حضرت منصور فرماتے ہیں کہ حضرت ابراہیم نے ارشاد فرمایا: جانور کے مالک کو کھر سے مارنے کی صورت میں ضامن نہیں بنایا جائے گا۔ [مصنف ابن ابي شيبه/كتاب الديات/حدیث: 29151]

حضرت ابن سیرین فرماتے ہیں کہ حضرت شریح نے جانور کے کھر کے ساتھ مارنے کی صورت میں اس کے مالک کو بےقصورقرار دیا۔ [مصنف ابن ابي شيبه/كتاب الديات/حدیث: 29152]

حضرت ہزیل فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جانور کی ٹانگ سے لگنے والا زخم رائیگاں ہے۔ [مصنف ابن ابي شيبه/كتاب الديات/حدیث: 29153]

حضرت اشعث فرماتے ہیں کہ حضرت شعبی نے ارشاد فرمایا: جانور کا مالک ضامن ہوگا اس نقصان کا جو جانور کی اگلی یا پچھلی ٹانگوں سے ہوا ہو یہاں تک کہ وہ جانور سے اتر آئے۔ [مصنف ابن ابي شيبه/كتاب الديات/حدیث: 29154]

حضرت شعبہ فرماتے ہیں کہ میں نے حضرت حکم اور حضرت حماد سے ایسے آدمی کے بارے میں سوال کیا جو اپنی سواری کے پاس کھڑا تھا اور اس کی سواری نے کسی کو اپنی ٹانگ مار دی تو حضرت حما د نے فرمایا: اس شخص کو ضامن نہیں بنایا جائے گا۔ [مصنف ابن ابي شيبه/كتاب الديات/حدیث: 29155]

اور حضرت حکم نے فرمایا: اس شخص کو ضامن بنایا جائے گا۔ [مصنف ابن ابي شيبه/كتاب الديات/حدیث: 29156]

حضرت عاصم فرماتے ہیں کہ حضرت ابن سیرین نے ارشاد فرمایا: کہ وہ حضرات جانور کی ٹانگ سے مارے جانے کی صورت میں ضامن نہیں بناتے تھے مگر جبکہ لگام کھینچنے کی وجہ سے ایسا ہوا ہو۔ [مصنف ابن ابي شيبه/كتاب الديات/حدیث: 29157]

حضرت مغیرہ فرماتے ہیں کہ حضرت حارث نے ارشاد فرمایا: جب تم نے جانور کو مارا یا تم نے اس کو روکنے کے لیے لگام کھینچی پھر اس نے کسی کو نقصان پہنچا دیا تو تم ضامن ہوگے۔ [مصنف ابن ابي شيبه/كتاب الديات/حدیث: 29158]

حضرت ابوہریرہ مرفوعاً روایت کرتے ہیں کہ نبی کریم صلی اللہ علیہ وآلہ وسلم نے ارشاد فرمایا: جانور کا لگایا ہوا زخم رائیگاں ہے اور کنویں میں گر کر مرنے والے کا خون بھی رائیگاں ہے اور کان میں دب کر مرنے والے کا خون بھی رائیگاں ہے اور خزانے میں خمس لازم ہوگا۔ [مصنف ابن ابي شيبه/كتاب الديات/حدیث: 29159]

حضرت ابوہریرہ سے نبی کریم صلی اللہ علیہ وآلہ وسلم کا مذکورہ ارشاد اس سند سے بھی مروی ہے مگر اس سند میں جرحھا کے الفاظ نہیں ہیں۔ [مصنف ابن ابي شيبه/كتاب الديات/حدیث: 29160]