حضرت ابراہیم ایک دوسری سند سے حضرت عبد اللہ رضی اللہ عنہ کا یہی مذہب نقل فرماتے ہیں۔ [مصنف ابن ابي شيبه/كتاب الفرائض/حدیث: 33260]

شعبی فرماتے ہیں کہ حضرت سالم مولیٰ ابی حذیفہ رضی اللہ عنہ شہید ہوئے تو حضرت ابوبکر رضی اللہ عنہ نے ان کی بیٹی کو آدھا مال عطا فرمایا اور باقی آدھا مال اللہ کے راستے میں خرچ فرما دیا۔ [مصنف ابن ابي شيبه/كتاب الفرائض/حدیث: 33261]

ابراہیم فرماتے ہیں کہ نبی کریم صلی اللہ علیہ وآلہ وسلم کے صحابہ میں سے کوئی بھی شوہر اور بیوی پر کچھ مال بھی دوبارہ نہیں لوٹاتا تھا۔ [مصنف ابن ابي شيبه/كتاب الفرائض/حدیث: 33262]

فرماتے ہیں کہ حضرت زید رضی اللہ عنہ ہر حقدار کو اس کا حصّہ دیتے اور باقی مال بیت المال میں جمع کروا دیتے۔ [مصنف ابن ابي شيبه/كتاب الفرائض/حدیث: 33263]

ابراہیم فرماتے ہیں کہ حضرت عبد اللہ رضی اللہ عنہ حقیقی بہن کی موجودگی میں باپ شریک بہن پر کچھ مال نہیں لوٹاتے تھے، اسی طرح بیٹی کے ہوتے ہوئے پوتی پر، ماں کے ہوتے ہوئے ماں شریک بھائیوں پر اور شوہر اور بیوی پر۔ [مصنف ابن ابي شيبه/كتاب الفرائض/حدیث: 33264]

مغیرہ اور اعمش روایت فرماتے ہیں کہ کوئی بھی دادی یا نانی پر مال دوبارہ نہیں لوٹاتا تھا، دوسرے رشتہ دار ہوں تو ان پر لوٹا دیتا تھا۔ [مصنف ابن ابي شيبه/كتاب الفرائض/حدیث: 33265]

شیبانی فرماتے ہیں کہ میں نے حضرت شعبی سے پھوپھی کے بارے میں سوا ل کیا کہ کیا وہ وراثت کی زیادہ حق دار ہے یا بھتیجی؟ فرماتے ہیں کہ اس پر وہ فرمانے لگے: کیا تم یہ بات نہیں جانتے؟ کہتے ہیں کہ میں نے کہا کہ بھتیجی پھوپھی سے زیادہ حق دار ہے۔ [مصنف ابن ابي شيبه/كتاب الفرائض/حدیث: 33266]

ابو اسحاق فرماتے ہیں کہ حضرت عامر نے حضرت مسروق کے بارے میں گواہی دی کہ انہوں نے فرمایا کہ ان کو ان کے آباء کے درجے میں اتارو۔ [مصنف ابن ابي شيبه/كتاب الفرائض/حدیث: 33267]

شعبی حضرت مسروق سے روایت کرتے ہیں کہ انہوں نے فرمایا کہ ذوی الأرحام کو ان کے آباء کے درجے میں رکھو۔ [مصنف ابن ابي شيبه/كتاب الفرائض/حدیث: 33268]

شیبانی نقل کرتے ہیں کہ حضرت شعبی نے بھتیجی اور پھوپھی کے بارے میں ارشاد فرمایا کہ مال بھتیجی کے لئے ہے۔ [مصنف ابن ابي شيبه/كتاب الفرائض/حدیث: 33269]