حضرت عائشہ رضی اللہ عنہا فرماتی ہیں کہ میں رسول اللہ صلی اللہ علیہ وآلہ وسلم کے پہلو میں تھی پس میں نے آپ صلی اللہ علیہ وآلہ وسلم کو گم پایا تو میں آپ صلی اللہ علیہ وآلہ وسلم کو تلاش کرنے لگی اچانک میں نے دیکھا کہ آپ صلی اللہ علیہ وآلہ وسلم بقیع میں اپنے ہاتھوں کو اٹھائے ہوئے دعا فرما رہے تھے۔ پس آپ صلی اللہ علیہ وآلہ وسلم فرمانے لگے: اے ابوبکر کی بیٹی! کیا تجھے خوف ہے کہ اللہ اور اس کا رسول (صلی اللہ علیہ وآلہ وسلم) تجھ پر ظلم کریں گے؟ بیشک اللہ شعبان کی اس پندرہویں رات میں اترتے ہیں اور اس میں قبیلہ بنو کلب کی بکریوں کے بالوں کی تعداد سے بھی زیادہ گناہوں کو معاف فرماتے ہیں۔ [مصنف ابن ابي شيبه/كتاب الدعاء/حدیث: 31848]

حضرت کثیر بن مرۃ الحضرمی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک اللہ شعبان کی پندرہویں رات کو اترتے ہیں پھر اس رات میں لوگوں کے گناہوں کو معاف فرماتے ہیں سوائے مشرک اور دل میں کینہ رکھنے والے کے۔ [مصنف ابن ابي شيبه/كتاب الدعاء/حدیث: 31849]

حضرت موسیٰ بن عبیدہ فرماتے ہیں کہ حضرت ابوبکر بن انس بن مالک رحمہ اللہ کے پاس زرتشت تھے جو ان کی زمین میں کام کیا کرتے تھے۔ اور آپ ان کے لیے دعا فرمایا کرتے تھے: اللہ تمہاری عمریں لمبی کرے اور تمہارے مال کو زیادہ فرمائے۔ پس وہ لوگ اس دعا سے بہت خوش ہوتے تھے۔ [مصنف ابن ابي شيبه/كتاب الدعاء/حدیث: 31850]

حضرت نافع فرماتے ہیں کہ حضرت ابن عمر رضی اللہ عنہما جب حج یا عمرہ کرنے کے لیے تشریف لاتے تو بیت اللہ کا طواف کرتے اور دو رکعت نماز پڑھتے۔ اور ان دونوں رکعات میں آپ کا بیٹھنا آپ کے قیام سے زیادہ لمبا ہوتا، آپ اپنے رب کی ثنا کرتے اور دعا مانگتے۔ پس جب آپ دو رکعات سے فارغ ہوجاتے تو اور صفا اور مروہ کے درمیان یوں دعا فرماتے: اے اللہ! تو اپنے دین کے ذریعہ اور اپنی اطاعت و فرمانبرداری اور اپنے رسول کی اطاعت و فرمانبرداری کے ذریعہ میری حفاظت فرما۔ اے اللہ! تو مجھے اپنی حدود میں پڑنے سے بچا لے۔ اے اللہ! مجھے ان لوگوں میں سے بنا دے جو تجھ سے محبت کرتے ہیں اور تیرے فرشتوں اور تیرے رسولوں اور تیرے نیک بندوں سے محبت کرتے ہیں، اے اللہ! تو مجھے اپنا محبوب بنا لے، اور اپنے فرشتوں اور اپنے رسولوں کی طرف محبوب کر دے، اے اللہ! تو مجھے بھلائی عطا کر جو تو اپنے نیک بندوں کو دنیا اور آخرت میں عطا کرے گا۔ اے اللہ! میرے لیے آسانی پیدا فرما۔ اور مجھے سختی سے بچا لے۔ اور دنیا اور آخرت میں میری مغفرت فرما، اے اللہ! مجھے توفیق دے کہ میں تیرے اس وعدہ کو پورا کروں جو تو نے مجھ سے کیا، اے اللہ! مجھے متقی پیشواؤں میں سے بنا دے، اور مجھے نعمتوں والی جنت کے وارثوں میں سے بنا دے، اور یوم حساب کو میری غلطیوں کی مغفرت فرما۔ [مصنف ابن ابي شيبه/كتاب الدعاء/حدیث: 31851]

حضرت عثمان بن حکیم فرماتے ہیں کہ حضرت جابر بن زید ابو الشعثائ نے فرمایا: جب تو جمعہ کی نماز کے لیے آئے تو مسجد کے دروازے پر بیٹھ کر یوں دعا کر! اے اللہ! تو آج کے دن مجھے تیری طرف متوجہ ہونے والوں میں سب سے زیادہ باوجاہت، اور تیرا قرب چاہنے والوں میں سب سے زیادہ قریب، اور مانگنے اور دعا کرنے والوں میں سب سے زیادہ کامیاب بنا دے۔ پھر مسجد میں داخل ہو اور مانگو تم کو عطا کیا جائے گا۔ [مصنف ابن ابي شيبه/كتاب الدعاء/حدیث: 31852]

حضرت قریبہ فرماتی ہیں کہ حضرت عائشہ رضی اللہ عنہا نے ارشاد فرمایا: تم مسکین کو یوں مت کہو: تمہیں برکت دی جائے۔ اس لیے کہ نیکو کار اور بدکار سوال کرتا ہے۔ لیکن اس طرح کہا کرو! اللہ ہمیں اور تمہیں رزق عطا فرمائے۔ [مصنف ابن ابي شيبه/كتاب الدعاء/حدیث: 31853]

حضرت صبیح جو بنو مروان کے آزاد کردہ غلام ہیں فرماتے ہیں کہ میں نے حضرت مکحول کو جانور کے کھر میں زخم کے لیے یوں دعا کرتے ہوئے سنا: اللہ کے نام کے ساتھ تو ہی بچانے والا، اور تو ہی شفا دینے والا ہے، اور تو ہی باقی رہنے والا ہے، پھر آپ سن کے نئے دھاگے یا بال میں گرہ لگاتے، پھر اس سے جانور کو اس کے کھر کے زخم کے لیے باندھ دیتے۔ [مصنف ابن ابي شيبه/كتاب الدعاء/حدیث: 31854]

حضرت محمد بن سعید یا سعید بن محمد فرماتے ہیں کہ حضرت طاوس کی دعا یوں ہوتی تھی: اے اللہ! تو مجھ سے مال اور اولاد کو روک لے اور مجھے ایمان اور عمل کی دولت عطا فرما۔ [مصنف ابن ابي شيبه/كتاب الدعاء/حدیث: 31855]

حضرت عبد الرحمن ابن سابط فرماتے ہیں کہ رسول اللہ صلی اللہ علیہ وآلہ وسلم ان کلمات کے ذریعہ دعا کرتے تھے اور ان کو بہت عظیم سمجھتے: اے غم کو دور کرنے والے، اور مصیبت کو اٹھانے والے، اور مجبوروں کی دعاؤں کا جواب دینے والے، دنیا اور آخرت کے رحمن اور ان دونوں کے رحیم، آج کے دن مجھ پر ایسی وسیع رحمت فرما جو مجھے تیرے علاوہ کی رحمت سے بےنیاز کر دے۔ [مصنف ابن ابي شيبه/كتاب الدعاء/حدیث: 31856]

حضرت ثوبان فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: تقدیر کو کوئی چیز ٹال نہیں سکتی سوائے دعا کے، اور عمر میں کوئی چیز بھی اضافہ نہیں کرسکتی سوائے نیکی کے۔ [مصنف ابن ابي شيبه/كتاب الدعاء/حدیث: 31857]