرت معمر فرماتے ہیں کہ حضرت زہری نے ام ولد کی جنایت کے بارے میں یوں ارشاد فرمایا: جب وہ کوئی قابل سزا جرم کرے تو اس کے آقا پر اس جرم کا تاوان لازم ہوگا۔ [مصنف ابن ابي شيبه/كتاب الديات/حدیث: 29129]

یونس فرماتے ہیں کہ حسن بصری نے ام ولد کے بارے میں یوں ارشاد فرمایا! جب وہ قابل سزا جرم کرے تو اس کی قیمت اس کے آقا کے ذمہ لگائی جائے گی۔ [مصنف ابن ابي شيبه/كتاب الديات/حدیث: 29130]