حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے مدفون خزانہ کے بارے میں خمس کا فیصلہ فرمایا۔ [مصنف ابن ابي شيبه/كتاب السير/حدیث: 34901]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مدفون خزانہ میں خمس واجب ہے۔ [مصنف ابن ابي شيبه/كتاب السير/حدیث: 34902]

حضرت عمرو بن میمون رحمہ اللہ فرماتے ہیں کہ حضرت عمر رضی اللہ عنہ نے اہل سواد پر ہر جریب میں ایک قفیز اور ایک درہم مقرر فرمایا۔ [مصنف ابن ابي شيبه/كتاب السير/حدیث: 34903]

حضرت ابو عون محمد بن عبید اللہ الثقفی رحمہ اللہ فرماتے ہیں کہ حضرت عمر رضی اللہ عنہ نے اہل سواد پر ہر آباد یا غیر آباد جریب میں ایک قفیز اور ایک درہم مقرر فرمایا: اور سبزی کے جریب پر پانچ درہم اور پانچ قفیز مقرر فرمائے۔ اور درختوں کے جریب پر دس درہم اور دس قفیز مقرر فرمائے اور انگور کے جریب پر بھی دس درہم اور دس قفیز مقرر فرمائے۔ اور کھجور کا ذکر نہیں فرمایا۔ [مصنف ابن ابي شيبه/كتاب السير/حدیث: 34904]

حضرت ابو عون محمد بن عبید اللہ الثقفی رحمہ اللہ فرماتے ہیں کہ حضرت عمر بن خطاب سواد والوں پر ہر جریب میں جس کی زمین پانی سے سیراب ہوتی ہو چاہے آباد ہو یا غیر آباد ایک درہم اور کھانے کا ایک قفیز مقرر فرمایا: اور باغات کے ہر جریب پر دس درہم اور کھانے کے دس قفیز مقرر فرمائے۔ اور سبزیوں کے ہر جریب پر پانچ درہم اور کھانے کے پانچ قفیز مقرر فرمائے۔ اور انگور کے ہر جریب پر دس درہم اور دس قفیز مقرر فرمائے اور کھجور پر کچھ مقرر نہیں فرمایا۔ اسے زمین کے تابع قرار دیا۔ [مصنف ابن ابي شيبه/كتاب السير/حدیث: 34905]

حضرت ابو مجلز رحمہ اللہ فرماتے ہیں کہ حضرت عمر بن خطاب رضی اللہ عنہ نے عثمان بن حُنیف کو زمین کی پیمائش ناپنے کے لیے بھیجا۔ تو حضرت عثمان بن حنیف رضی اللہ عنہ نے انگور کے جریب پر دس درہم مقرر فرمائے اور کھجور کے جریب پر آٹھ درہم مقرر فرمائے۔ اور سبزی کے جریب پر چھ درہم مقرر فرمائے اور گیہوں کے جریب پر چار درہم مقرر فرمائے اور جو کے جریب پر دو درہم مقرر فرمائے۔ [مصنف ابن ابي شيبه/كتاب السير/حدیث: 34906]

حضرت ابو مجلز رحمہ اللہ فرماتے ہیں کہ حضرت عمر رضی اللہ عنہ نے کھجور کے جریب پر آٹھ درہم مقرر فرمائے۔ [مصنف ابن ابي شيبه/كتاب السير/حدیث: 34907]

حضرت حکم رحمہ اللہ فرماتے ہیں کہ حضرت عمر بن خطاب رضی اللہ عنہ نے عثمان بن حنیف رضی اللہ عنہ کو سواد کی طرف بھیجا۔ تو انہوں نے ہر آباد اور غیر آباد زمین کے جریب پر جو پانی سے سیراب ہوتی ہو ایک درہم اور گندم یا جو کا ایک قفیز مقرر فرمایا۔ اور ہر انگور کے جریب پر دس مقرر فرمائے۔ اور سبزی کے جریب پر پانچ مقرر فرمائے۔ [مصنف ابن ابي شيبه/كتاب السير/حدیث: 34908]

حضرت ابان بن تغلب رحمہ اللہ ایک آدمی سے نقل کرتے ہیں کہ حضرت عمر رضی اللہ عنہ نے کھجور کے دو لمبے درختوں پر ایک درہم مقرر فرمایا: اور ہر فارسی پر بھی ایک درہم مقرر فرمایا۔ [مصنف ابن ابي شيبه/كتاب السير/حدیث: 34909]

حضرت عمرو بن میمون فرماتے ہیں کہ میں حاضر ہوا تو حضرت عمر رضی اللہ عنہ حضرت حذیفہ رضی اللہ عنہ اور حضرت عثمان بن حنیف کے پاس کھڑے تھے۔ حضرت عمر رضی اللہ عنہ فرما رہے تھے کہ کیا تم دونوں کو اس بات کا خوف ہے کہ تم نے زمین کو اس چیز کا مکلف بنا دیا ہے جس کی وہ طاقت نہیں رکھتی؟ حضرت حذیفہ رضی اللہ عنہ نے کہا کہ اگر میں چاہوں تو اپنی زمین پر دگنا کر دوں۔ حضرت عثمان بن حنیف نے فرمایا کہ میں نے اپنی زمین کو ایسی چیز کا مکلف بنایا ہے جس کی وہ طاقت رکھتی ہے اور اس میں کوئی زیادہ گنجائش نہیں ہے۔ حضرت عمر رضی اللہ عنہ نے فرمایا کہ تم دونوں سوچ لو کہیں ایسا نہ ہو کہ زمین کو اس چیز کا مکلف بناؤ جس کی اس میں طاقت نہیں ہے۔ [مصنف ابن ابي شيبه/كتاب السير/حدیث: 34910]