طارق نے امام شعبی سے روایت کیا کہ ان حضرات نے ارشاد فرمایا: آگے چلنے والے کو، ہنکانے والے کو اور سوار کو ضامن بنایا جائے گا۔ [مصنف ابن ابي شيبه/كتاب الديات/حدیث: 29091]

حضرت اسماعیل بن سالم فرماتے ہیں کہ میں نے امام شعبی کو یوں ارشاد فرماتے ہوئے سنا کہ آدمی اپنی سواری کو نرم انداز میں ہنکا رہا ہو تو اس پر کوئی ضمان نہیں ہوگا اور جب وہ جانوروں کو ہنکانے میں سختی برت رہا تھا اور کوئی نقصان ہوگیا تو وہ شخص ضامن ہوگا۔ [مصنف ابن ابي شيبه/كتاب الديات/حدیث: 29092]

حضرت اشعث فرماتے ہیں کہ حضرت حسن بصری نے ارشاد فرمایا: ہنکانے والے کو اور آگے چلنے والے کو ضامن بنایا جائے گا۔ [مصنف ابن ابي شيبه/كتاب الديات/حدیث: 29093]

حضرت خلاس فرماتے ہیں کہ حضرت علی رضی اللہ عنہ نے ارشاد فرمایا: جب راستہ کشاد ہ ہو تو ہنکانے والے پر کوئی ضمان نہیں ہوگا۔ [مصنف ابن ابي شيبه/كتاب الديات/حدیث: 29094]

حضرت ابن جریج فرماتے ہیں کہ حضرت عطاء نے ارشاد فرمایا قائد یعنی آگے چلنے والے کو جرمانہ کیا جائے گا۔ میں نے پوچھا! کیا ہنکانے والے کو بھی جانور کے ہاتھ اور پاؤں سے لگنے والی چوٹ کی وجہ سے جرمانہ کیا جائے گا؟ آپ نے فرمایا: لوگوں کا خیال ہے کہ اسے جانور کے ہاتھ سے لگنے والی چوٹ کا جرمانہ ہوگا۔ میں نے آپ سے بار بار پوچھا تو آپ نے فرمایا: وہ ”راستہ، راستہ“ کی آواز لگائے گا۔ [مصنف ابن ابي شيبه/كتاب الديات/حدیث: 29095]

حضرت حسن بن حر فرماتے ہیں کہ حضرت حکم نے ارشاد فرمایا، یقینا ہنکانے والا آگے چلنے والا اور سوار جرمانہ ادا کریں گے جب ان کی سواری ہاتھ یا پاؤں سے تکلیف پہنچائے، لات مارے یا ضرب لگائے۔ [مصنف ابن ابي شيبه/كتاب الديات/حدیث: 29096]

حضرت لیث فرماتے ہیں کہ حضرت طاؤس نے ارشاد فرمایا: آگے چلنے والے کو، ہنکانے والے کو اور سوار کو ضامن بنایا جائے گا جب ان کی سواری اگلی ٹانگوں سے کسی کو تکلیف پہنچائے۔ [مصنف ابن ابي شيبه/كتاب الديات/حدیث: 29097]

حضرت خلاس سے مروی ہے کہ حضرت علی رضی اللہ عنہ نے ایک سواری پر اکٹھے سوار ہونے والے دونوں افراد کو ضامن بنایا۔ [مصنف ابن ابي شيبه/كتاب الديات/حدیث: 29098]

حضرت شعبی فرماتے ہیں کہ حضرت شریح نے ارشاد فرمایا: سوار کے پیچھے بیٹھنے والے سوار پر ضمان نہیں۔ [مصنف ابن ابي شيبه/كتاب الديات/حدیث: 29099]

حضرت شیبانی فرماتے ہیں کہ حضرت شعبی نے سوار کے پیچھے بیٹھنے والے سوار کے بارے میں یوں ارشاد فرمایا کہ وہ دونوں شریک ہوں گے۔ [مصنف ابن ابي شيبه/كتاب الديات/حدیث: 29100]