ابو بکر فرماتے ہیں کہ نبی کریم صلی اللہ علیہ وسلم کے صحابہ نے حضرت عبد اللہ رضی اللہ عنہ کے علاوہ جو فیصلہ فرمایا اس کے مطابق یہ چار حصّے ہیں اور یہ عصبہ کے لئے ہیں، اور حضرت عبد اللہ رضی اللہ عنہ کے فیصلے کے مطابق یہ پانچ حصّے ہیں اور یہ رشتہ داری کی وجہ سے عصبہ بن جانے والے رشتہ داروں کے لئے ہیں۔ ابو بکر فرماتے ہیں کہ یہ مسئلہ ان تمام حضرات کے قول کے مطابق چھ حصّوں سے نکلے گا، اگر حضرت عبد اللہ رضی اللہ عنہ کے قول کے مطابق ہو تو ماں کے لئے چھٹا حصّہ ہوگا اور پانچ حصّے باقی بچیں گے، اور اگر نبی کریم صلی اللہ علیہ وسلم کے صحابہ کے قول کے مطابق ہو تو ماں کے لئے ایک تہائی مال یعنی دو حصّے ہیں اور چار حصّے باقی عصبہ کے لئے ہیں۔ [مصنف ابن ابي شيبه/كتاب الفرائض/حدیث: 33280]

حضرت فضیل فرماتے ہیں کہ ابراہیم نے اس عورت کے بارے میں فرمایا جو اپنے شوہر اور اپنے آزاد ماں شریک بھائیوں کو چھوڑ کرمری جبکہ اس کا ایک غلام بیٹا بھی تھا، کہ اس کے شوہر کے لئے آدھا مال یعنی تین حصّے ہیں اور اس کے ماں شریک بھائیوں کے لئے ایک تہائی مال یعنی دو حصّے ہیں، اور چھٹا حصّہ جو باقی بچا وہ عصبہ کے لئے ہے، اور اس کا غلام بیٹا کسی چیز کا وارث نہ ہوگا حضرت علی رضی اللہ عنہ کے فیصلے کے مطابق۔ اور اس مسئلے میں حضرت عبد اللہ رضی اللہ عنہ نے یہ فیصلہ فرمایا کہ اس کے شوہر کے لئے چوتھائی مال یعنی ڈیڑھ حصّہ ہے، اور اس کا بیٹا ماں شریک بھائیوں کے حصّے کے لئے مانع ہوگا جبکہ وہ غلام ہو، اور اس کا بیٹا کسی چیز کا وارث نہ ہوگا، اور شوہر کے حصّے کو کم کر دے گا، اور باقی تین چوتھائی مال عصبہ کے لئے ہے۔ اور اس مسئلے میں حضرت زید رضی اللہ عنہ نے یہ فیصلہ فرمایا کہ اس کے شوہر کے لئے آدھا مال یعنی تین حصّے ہیں، اور اس کے ماں شریک بھائیوں کے لئے ایک تہائی مال یعنی دو حصّے ہیں، اور باقی مال بیت المال میں رکھا جائے گا جبکہ کوئی مولیٰ یا ذوی الأرحام میں سے کوئی رشتہ دار نہ ہو۔ [مصنف ابن ابي شيبه/كتاب الفرائض/حدیث: 33281]

ابو بکر فرماتے ہیں کہ یہ مسئلہ حضرت علی رضی اللہ عنہ اور زید رضی اللہ عنہ کی رائے میں چھ حصّوں سے نکلے گا، اور حضرت عبداللہ بن مسعود رضی اللہ عنہ کی رائے میں چار حصّوں سے نکلے گا۔ [مصنف ابن ابي شيبه/كتاب الفرائض/حدیث: 33282]

عطاء حضرت ابن عباس رضی اللہ عنہما کا فرمان نقل کرتے ہیں کہ میراث کے حصّوں میں ”عول“ نہیں ہوتا۔ [مصنف ابن ابي شيبه/كتاب الفرائض/حدیث: 33283]

ابراہیم حضرت علی رضی اللہ عنہ، حضرت عبد اللہ رضی اللہ عنہ اور حضرت زید رضی اللہ عنہ کے بارے میں نقل کرتے ہیں کہ یہ حضرات میراث میں ”عول“ کے قائل ہیں۔ [مصنف ابن ابي شيبه/كتاب الفرائض/حدیث: 33284]

محمد بن سیرین نقل کرتے ہیں کہ حضرت شریح نے دو حقیقی بہنوں، دو ماں شریک بہنوں، شوہر اور ماں کے مسئلے کے بارے میں ارشاد فرمایا کہ یہ دس حصّوں سے نکلے گا، چار حصّے دونوں حقیقی بہنوں کے لئے، دو حصّے دونوں ماں شریک بہنوں کے لئے، تین حصّے شوہر کے لئے، اور ایک حصّہ ماں کے لئے۔ [مصنف ابن ابي شيبه/كتاب الفرائض/حدیث: 33285]

وکیع فرماتے ہیں کہ لوگ یہی رائے رکھتے ہیں، اور یہ الفروخ کی تقسیم ہے۔ [مصنف ابن ابي شيبه/كتاب الفرائض/حدیث: 33286]

طاؤس حضرت ابن عباس رضی اللہ عنہما کا فرمان نقل کرتے ہیں فرمایا کہ میرے پوتے میرے حصّے کے لئے مانع ہیں نہ کہ میرے بھائی، اور میں ان کے بھائیوں کو چھوڑ کر ان کے لئے مانع نہیں بنتا۔ [مصنف ابن ابي شيبه/كتاب الفرائض/حدیث: 33287]

فضیل ابراہیم سے نقل کرتے ہیں کہ انہوں نے اس عورت کے بارے میں فرمایا جو عورت اپنی ماں شریک بہن اور اپنی ماں کو چھوڑ جائے اور اس کا کوئی عصبہ نہ ہو اس کی ماں شریک بہن کے لئے چھٹا حصّہ ہے اور اس کی ماں کے لئے پانچ حصّے ہیں، یہ حضرت عبد اللہ رضی اللہ عنہ کا فیصلہ ہے، اور اس بارے میں حضرت زید رضی اللہ عنہ نے یہ ارشاد فرمایا کہ اس کی ماں شریک بہن کے لئے مال کا چھٹا حصّہ ہے، اور اس کی ماں کے لئے ایک تہائی مال ہے، اور باقی مال بیت المال میں رکھا جائے گا۔ اور اس مسئلے میں حضرت علی رضی اللہ عنہ نے یہ فیصلہ فرمایا کہ ان دونوں کو مال ان کے وراثت میں حصّے کے مطابق ہے، اس طرح انہوں نے ماں شریک بہن کے لئے ایک تہائی مال اور ماں کے لئے دو تہائی مال کا فیصلہ فرمایا۔ [مصنف ابن ابي شيبه/كتاب الفرائض/حدیث: 33288]

ابو بکر فرماتے ہیں کہ یہ مسئلہ حضرت علی رضی اللہ عنہ کے قول کے مطابق تین حصّوں سے اور حضرت عبد اللہ رضی اللہ عنہ اور زید رضی اللہ عنہ کی رائے میں چھ حصّوں سے نکلے گا۔ [مصنف ابن ابي شيبه/كتاب الفرائض/حدیث: 33289]