ابوبکر (ابن ابی شیبہ) فرماتے ہیں کہ یہ مسئلہ ستائیس حصّوں سے نکلے گا، دو بیٹیوں کے لئے سولہ حصّے اور والدین کے لئے آٹھ حصّے اور بیوی کے لئے تین حصّے۔ [مصنف ابن ابي شيبه/كتاب الفرائض/حدیث: 33300]

حضرت ابو سعید فرماتے ہیں کہ حضرت ابوبکر رضی اللہ عنہ دادا کو باپ جیسا ہی سمجھتے تھے۔ [مصنف ابن ابي شيبه/كتاب الفرائض/حدیث: 33301]

کردوس بن عباس حضرت ابو موسیٰ رضی اللہ عنہ سے نقل کرتے ہیں کہ حضرت ابوبکر رضی اللہ عنہ دادا کو باپ جیسا ہی سمجھتے تھے۔ [مصنف ابن ابي شيبه/كتاب الفرائض/حدیث: 33302]

ابن ابی ملیکہ فرماتے ہیں کہ حضرت ابن زبیر رضی اللہ عنہ نے فرمایا کہ بیشک وہ صاحب جن کے بارے میں حضور صلی اللہ علیہ وسلم نے یہ فرمایا: اگر میں کسی کو اپنا دوست بناتا تو ضرور ابوبکر کو دوست بناتا، انہوں نے دادا کو باپ کے قائم مقام قرار دیاے۔ [مصنف ابن ابي شيبه/كتاب الفرائض/حدیث: 33303]

ایک دوسری سند سے حضرت ابن زبیر رضی اللہ عنہ نے حضرت ابوبکر صدیق رضی اللہ عنہ کا یہ مسلک نقل فرمایا ہے۔ [مصنف ابن ابي شيبه/كتاب الفرائض/حدیث: 33304]

عبد الرحمن بن معقل فرماتے ہیں کہ میں حضرت ابن عباس رضی اللہ عنہما کے پاس تھا کہ ان سے ایک آدمی نے دادا کے بارے میں سوال کیا، آپ نے اس سے فرمایا: تمہارا کون سا باپ بڑا ہے؟ اس آدمی کو اس کا جواب سمجھ نہیں آیا، میں نے عرض کیا: حضرت آدم علیہ السلام، آپ نے فرمایا: اللہ تعالیٰ خو د ارشاد فرماتے ہیں: اے آدم کے بیٹو! [مصنف ابن ابي شيبه/كتاب الفرائض/حدیث: 33305]

حضرت طاؤس نے حضرت ابو بکر، ابن عباس رضی اللہ عنہما اور حضرت عثمان رضی اللہ عنہ م کے بارے میں نقل فرمایا ہے کہ انہوں نے دادا کا حکم باپ جیسا ہی قرار دیا ہے۔ [مصنف ابن ابي شيبه/كتاب الفرائض/حدیث: 33306]

عطاء بھی حضرت ابن عباس رضی اللہ عنہما کا یہی مسلک نقل کرتے ہیں۔ [مصنف ابن ابي شيبه/كتاب الفرائض/حدیث: 33307]

قبیصہ بن ذؤیب سے منقول ہے کہ حضرت عمر رضی اللہ عنہ دادا کے لئے وہی حصّہ مقرر فرماتے تھے جو آج کل کیا جاتا ہے۔ [مصنف ابن ابي شيبه/كتاب الفرائض/حدیث: 33308]

راوی کہتے ہیں کہ میں نے ان سے پوچھا کہ آپ کی مراد حضرت زید بن ثابت رضی اللہ عنہ کی رائے ہے؟ انہوں نے فرمایا: جی ہاں! [مصنف ابن ابي شيبه/كتاب الفرائض/حدیث: 33309]