حضرت حسن بصری رحمہ اللہ فرماتے ہیں کہ ایک آدمی نے نبی کریم صلی اللہ علیہ وآلہ وسلم سے مال غنیمت میں موجود بالوں سے بنی ہوئی لگام مانگی تو رسول اللہ صلی اللہ علیہ وسلم نے فرمایا: یہ مجھ سے آگ کی لگام مانگ رہا ہے۔ اور تیرے لیے مناسب نہیں ہے کہ تو اس کا مجھ سے سوال کرے۔ اور نہ میرے لیے مناسب ہے کہ یہ میں تجھے عطا کردوں۔ [مصنف ابن ابي شيبه/كتاب السير/حدیث: 35111]

حضرت قیس بن ابی حازم احمس رحمہ اللہ فرماتے ہیں کہ ایک آدمی رسول اللہ صلی اللہ علیہ وسلم کے پاس مال غنیمت میں سے بالوں کا ایک گولا لایا اور کہنے لگا: اے اللہ کے رسول صلی اللہ علیہ وسلم ! آپ صلی اللہ علیہ وسلم مجھے یہ ہدیہ کردیں پس ہم ایسے گھر والے ہیں جو بالوں کا کام کرتے ہیں۔ آپ صلی اللہ علیہ وسلم نے فرمایا: اس میں سے جو میرا حصہ ہوگا وہ تیرا ہوگا۔ [مصنف ابن ابي شيبه/كتاب السير/حدیث: 35112]

حضرت عباس بن فضل رحمہ اللہ اپنے والد سے نقل کرتے ہیں کہ ان کے دادا حضرت ابو رافع رضی اللہ عنہ نے ارشاد فرمایا: کہ میں حضرت علی رضی اللہ عنہ کا خزانچی تھا۔ میں نے مال میں سے ایک موتی آپ رضی اللہ عنہ کی بیٹی کو پہنا دیا جسے آپ رضی اللہ عنہ نے پہچان لیا۔ جب آپ رضی اللہ عنہ نے یہ موتی اس پر دیکھا تو فرمایا: اس کے پاس یہ کہاں سے آیا؟ یقینا اللہ رب العزت نے مجھ پر یہ بات لازم کردی ہے کہ میں اس کا ہاتھ کاٹ دوں۔ راوی فرماتے ہیں: کہ میں نے جب یہ معاملہ دیکھا تو میں نے عرض کیا: اے امیر المؤمنین! یہ موتی میں نے اپنی بھتیجی کو پہنایا تھا ورنہ یہ کہاں اس پر قدرت رکھ سکتی ہے؟ جب آپ رضی اللہ عنہ نے یہ معاملہ دیکھا تو آپ رضی اللہ عنہ خاموش ہوگئے۔ [مصنف ابن ابي شيبه/كتاب السير/حدیث: 35113]

حضرت عبد الرحمن بن عجلان البرجمی رحمہ اللہ فرماتے ہیں کہ ان کی دادی نے فرمایا: کہ حضرت علی رضی اللہ عنہ ہمارے درمیان مصالحہ تھیلیوں میں تقسیم فرماتے تھے۔ زیرہ اور رائی کی تھیلی اتنی اور اتنی مقدار میں۔ [مصنف ابن ابي شيبه/كتاب السير/حدیث: 35114]

حضرت ربیع بن حسان رحمہ اللہ فرماتے ہیں کہ میری والدہ نے فرمایا: کہ حضرت علی رضی اللہ عنہ ہمارے درمیان ہلدی اور زعفران تقسیم فرماتے تھے۔ [مصنف ابن ابي شيبه/كتاب السير/حدیث: 35115]

راوی کہتے ہیں کہ ایک مرتبہ حضرت علی رضی اللہ عنہ حجرہ میں داخل ہوئے تو انہوں نے بکھرے ہوئے دانوں کو دیکھا تو آپ رضی اللہ عنہ نے ان کو چننا شروع کردیا اور یوں فرما رہے تھے: اے آل علی! تم سیر ہوگئے! [مصنف ابن ابي شيبه/كتاب السير/حدیث: 35116]

حضرت سعید بن عبید رحمہ اللہ اپنے ایک شیخ سے نقل کرتے ہیں کہ حضر ت علی رضی اللہ عنہ کے پاس انار لائے گئے۔ تو آپ رضی اللہ عنہ نے ان کو لوگوں کے درمیان تقسیم فرما دیا تو ہماری مسجد والوں کو سات یا آٹھ انار ملے۔ [مصنف ابن ابي شيبه/كتاب السير/حدیث: 35117]

حضرت اسماعیل بن ابی خالد رحمہ اللہ اپنے والد سے نقل کرتے ہیں کہ حضرت علی رضی اللہ عنہ کے پاس غابات سے طلاء (گاڑھے کیے ہوئے انگور کے شیرے) کے مٹکے لائے گئے تو آپ رضی اللہ عنہ نے ان کو مسلمانوں کے درمیان تقسیم فرما دیا۔ [مصنف ابن ابي شيبه/كتاب السير/حدیث: 35118]

حضرت عبد الرحمن بن ابی بکرہ رحمہ اللہ فرماتے ہیں کہ حضرت علی رضی اللہ عنہ نے ہمارے بیت المال میں کسی چیز کی کمی نہیں کی سوائے روئی بھرے جبہ اور درابجردی خمیصہ (دھاری دار چادر) کے یہاں تک کہ آپ رضی اللہ عنہ ہم سے جدا ہوگئے۔ [مصنف ابن ابي شيبه/كتاب السير/حدیث: 35119]

حضرت مسروق رحمہ اللہ فرماتے ہیں کہ حضرت عائشہ رضی اللہ عنہا نے ارشاد فرمایا: جب حضرت ابوبکر رضی اللہ عنہ بیمار ہوئے جس بیماری میں آپ رضی اللہ عنہ کی وفات ہوگئی تو آپ رضی اللہ عنہ نے فرمایا: تم لوگ دیکھنا کہ میرے خلیفہ بننے کے بعد جو میرے مال میں اضافہ ہوا ہے تم اس مال کو میرے بعد بننے والے خلیفہ کے پاس بھیج دینا۔ تحقیق میں نے اس مال کو اپنے لیے جائز اور حلال سمجھا تھا۔ اور تحقیق مال ودک سے مجھے اتنا ہی نفع ہوا تھا جتنا مجھے تجارت میں ہوتا تھا۔ حضرت عائشہ رضی اللہ عنہا فرماتی ہیں: جب آپ رضی اللہ عنہ کی وفات ہوگئی تو ہم نے دیکھا تو آپ رضی اللہ عنہ کے مال میں ایک نوبی غلام کا اضافہ تھا جو بچوں کو سنبھالتا تھا اور ایک پانی کھینچنے والا اونٹ جس پر آپ رضی اللہ عنہ پانی کھنچواتے تھے۔ ان دونوں کو حضرت عمر رضی اللہ عنہ کے پاس بھیج دیا گیا۔ آپ رضی اللہ عنہا فرماتی ہیں کہ مجھے میرے وکیل نے خبر دی کہ حضرت عمر رضی اللہ عنہ رو پڑے اور فرمایا: ابوبکر رضی اللہ عنہ پر اللہ کی رحمت ہو۔ تحقیق انہوں نے اپنے بعد والوں کو بہت زیادہ مشقت میں ڈال دیا۔ [مصنف ابن ابي شيبه/كتاب السير/حدیث: 35120]