حضرت زید بن علی اپنے والد سے اور وہ ان کے دادا سے نقل کرتے ہیں کہ وہ جب کوئی ٹوٹا ہوا ستارہ دیکھتے تو یوں دعا فرماتے: اے اللہ! تو اس کو نشانے پر پہنچا دے اور اس کے ذریعہ نشانہ لگا۔ اور ہمیں بچا اس شر سے جو اس کے پیچھے آنے والا ہے۔ [مصنف ابن ابي شيبه/كتاب الدعاء/حدیث: 31868]

حضرت مسروق فرماتے ہیں کہ حضرت ابن مسعود جب کوئی غلام خریدتے تو یوں دعا فرماتے: اے اللہ! تو ہمارے لیے اس میں برکت پیدا فرما۔ اور اس کو لمبی عمر والا اور زیادہ رزق والا بنا دے۔ [مصنف ابن ابي شيبه/كتاب الدعاء/حدیث: 31869]

حضرت ابو عقیل فرماتے ہیں کہ ان کے استاذ نے ارشاد فریایا: میں نے حضرت ابن سیرین سے پوچھا! جب میں بجلی کی چمک دیکھوں تو کیا کہوں؟ آپ نے ارشاد فرمایا: تم اپنی دونوں آنکھوں کو بند کرلو اور اللہ کا ذکر کرو۔ [مصنف ابن ابي شيبه/كتاب الدعاء/حدیث: 31870]

حضرت زیاد فرماتے ہیں کہ حسن نے ارشاد فرمایا: جو شخص اس وقت یہ کلمات پڑھے۔ جب مؤذن یوں کہتا ہے: میں گواہی دیتا ہوں کہ اللہ کے سوا کوئی معبود نہیں، میں گواہی دیتا ہوں کہ بیشک محمد اللہ کے رسول ہیں۔ اور میں گواہی دینے والے کے ساتھ گواہی دیتا ہوں۔ تو کہنے والے کے لیے گواہی دینے والوں کے اور گواہی نہ دینے والوں کے برابر ثواب ہوگا۔ [مصنف ابن ابي شيبه/كتاب الدعاء/حدیث: 31871]

حضرت ابو جعفر جو کھانا فروش ہیں فرماتے ہیں کہ حضرت ابو جعفر نے ارشاد فرمایا: میں اللہ کی پناہ لیتا ہوں شیطان اور بادشاہ کے شر سے، اور نبطی کے شر سے جب وہ بتکلف عربی بنے اور عربی کے شر سے جب وہ بتکلف نبطی بنے۔ ان سے پوچھا گیا! عربی کیسے بتکلف نبطی بنے گا؟ آپ نے فرمایا: جب وہ ان کے طور طریقے اور لباس اپنا لے۔ [مصنف ابن ابي شيبه/كتاب الدعاء/حدیث: 31872]

اہل بصرہ میں سے ایک آدمی فرماتے ہیں کہ رسول اللہ صلی اللہ علیہ وآلہ وسلم کی خدمت میں ایک ہدیہ لایا گیا۔ اس حال میں کہ حضرت عائشہ رضی اللہ عنہا کھڑے ہو کر نماز پڑھ رہی تھیں۔ پس آپ نے چاہا کہ وہ آپ صلی اللہ علیہ وآلہ وسلم کے ساتھ کھائیں تو آپ صلی اللہ علیہ وآلہ وسلم نے ارشاد فرمایا: اے عائشہ رضی اللہ عنہا! سمیٹ اور مختصر کر۔ فرمایا: یوں کہو! اے اللہ! میں تجھ سے تمام بھلائی کا سوال کرتی ہوں جو جلدی ملنے والی ہو اور جو دیر سے ملنے والی ہو۔ اور میں تیری پناہ لیتی ہوں تمام برائیوں سے جو جلدی آنے والی ہیں اور جو دیر سے آنے والی ہیں۔ اور تو نے جو بھی فیصلہ فرمایا، پس تو اس فیصلہ میں میرے لیے برکت پیدا فرما، اور اس کے انجام کو اچھا کر دے۔ [مصنف ابن ابي شيبه/كتاب الدعاء/حدیث: 31873]

حضرت مکحول فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا! کوئی آدمی نہیں جو بخار میں مبتلا ہو پھر وہ تین دن پے در پے غسل کرے اور ہر غسل کے وقت یوں کہے: اللہ کے نام کے ساتھ: اے اللہ! بیشک میں نے شفا کی درخواست کرتے ہوئے غسل کیا اور تیرے نبی محمد (صلی اللہ علیہ وآلہ وسلم) کی تصدیق کرتے ہوئے۔ مگر یہ کہ اس سے بخار کی تکلیف دور کردی جائے گی۔ [مصنف ابن ابي شيبه/كتاب الدعاء/حدیث: 31874]

حضرت زید العمی فرماتے ہیں کہ جب حضرت یوسف نے عزیز مصر کو دیکھا تو یوں دعا فرمائی: اے اللہ! میں اس کی خیر سے تیری خیر کا سوال کرتا ہوں۔ اور میں اس کے شر سے تیری طاقت کی پناہ لیتا ہوں۔ [مصنف ابن ابي شيبه/كتاب الدعاء/حدیث: 31875]

حضرت حمید فرماتے ہیں کہ حضرت سعید بن ابو الحسن یوں دعا فرمایا کرتے تھے: اے اللہ! ہم پر ایمان کی علامت لگا دے۔ اور ہمیں تقوے کا لباس پہنا دے۔ [مصنف ابن ابي شيبه/كتاب الدعاء/حدیث: 31876]

حضرت حماد بن سلمہ فرماتے ہیں کہ حضرت ثابت نے ارشاد فرمایا: کہ ہم لوگ ایسی جگہ میں تھے جسے جانور پار نہیں کر پا رہے تھے۔ پس میں کھڑا ہوا اس حال میں کہ میں ان آیات کی تلاوت کر رہا تھا! ترجمہ! گناہ کو معاف کرنے والے، اور توبہ قبول کرنے والے، سخت پکڑ والے۔ آپ فرماتے ہیں: پس ایک بزرگ سرمئی رنگ کے خچر پر سوار ہو کر گزرے اور فرمایا: یوں کہو، اے گناہوں کو معاف کرنے والے، میرے گناہ کو معاف فرما، اے توبہ قبول کرنے والے، میری توبہ کو قبول فرما۔ اے سخت پکڑ والے، مجھ سے میری سزا کو معاف فرما۔ اے فضل و احسان والے! مجھ پر بھلائی کے ساتھ احسان فرما۔ آپ فرماتے ہیں! میں نے ان کلمات کو پڑھا۔ پھر میں نے دیکھا تو مجھے وہاں کوئی دکھائی نہیں دیا۔ [مصنف ابن ابي شيبه/كتاب الدعاء/حدیث: 31877]